?Yu bin ridimgud ol Wajtaoa blong yia ya? Traem luk sipos yu save ansarem ol kwestin ya:

?Jemes 5:11 i mekem yumi sua long wanem taem i talem se Jehova i “lavem man tumas” mo i gat “sore”?

Yumi save se from we Jehova i gat sore, hem i glad nomo blong fogivim ol rong blong yumi. Mo tu, Jemes 5:11 i mekem yumi sua se hem i glad nomo blong halpem yumi. I gud yumi folem fasin blong hem.—w21.01, pej 21.

?From wanem Jehova i stanemap hed?

Hem i mekem olsem from i lavem yumi. Arenjmen ya i mekem se famle blong Jehova i save wok long pis mo oda. Evri memba blong famle we oli folem arenjmen ya, oli save se hu i mas mekem ol laswan desisen mo hu i mas meksua se oli folem ol desisen ya.—w21.02, pej 3.

?From wanem ol Kristin oli mas lukaotgud taem oli yusum ol mesejing aplikesen?

Sipos wan man i jusum blong yusum ol aplikesen ya, hem i mas lukaotgud taem i jusum ol man we hem i wantem joen wetem olgeta. Be hemia i had taem yu stap long wan bigfala grup. (1 Tim. 5:13) Mo tu i gat denja blong spredem ol ripot we i no gat pruf mo blong yusum ol samting blong sosaeti blong winim mane.—w21.03, pej 31.

?From wanem God i letem Jisas i safa mo i ded?

Faswan risen se Jisas i mas hang long wan pos, blong mekem ol man Jiu oli kam fri long wan spesel panis. (Gal. 3:10, 13) Sekenwan, God i stap trenem Jisas long wok ya blong Hae Pris. Mo nambatri, taem Jisas i holemstrong kasem we i ded, hemia i pruvum se ol man oli save holemstrong long God nating se oli fesem wan strong traem. (Job 1:9-11)—w21.04, pej 16-17.

?Yu save mekem wanem sipos i had blong faenem ol man long wok blong prij?

Yu save go long wan narafala taem we ol man oli stap long haos. Yu save prij long wan defren ples, mo traem wan defren wei, olsem raetem leta.—w21.05, pej 15-16.

?Pol i minim wanem taem hem i se: “Long saed blong loa, mi mi ded finis, loa ya i kilim mi mi ded”? (Gal. 2:19)

Loa blong Moses i soemaot ol nogud samting we ol man oli mekem mo i lidim ol man Isrel oli go long Kraes. (Gal. 3:19, 24) Mo from we Pol i akseptem Kraes, hemia i olsem we ‘loa ya i kilim hem i ded.’ Naoia Loa ya i no moa gat paoa long hem.—w21.06, pej 31.

?Olsem wanem Jehova i soemaot gudfala eksampol long fasin ya blong stanap strong?

Jehova i stanap strong taem oli sakem doti long nem blong hem, oli agensem hae rul blong hem, sam pikinini blong hem oli rebel, Setan i talem ol giaman tok agensem hem, ol gudfala man blong hem oli safa mo oli ded, ol rabis man oli mekem trabol long ol man, mo oli spolem wol.—w21.07, pej 9-12.

?Josef i soemaot olsem wanem se hem i gat longfala tingting?

Hem i stanap strong taem ol brata blong hem oli mekem i nogud long hem. Mo tu, taem oli talem giaman tok long saed blong hem, mo mekem hem i kalabus long Ijip blong plante yia.—w21.08, pej 12.

?Hagae 2:6-9, 20-22 i tokbaot wanem kaen seksek?

Ol nesen oli no glad taem yumi stap talemaot gud nius blong Kingdom, be i pulum plante man oli kam long trutok. I no longtaem Jehova bambae i seksekem ol nesen ya taem i distroem olgeta.—w21.09, pej 15-19.

?From wanem yumi no mas givap long wok blong prij?

Jehova i luk mo i glad long ol traehad blong yumi. Sipos yumi no givap bambae yumi kasem laef we i no save finis.—w21.10, pej 25-26.

?Olsem wanem Levitikas 19 i halpem yumi blong folem advaes ya se: “Yufala i mas tabu long evri fasin blong yufala”? (1 Pita 1:15)

I luk olsem ol tok ya oli kamaot long Levitikas 19:2. Japta 19 i tokbaot plante eksampol we i save halpem yumi blong folem advaes ya blong 1 Pita 1:15 long laef blong yumi evri dei.—w21.12, pej 3-4.