Nawˇ heu kʼoꞈ˗euˬ Loꞈ˗eu nymˇgoˇ˗ahˇ yaw muiˬ˗ehˇ ya gui maˬ loˇ? Naˇ haˬ˗eu jeˬ heu deuˬ˗euˬ dawˬ˗ahˇ biꞈ nya miˇ˗a laˬ lehˇ haw ma.

Yaˬkoˆ 5:11 laꞈ kʼoeˇ ahˇ˗eu, Yeˬhawˇbaˬ˗aˬ “gʼoeˇ˗eu gaˬ˗eu jeˬ tiˬ byah ni ahˇ”˗eu meh, “gʼawˬ shaˬ gaˬ˗eu jeˬ” ahˇ˗eu meh lehˇ ehˇ˗eu heu naˇ aˬ jeˬ˗ahˇ bi jah ziꞈ laꞈ˗eu nga?

Yeˬhawˇbaˬ˗aˬ gʼawˬ shaˬ gaˬ˗eu jeˬ ahˇ˗eu miˇ neh aˬ duiˬ˗ahˇ iˬ baˇ pyehˬ nehˬ˗awˇ nui gaˬ ahˇ˗eu laꞈ kʼoeˇ caw ba nehˬ laꞈ˗eu meh. Aˬ dui jiˇ Miˬyehˇ˗ahˇ dzaw geuꞈ paˬ˗ehˇ gʼeh˗eu meh.—w21.01, myaˆ pyawˬ 21.

Yeˬhawˇbaˬ aˬ jeˬ miˇ neh tiˬ gʼaˬ na˗ahˇ uˆ lahˇ˗eu baoˬ biꞈ˗euˬ nga?

Yeˬhawˇbaˬ nui gaˬ ahˇ˗eu miˇ neh tiˬ gʼaˬ na˗ahˇ uˆ lahˇ˗eu baoˬ biꞈ nehˬ˗euˬ meh. Teu naˇ aˬ yawꞈ˗euˬ nymˇ jiˇ˗ahˇ aˬ yawꞈ jeˬ yawꞈ yaw luiˆ luiˆ˗ehˇ bi jaˆ˗awˇ, nui saˇ bi oꞈ˗eu uˬ taꞈ, gaˇ kawˆ˗ahˇ aˬ geu gʼaˬ neh bi ehˇ tsehˆ˗awˇ, noeˬ tsehˆ˗euˬ jeˬ teu˗ahˇ uˬ duˬ yuˇ˗awˇ neh mˇ˗eu aˬ geu gʼaˬ lehˇ jiˇ siˬ nya laˇ ni caw ba nehˬ˗eu meh.—w21.02, myaˆ pyawˬ 3.

Ka li zaˬ deuˬ ehˆ laꞈ kʼoeˇ neh sahˬ boꞈ sha ngeh aˬ jeˬ miˇ neh saˇ tiˇ ya taˬ˗eu nga?

Aˬ dui ehˆ lawˬ muˇ neh sahˬ boꞈ sha ngeh cawˬ tseˇ˗eu yaw kʼaˆ˗ehˇ saˇ tiˇ ya taˬ˗eu meh. Aˇ muˇ muˇ taˬ˗euˬ guˬ˗lmˇ laꞈ kʼoeˇ˗euˬ gʼawˬ mya gʼaˬ sahˬ boꞈ sha naˇ ngehˬ˗ehˇ dzehˬ aˬ dui saˇ tiˇ yaw kʼaˆ˗ehˇ ya taˬ˗eu meh. (1 Tiˆmoˇseˬ 5:13) Teu naˇ aˬ dui˗ahˇ maˬ duˬ maˬ ciˇ˗eu gaˇ kawˆ˗ahˇ bi biˇ kʼawˬ gʼeh nya˗eu uˬ taꞈ, ehˆ heu˗ahˇ zmˬ˗awˇ yawˬ ha˗euˬ gʼaˇ duˬ muiˬ ni mehˇ nmˇ deuˬ˗ahˇ jeˬ gaꞈ jeˬ ka bi mˇ laˇ nya˗eu meh.—w21.03, myaˆ pyawˬ 31.

Yeˬhawˇbaˬ Yeˬsuˇ˗ahˇ aˬ jeˬ miˇ neh naˇ dui dui˗eu laꞈ kʼoeˇ bi shiˇ˗euˬ nga?

