Anɛ o kane munyuhi nɛ a ngɛ jeha nɛ ɔ Hwɔɔmi Mɔ ɔ mi ɔ saminya lo? Ke jã a, lɛɛ hyɛ kaa o ma nyɛ ma ha sane bimi nɛ ɔmɛ a heto lo:

Yakobo 5:11 tsɔɔ kaa Yehowa “mi mi hi wawɛɛ” nɛ e ji “mɔbɔ nalɔ.” Mɛni nɔ mi mami nɛ munyu nɛ ɔ haa nɛ wa náa?

Wa le kaa Yehowa mɔbɔ nami haa nɛ e kɛ wa he yayamihi keɔ wɔ. Yakobo 5:11 ɔ haa nɛ wa náa nɔ mi mami kaa Yehowa jeɔ mi mi jɔmi mi kɛ yeɔ bua wɔ. E sa nɛ waa kase lɛ.—w21.01, bf. 21.

Mɛni He Je Nɛ Yehowa To Yi Yemi He Blɔ Nya?

Suɔmi lɛ ha nɛ e to blɔ nya nɛ ɔ. Blɔ nya tomi nɛ ɔ haa nɛ tue mi jɔmi hii Yehowa weku ɔ mi, nɛ níhi yaa nɔ saminya ngɛ mi. Weku fɛɛ weku nɛ a kɛ blɔ nya tomi nɛ ɔ tsuɔ ní ɔ mi bimɛ le nɔ nɛ ngɛ he blɔ kaa e mwɔɔ yi mi kpɔhi ngɛ weku ɔ mi, kɛ nɔ nɛ e sa nɛ e hyɛ konɛ a kɛ yi mi kpɔ mwɔmi nɛ ɔmɛ nɛ tsu ní.—w21.02, bf. 3.

Mɛni he je nɛ e sa nɛ Kristofohi nɛ a hyɛ nɛ hi ke a kɛ Intanɛti blɔ nya tomi slɔɔtohi nɛ a kɛ maneɔ sɛ gbi ngɛ ní tsue ɔ?

Ke nɔ ko hla kaa e kɛ Intanɛti blɔ nya tomi nɛ ɔ eko ma tsu ní ɔ, e sa nɛ e hyɛ saminya ngɛ nihi nɛ e kɛ maa bɔ ɔ a he. Se jã peemi he maa wa ke wa piɛɛ sɛ gbi manemi kuu nguahi a he. (1 Tim. 5:13) Jehanɛ hu ɔ, oslaa ngɛ he kaa wa maa gu blɔ nya tomi nɛ ɔmɛ a nɔ kɛ gbɛ munyuhi nɛ wa be nɔ mi mami ngɛ mi ɔ kɛ fiã nɛ e sɛ nɛ waa fia níhi nɛ wa ngɛ juae kɛ wa ní tsumi he adafi ke wa ngɛ Yehowa jami mi níhi pee.—w21.03, bf. 31.

Mɛni yi mi tomi komɛ a he je nɛ Mawu ngmɛ blɔ nɛ Yesu na nɔ́ nɛ e gbo ɔ?

Kekleekle yi mi tomi ji kaa sɛumi nɛ a sɛu Yesu ngɛ sɛumi tso nɔ ɔ ha nɛ e je gbiɛmi ko ngɛ Yuda bi ɔmɛ a nɔ. (Gal. 3:10, 13) Yi mi tomi enyɔne ɔ ji kaa Yehowa ngɛ Yesu tsɔsee kɛ ha he blɔ nɛ e ma ná kaa Osɔfo Nɔkɔtɔma Pe Kulaa a. Nɛ etɛne ɔ ji kaa anɔkuale nɛ Yesu ye kɛ ya si gbenɔ mi ɔ ji odase nɛ tsɔɔ kaa adesahi ma nyɛ maa ye anɔkuale ke a kɛ kahi nɛ a nya wa ngɛ kpee po. (Hiob 1:9-11)—w21.04, bf. 16-17.

Mɛni o ma nyɛ maa pee ke o nɛ nihi ngɛ we mi?

