Baa ni nyoñ ngéda i añ ba Nkum Ntat ba mpam munu nwii unu? Wee ni béñge too ni nla timbhe mambadga mana:

I ngéda kaat Yakôbô 5:11 i nkal le Yéhôva a “yôni ni ñem gwéha” lôñni “konangoo,” kii hala a niiga bés?

Di nyi le kiki Yéhôva a yé konangoo, a yé bebee i nwéhél bés bibéba gwés. Kaat Yakôbô 5:11 i ñunda ki le gwéha i Yéhôva i ntinde nye i hôla bés. Di nlama nigle nye.—w21.01, lipep 21.

Inyuki Yéhôva a bi kit le ngim bôt i bana kunde i ngii bape?

Gwéha yon i bi tinde nye i boñ hala. Bitelbene bi gwon bi mboñ le lihaa li Yéhôva li niñ ikété oda ni nsañ. Hiki mut ikété lihaa nu a noñ bitelbene bi, a nyi njee a nlama yoñ makidik ma nsôk ikété ndap lihaa ni boñ le ba noñ mo.—w21.02, lipep 3.

Inyuki bikristen bi nlama yoñ yihe i ngéda bi ngwélél internet inyu ep tole kôhna manwin?

Ibale mut a nkit le a ngwélél internet inyu kwel ni bôt, a nlama tibil pohol mawanda mé. I nla ba ndutu i boñ hala ibale a nkwel ni ngandak bôt. (1 Timôtéô 5:13) Di nla ki kwo i hiandi hi tôô mimbodok mi miñañ ni i gwélél maada di gwé ni lôk kéé yés i mbuu inyu yéñ moni.—w21.03, lipep 31.

Mambe manjom ma bi tinde Nyambe i nwas le Yésu a nok ndutu a wo?

Njom yada i yé le Yésu a bi nôla inyu begee ndiihe i bon ba Lôk Yuda. (Galatia 3:10, 13) Njom i nyônôs iba i yé le Yéhôva a bé kôôba Yésu i yila prisi keñi. Njom i nyônôs aa i yé le kiki Yésu a bi téñbe ni Yéhôva letee ni nyemb a bi unda le bôt ba binam ba nla téñbe ni Nyambe i ngéda ba mboma manoodana makeñi. (Hiôb 1:9-11)—w21.04, mapep 16-17.

Kii i nla hôla bés ibale di nkoba bé bôt i ngéda di yé likalô?

Di ga boma ngandak bôt ibale di ntéé likalô i ngeñ ba yé mandap. Di nla ki koba bo ibale di nhéñha bahoma di ntéé likalô. Di nla ki noode likeñge lipe, kiki bo i tila bikaat.—w21.05, mapep 15-16.

Kii Paul a bé hoñol i ngéda a bi kal le: “Ni njel mbén, me bi wo inyu mbén”? (Galatia 2:19)

Mbén Môsi i bi tibil unda le di yé bikwéha bi bôt, i bi kena ki Lôk Israel yak Kristô. (Galatia 3:19, 24) Ni njel Mbén, Paul a bi neebe Kristô. Hala a boñ le a “wo inyu Mbén”; Mbén i bééna ha bé kunde i ngii yé.—w21.06, lipep 31.

Lelaa Yéhôva a ñunda bés ndémbél ilam inyu jam li hônba?

Yéhôva a nhônba i ngéda bôt ba nhoo jôl jé mahindi, bôt ba nkolba kunde yé i énél, bon bé bahogi ba ndogop, a nhônba bitembee bi Nsohop, i ngéda a ntehe bagwélél bé a ngwés ba nson njonok, mawanda mé ma nwo, bibéba bi bôt bi ntét bôt bape, ni i ngéda bôt ba binam ba ñôbôs hisi.—w21.07, mapep 9-12.

Kii ndémbél i Yôsep i niiga bés inyu hônba?

A bi nok ndutu ngandak inyu ngitelepsép bilôk binyañ bi bééna ipañ yé. Hala a bi boñ le ba ôm nye nsohi yañga, ba ha ki nye i mok inyu ngandak nwii i Égiptô.—w21.08, lipep 12.

Hagai 2:6-9, 20-22 a mpôdôl imbe nyeñg ’isi?

Ngandak i ntjél emble ñañ nlam, ndi ngandak ipe i nlo i gwélél Yéhôva. Ndék ngéda, Yéhôva a ga nyiñgis biloñ inyu ngélé nsôk a tjé gwo.—w21.09, mapep 15-19.

Inyuki di nlama bé waa añal ñañ nlam?

Yéhôva a ntehe biliya gwés, nson wés u nlémél ki nye. Ibale di nwaa bé añal ñañ nlam, di ga kôhna niñ boga.—w21.10, mapep 25-26.

Lelaa kaat i Lôk Lévi pes 19 i nla hôla bés i nôgôl maéba mana le: “Yilna bapubhaga ikété maboñok manan momasôna”? (1 Pétrô 1:15)

I nene le bibañga bi yé i kaat i Lôk Lévi 19:2, gwon Pétrô a bé sima hana. Kaat Lôk Lévi pes 19 i ñunda bés lelaa di nla noñ maéba ma yé i kaat 1 Pétrô 1:15 i niñ yés.—w21.12, mapep 3-4.