Dahˬ beh˗eu jeˬ naˇ, Yuˇdaˆ tsawˇ haˬ deuˬ˗ahˇ yaˬ kʼehˇ yaˬ˗euˬ jeˬ˗ahˇ neh bi dzeuˇ iˇ˗eu gʼaˇ duˬ, Yeˬsuˇ zeuˇ liˬ kʼoeˇ taˆ bi taꞈ tehˬ˗euˬ meh. (Gaˬlaˬtiˆ 3:10, 13) Nyiˬ jeˬ aˬ yawꞈ jeˬ naˇ, Yeˬsuˇ˗ahˇ mehˬ hu paw Piˇ ma bi geuꞈ˗eu lehˇ dzaw nehˬ˗eu gʼaˇ duˬ meh. Smˇ jeˬ aˬ yawꞈ jeˬ naˇ, tsawˇ haˬ deuˬ kʼaˆ dui dui˗eu lawˬ haw laˇ˗eu jeˬ˗ahˇ ya tahˬ puˬ ngeh kʼawꞈ Yeˬhawˇbaˬ˗ahˇ saˇ jaˇ ziꞈ daˆ leꞈ nya meh lehˇ mˇ mawˇ˗eu gʼaˇ duˬ meh. (Yawˇbaˆ 1:9-11)—w21.04, myaˆ pyawˬ 16-17.

Tsaꞈ gaˬ˗iˇ ngeh iˇ kahˇ˗ahˇ jawˇ˗eu ya mawˇ˗eu maˬ awˬ˗eu deuˬ nehˬ˗ehˇ ngehˬ cawˬ nya˗eu gʼaˇ duˬ caw ba nehˬ nya˗eu aˬ jeˬ jeˇ jaˆ˗eu nga?

Aˬ dui tsawˇ haˬ deuˬ iˇ kahˇ˗ahˇ jawˇ˗eu aˇ yamˬ˗ahˇ tsaꞈ gaˬ˗iˇ nya˗awˇ, tsaꞈ gaˬ duˬ laˆ poˆ laˆ paˇ mˇ nya˗eu uˬ taꞈ, tsaꞈ gaˬ jeˬ tsaꞈ gaˬ kawˆ laˆ poˆ laˆ paˇ mˇ nya˗eu meh. Yaw jeˬ ma jeˬ, sahˬ boꞈ boꞈ nehˬ nya meh.—w21.05, myaˆ pyawˬ 15-16.

Gʼaˬ kʼehˇ Pawˇluˆ “Ngaˇ˗aˬ zahˇ dawˬ kʼoꞈ dawˬ˗ahˇ taꞈ leˇ˗awˇ shiˇ gʼaˬ˗euˬ tsawˇ haˬ ma” lehˇ ehˇ˗eu heu naˇ aˬ jeˬ˗ahˇ ehˇ mawꞈ˗eu nga? (Gaˬlaˬtiˆ 2:19)

Zahˇ dawˬ kʼoꞈ dawˬ teu naˇ tsawˇ haˬ deuˬ˗euˬ maˬ byah kuꞈ˗eu jeˬ˗ahˇ bi siˬ laꞈ˗awˇ, Iˇsaˬleˬlaˆ deuˬ˗ahˇ Yeˬsuˇ Ka li jawˇ gaˇ sheuˬ gʼeh nehˬ˗eu meh. (Gaˬlaˬtiˆ 3:19, 24) Zahˇ dawˬ kʼoꞈ dawˬ teu˗euˬ baˬ da neh Pawˇluˆ Yeˬsuˇ˗ahˇ jah laˇ˗euˬ meh. Teu miˇ neh Pawˇluˆ “zahˇ dawˬ kʼoꞈ dawˬ˗ahˇ taꞈ leˇ˗awˇ” shiˇ˗awˇ, zahˇ dawˬ kʼoꞈ dawˬ uˬ moˆ maˬ paˇ jawˇ˗euˬ meh.—w21.06, myaˆ pyawˬ 31.

Yeˬhawˇbaˬ kamˬ daˬ coeˇ˗eu jeˬ nehˬ˗ehˇ taꞈ leˇ˗awˇ aˬ joˆ˗ehˇ mˇ mehˬ yaꞈ˗euˬ nga?

