Nyo isomo cuu thiwiwec ma tung’ tung’ m’ubed uwok i Otkur ma Wiw mi oro maeni? Ka eyo, kenen nyo icopo dwoko wang’ penji m’ulubo e:

Yakobo 5:11 ubetego cwinywa nenedi ku wec m’eyero nia Yehova tie Mungu ma jameri?

Wang’eyo nia Yehova tie jakisa, eweko racu mwa yot yot. Buku pa Yakobo 5:11 ubetego cwinywa bende nia mer pare cwale nikonyowa. Wan de mito walub lapor pare.​—w21.01, mba. 21.

Pirang’o Yehova uketho dito ubed unuti?

Mer re m’ucwale niketho dito. Yub maeno uketho juruot pare gibekwo ku kwiyocwiny man lembe ukperere ma ber i kindgi. Kubang’ juruotman m’ubekwo nimakere ku yub maeno, ng’eyo nia ng’a m’utie ku dito mi maku yub ma tokcen man mi ketho juwor yubnegi.​—w21.02, mba. 3.

Pirang’o Jukristu gicikiri nibedo ku wang’gi kinde ma gibetio ku jamtic mir elektronik pi nioro kunoke ninwang’u mesaj?

Ng’atu m’ubetiyo ku jamtic maeno mir elektronik, ucikere nilondo jurimbe m’ebedikere kugi i lembene alonda. Nitimo lembuno tie tek ka dhanu tie dupa i ungu ma wubekiewo mesaj i kindwu i iye. (1 Tim. 5:13) Ariti mange utie pi rwonglembe mi vupo ma copo mew man jucopo caku tiyo ku lembe mi tipo pi kuloka.​—w21.03, mba. 31.

Mungu uweko nia Yesu usendere man etho pi thelembe moko ma kani?

Thelembe mi kwong’o m’uketho juliero Yesu iwi yen, ubino kara jugony Juyahudi kud i the kwong’ ma gibino i iye. (Gal. 3:10, 13) Thelembe mir ario ubino nia, Yehova ubino ponjo Yesu ku rwom mi bedo Jalam ma dit. Man mir adek, gwoko bedoleng’ pa Yesu cil i tho unyutho nia dhanu de copo gwoko bedoleng’ migi kadok kud i amulaic ma tek. (Yob 1:9-11)​—w21.04, mba. 16-17.

Icopo timo ang’o ka ninwang’u dhanu i pacu i tic mi lembanyong’a utie iri tek?

Icopo pimo nicidho i bang’gi i saa mange ma giromo nwang’iri i iye i pacu. Icopo pimo nirweyo bende i kabedo ma tung’ tung’. Man icopo tiyo bende ku bodho mange, calu ve nikiewo barua.​—w21.05, mba. 15-16.

Jakwenda Paulo umito yero ang’o kinde m’ewacu kumae: “Ni lembe mi cik atho ni cik”? (Gal. 2:19)

Cik pa Musa unyutho kamaleng’ nia dhanu tie judubo man etelo wi nyithindho mir Israel nitundo i kum Kristu. (Gal. 3:19, 24) Lembuno uketho Paulo ujolo Kristu. Jolo Kristu uketho Paulo ‘utho ni cik’, m’ebedo ko ngo kendo i the twic mi cik.​—w21.06, mba. 31.

Yehova uweko iwa lapor ma kani mi cirocir?

Yehova uciro acidi ma jucido ko nyinge, jai ma jujai ko i kum dito pare ma malu ngbir, jai mir awiya pare, vupo pa Wonabali, masendi ma jurutic pare gibesendiri ko, tho mi jurimbe, masendi ma dhanu ma reco ubesendo ko jumange, man ng’om ma dhanu ubenyotho.​—w21.07, mba. 9-12.

Lapor ma kani ma ber mi cirocir ma Yosefu uweko iwa?

Eciro lembe ma rac m’umego pare gitimo i kume. Lembuno uketho juloko lembe i wiye mananu man jutwiye i kol i Misiri pi oro ma dupa.​—w21.08, mba. 12.

Hagai 2:6-9, 20-22 uweco iwi kit yengo ng’om ma kani mi lapor?

Thek ubejolo ngo rwonglembe mi Ker, ento dhanu dupa gijolo lemandha. Ceng’ini eni jubiyengo thek pi wang’ ma tokcen kinde ma jubinyothogi.​—w21.09, mba. 15-19.

Pirang’o cwinywa ucikere ngo nitur i tic mwa mi rweyo lembanyong’a?

Yehova ubeneno kero ma wabetimo, man anyong’a ubenege i kumwa. Wabinwang’u kwo ma rondo ku rondo tek waol ungo kunoke wavoc ungo.​—w21.10, mba. 25-26.

Lembe mi Julawi thek 19 ubekonyowa nenedi nitiyo ku juk m’uwacu nia “Wudok leng’ i timo mwu ceke”? (1 Pet. 1:15)

Verse maeno utie ku winjiri ku lembe ma nwang’ere i Lembe mi Julawi 19:2. Thekne mir 19 uweco iwi lembe dupa ma copo konyowa nitiyo ku wec ma 1 Pethro 1:15 uyero i kwo mwa ma kubang’ ceng’.​—w21.12, mba. 3-4.