Nạ mamhiigha ni loor abạl oomo arumhuoghaạph Otu Okoriom alhạ phọ arolhool? Uguạ, pogh mughumọ nạ katue ni apanyanhaạn sipuru phọ iphẹn phọ:

Jems 5:11 ingọ iyira eeghe okuphom owol ilọ iphẹn eḅẹm bọ mọ aZihova “amoọgh ni iboom igbiririph r’onmạ ighirigiir”?

Yira olegheri mọ onmạ ighirigiir phọ aZihova ranyu ghan nyodị osạr owilhenhaạn asipiomạn phọ ayira. Jems 5:11 ingọ iyira okuphom owol mọ odị amoọgh ni iboom igbiririph kẹn olhoghonhaạn ayira ḍighaạgh. Ewạ mọ yira otuughaạny aani nyodị.—w21.01, opoḍi phọ 21.

Eeghe kụ iḍighi kụ aZihova amiteom bọ iikolhobian aruw-emhụ phọ?

Aloor ephomhoghiạn phọ odị amhoọgh bọ. Iikolhobian phọ iphẹn phọ reḍighi ghan idị eghunotu phọ aZihova keḍighi esi eephọ, r’oḅoonhomhị ghan oomo araraạr. Torobọ oye siphẹ eghunotu phọ dị radaphạn iikolhobian phọ ralegheri ghan ni oye phọ amhoọgh bọ oḍighi osopha ghan osopha ḅilhẹ r’oḍiemhiom oḍighi ipẹ osopha bọ.—w21.02, opoḍi phọ 3.

Uḍighi ika kụ ewạ bọ dị aKristẹn kogona loor esi araraạr oromom asidom akomputa r’asifon?

Eḍighi maạr dị oye asopha oḍighinhom intanẹt phọ eten phọ ephẹn phọ, pọ ewạ mọ odị aphogh ghan oye kụ asaḅạr ekạr ekpaariọm mem dị odị raaḍikuan r’egu awe siphẹ intanẹt phọ. (1 Tim. 5:13) Ooto r’osooromineen odi kẹn ni, idiphọ olhọgh iinhaghạn dị yira u/kạr ulegheri mọ etu ni inẹ ḅilhẹ r’osighẹ aḍien ookpomhoghan phọ Enhaạn omhuulhom aḍighi.—w21.03, opoḍi phọ 31.

Eeghe kụ iniin ariphigh phọ Enhaạn atụ bọ amheera dị aZizọs kamiinhọm aḅilhẹ amugh?

Eniin ephigh phọ pọ, iwạ mọ okạn Zizọs anyụ oreeny otagharanhạm aJu phọ esi adọl itulughian. (Gal. 3:10, 13) Omhunhenhiom iyạl ephigh phọ pọ, aZihova atughemhị ghan Zizọs ilọ oḍighi phọ odị amhoọgh bọ ghisigh idiphọ Ogbogh Opinyọn Rikiạ ayira. Omhunhenhiom iraạr pọ, aḍuugh phọ aZizọs keḍeenhaan mọ awe kotue ni otọl dọl dị ekpẹ oḍuomolhoghi mem dị osoman ogbagarạ odẹgh ophogh. (Job 1:9-11)—w21.04, ipoḍi pho 16-17.

Nạ kaḍighi ika eḍighi maạr dị ekpạr omhiịn awe epẹ erugh phọ?

Nạ katue ni akparaghạ oghị amem dị bidị kotolhoghụ ilhoghi aruutu. Nạ atue ni anme esi phọ nạ kakị bọ ateẹny bidị. Kparaghạ oḍighinhom enhọn eten, idiphọ ogẹ aḍinyạ.—w21.05, ipoḍi phọ 15-16.

Iphẹn aPọl aḅẹm bọ mọ: “Esi ologh phọ mị mamugh,” remạ ghan eeghe? (Gal. 2:19)

Olhogh phọ aMozis aḍighi idị awe olhegheri iyaạr dị opiomạn aru, kụ eḅilhẹ elhoghonhaạn ḍighaạgh we phọ Izrạl olhegheri aKraist phọ oguan bọ. (Gal. 3:19, 24) Iphẹn phọ iḍighi idị aPọl amheeraam Kraist. Esi oḍighi iduọn phọ, kụ edị aPọl amhugh bọ “esi ologh phọ”, olhogh phọ o/phạm mun nyodị.—w21.06, opoḍi phọ 31.

Ika kụ idị aZihova muphighinhaan iyira eḍeenhaan okparạm ghan?

AZihova rakparaghạm ghan ni ipẹ moofolhomhi bọ ḍien phọ odị, ipẹ ibadị mogbagharạn bọ elhiom itooghị phọ odị, iḅạph abuniin anmụny phọ odị, okpẹ kirokirọ phọ aSetan, imhinhimhiịn abuuḅi arebenhẹ phọ odị, inyaam arighirị odị dị momhuughu, ipẹ abukarạph phọ romiinẹ bọ buphẹ u/piọm bọ, ikpuuroghọm mọ omhạr awe, ḅilhẹ ipẹ ropiemhi bọ olhẹm mọ odị.—w21.07, ipoḍi phọ 9-12.

Ika kụ idị aJosef aphighi emạ eḍeenhaan okparạm?

Odị akparạm ekeeny ooruẹn ḍighaạgh abumor odị. Ipẹ phọ iḍighi idị ogbaanhaạn nyodị okpẹ bịn osighẹ nyodị olhọgh ikoli epẹ Ijipt esi ibadị asiạ.—w21.08, opoḍi phọ 12.

Haggai 2:6-9, 20-22 ighaạph ilọ eeghe odọ ophighemhi?

Areelhe phọ umhegheron ekarạph eten kụ oghị esi oghaạph Omhạr phọ, kuolọ ibadị monhaghạn aani igey phọ. Moọny amem kopighemhi ni reelhe phọ mem dị kopiemhi bọ bidị.—w21.09, ipoḍi phọ 15-19.

Uḍighi ika kụ i/wạ bọ dị kiphẹr iyira siẹn arukumuan oghaạph iiḅi iinhaghạn phọ?

AZihova amiịn ni ikuph phọ ayira, kụ eḅeraạn ni nyodị. Kụ eḍighi maạr dị yira u/dugh obobọ iyira i/phẹr, yira komoọgh ghuḍum k’agee-pọ.—w21.10, ipoḍi phọ 25-26.

Ika kụ idị aLeviticus emhụ phọ 19 ilhoghonhaạn iyira ḍighaạgh odaphạn oroma phọ aḅẹm bọ mọ: “Itọl ghụn dọl aruukuan esi atorobọ iyaạr lọ nyina reḍighi”? (1 Pit. 1:15)

Ekpịgh phọ epẹ phọ eḍighi igẹ dị osighẹ Leviticus 19:2. Emhuoghaạph phọ 19 emiteom ni reḍeenhaan idị yira kotue odaphạn 1 Pita 1:15 siẹn adọl aghuḍum mọ ayira.—w21.12, ipoḍi phọ 3-4.