Yeˬhawˇbaˬ aˬ yawꞈ˗euˬ tsawˇ myahˇ bi laˆ cawˆ ngeh maˬ ehˇ, uˆ lahˇ˗eu jeˬ˗ahˇ bi laˆ tsoeˬ ngeh maˬ ehˇ, aˬ yawꞈ˗euˬ zaˬ tiˬ deuˬ na aˬ yawꞈ˗ahˇ puiˬ ngeh maˬ ehˇ, Saˬdaˬ˗euˬ jaˬ myawꞈ mehˇ shuiˇ dawˬ˗ahˇ maˬ ehˇ, aˬ yawꞈ gaˬ˗euˬ gaˇ mˇ zaˬ deuˬ shaˬ zahˬ˗ahˇ ya puˬ ngeh maˬ ehˇ, shiˇ dzeuˇ˗euˬ aˬ yawꞈ gaˬ˗eu cawˬ deuˬ nehˬ˗ehˇ ya gʼawˬ˗iˇ ngeh maˬ ehˇ, tsawˇ haˬ cawˬ cawˬ kʼehˬ˗eu kʼaˆ˗eu jeˬ˗ahˇ maˬ ehˇ, tsawˇ haˬ zaˬ ngehˬ˗ehˇ jawˬ ngehˬ˗ehˇ doeˇ dzehˬ laˇ˗awˇ, Miˬyehˇ neh beh taˬ˗euˬ jeˬ bi laˆ cawˆ ngeh maˬ ehˇ, kamˬ daˬ luꞈ˗eu meh.—w21.07, myaˆ pyawˬ 9-12.

Yoˇsehˆ nui ma mahˇ˗eu jeˬ nehˬ˗ehˇ taꞈ leˇ˗awˇ aˬ joꞈ˗ehˇ mˇ mehˬ yaꞈ˗euˬ nga?

Yoˇsehˆ aˬ yawꞈ˗euˬ aˇ doˆ deuˬ aˬ yawꞈ˗ahˇ maˬ tsaˬ maˬ dawˇ˗eu jeˬ˗ehˇ mˇ nehˬ gaˇ ya daˬ˗euˬ meh. Aˬ yawꞈ maˬ ngeuˇ gaˇ bi dehˬ lehꞈ˗awˇ Iˇjiˇtuˆ miˇ kʼahˬ˗euˬ tawˬ˗ahˇ gʼawˬ mya kʼoꞈ ya uˇ˗euˬ meh.—w21.08, myaˆ pyawˬ 12.

Haˬgaiˇ 2:6-9, 20-22 laꞈ kʼoeˇ aˬ jeˬ˗euˬ ngawˬ zuˆ˗eu gaˇ kawˆ˗ahˇ ngehˬ keuˆ taˬ˗euˬ nga?

Miˇ tsaˬ zaˬ deuˬ aˬ dui Miˬyehˇ Miˇkʼahˬ gaˇ kawˆ tsaꞈ gaˬ gaˇ maˬ ya leˇ kʼawꞈ, yaw myaˬ gʼaˬ naˇ aˬ dui neh tsaꞈ gaˬ˗euˬ gaˇ ha geuꞈ˗eu meh. Ngawˬ zuˆ saˬ saˬ˗eu poˆ naˇ, miˇ tsaˬ zaˬ deuˬ bi laˆ cawˆ ngeh yamˬ˗ahˇ pyeuꞈ meh.—w21.09, myaˆ pyawˬ 15-19.

Aˬ dui tsaꞈ gaˬ˗eu gaˇ mˇ ngeh aˬ jeˬ miˇ neh gʼaˬ byehˆ maˬ ya byehˆ˗eu nga?

Yeˬhawˇbaˬ aˬ dui leh jeh˗awˇ mˇ gaˇ haw mawˇ˗awˇ, aˬ yawꞈ nui kʼahˇ shiˇ˗eu meh. Aˬ dui gʼaˬ byehˆ maˬ byehˆ naˇ mˬ maˬ maˬ byaˆ zaˇ ziˇ dehꞈ˗eu jeˬ za meh.—w21.10, myaˆ pyawˬ 25-26.

Uˬduˬtahˬ˗eu yaw huiˬ 19 aˬ dui˗ahˇ “kʼaˇ mˇ kʼaˇ shaˇ˗eu jeˬ bi muiˬ bi shawˇ˗awˬ” lehˇ ehˇ˗eu dawˬ˗ahˇ mˇ caw nya ni aˬ joˆ˗ehˇ caw ba nehˬ˗eu nga? (1 Beˬtuˆluˆ 1:15)

Gaˬ naˇ yaw nyiˇ teu naˇ Uˬduˬtahˬ˗eu 19:2-ahˇ gʼoe taˬ˗euˬ kʼawꞈ pyeuꞈ nya meh. Uˬduˬtahˬ˗eu yaw huiˬ 19 laꞈ kʼoeˇ aˬ dui˗ahˇ 1 Beˬtuˆluˆ 1:15 laꞈ kʼoeˇ ehˇ taˬ˗euˬ dawˬ˗ahˇ mˇ caw nya ni caw ba nehˬ laꞈ˗eu nui noeˬ nui duˇ gʼawˬ mya ni ahˇ˗eu meh.—w21.12, myaˆ pyawˬ 3-4.