O ma nyɛ maa ya nihi a ngɔ ngɛ be nɛ o susu kaa o maa na mɛ ngɛ we mi. Jehanɛ hu ɔ, o ma nyɛ maa fiɛɛ ngɛ he kpa. O ma nyɛ ma tsake blɔ nɔ nɛ o guɔ kɛ fiɛɛɔ ɔ hɛ mi. O ma nyɛ maa ngma sɛ womi kɛ ha nihi.—w21.05, bf. 15-16.

Mɛni bɔfo Paulo ngɛ tsɔɔe benɛ e de ke: “Kɛ gu mlaa nɔ ɔ, i gbo ngɛ mlaa blɔ fa mi” ɔ? (Gal. 2:19)

Mose Mlaa a ha nɛ e pee heii kaa adesahi nɛ a yi mluku nɛ a peeɔ yayami ɔ be nyɛe maa ye Mlaa a nɔ pɛpɛɛpɛ. Lɔ ɔ he ɔ, Mlaa a tsɔɔ nihi blɔ kɛ ya Kristo ngɔ. (Gal. 3:19, 24) Enɛ ɔ lɛ ha nɛ Paulo he Kristo ye. Kɛ gu jã peemi nɔ ɔ, Paulo “gbo ngɛ mlaa blɔ fa mi”: Mlaa a be e nɔ he wami hu.—w21.06, bf. 31.

Mɛni blɔ nɔ nɛ Yehowa pee si fimi he nɔ hyɛmi nɔ́ kɛ ha wɔ?

Yehowa fĩ si ngɛ níhi fuu a mi. A gbe e biɛ ɔ he guɛ, a te si kɛ wo he blɔ nɛ e ngɛ kaa je ɔ tsuo Nɔ Yelɔ ɔ, e bimɛ ɔmɛ ekomɛ tsɔ atua kɛ si lɛ, Satan tu lakpa munyuhi kɛ si lɛ, e sɔmɔli anɔkualetsɛmɛ nɛ e suɔ mɛ ɔ ngɛ nɔ́ nae, gbenɔ je e huɛmɛ mɛ kɛ je e he, yi mi wami nɛ yiwutsotsɛmɛ kɛ baa adesahi a nɔ, nɛ adesahi ngɛ zugba a puɛe.—w21.07, bf. 9-12.

Mɛni tsui si tomi he nɔ hyɛmi nɔ́ nɛ Yosef pee?

Yosef fĩ si ngɛ ní yayahi nɛ e nyɛminyumu ɔmɛ pee lɛ ɔ tsuo mi. Ní nɛ ɔmɛ nɔuu lɛ ha nɛ a po e nya nɛ a wo lɛ tsu ngɛ Egipt jehahi fuu ɔ nɛ.—w21.08, bf. 12.

Mɛni mimiɛɛmi nɛ a gba kɛ fɔ si ngɛ Hagai 2:6-9, 20-22 ɔ?

Je ma amɛ bui Matsɛ Yemi sɛ gbi ɔ tue, se nihi fuu ba na anɔkuale ɔ. E be kɛe nɛ a ma mimiɛɛ je ma amɛ nɛ a ma kpata a hɛ mi.—w21.09, bf. 15-19.

Mɛni he je nɛ e sɛ nɛ wa kɔni mi nɛ jɔ̃ ngɛ fiɛɛmi ní tsumi ɔ mi?

Yehowa naa wa mɔde bɔmi ɔ, nɛ e bua jɔɔ he. Ke wa kɔni mi jɔ̃ we ɔ, wa ma ná neneene wami.—w21.10, bf. 25-26.

Mɛni blɔ nɔ nɛ Mose Womi Nɛ Ji Etɛ yi 19 ɔ ma nyɛ maa ye bua wɔ nɛ waa kɛ ga womi nɛ ji: “Nyɛɛ pee nihi nɛ a ngɛ klɔuklɔu ngɛ je mi bami tsuo mi” ɔ nɛ tsu ní. (1 Pet. 1:15)

E ma nyɛ maa ba kaa a tsɛ jamɛ a kuku ɔ se kɛ je 3 Mose 19:2 ɔ. Yi 19 ɔ tsɔɔ blɔhi nɛ wa ma nyɛ maa gu nɔ nɛ waa kɛ 1 Petro 1:15 ɔ nɛ tsu ní ngɛ wa si himi mi daa ligbi.—w21.12, bf. 3-4.