Uwẹ gbarokotọ tie avbe ebe Owa Ọkhẹ ọghe ukpo na ra? Adeghẹ erriọ nọ, hia ne u rhie ewanniẹn ye avbe inọta na:

Ne ebe Jems 5:11 na tie Jehova, Osa ne ọ “vuọn ne itohan kevbe ẹnina,” de ilẹkẹtin nọ rhie ne ima?

Ma rẹnrẹn wẹẹ, rhunmwuda ne Jehova na mwẹ ekhọe itohan, ọ keghi ya orukhọ ọghe ima bọ ima. E Jems 5:11 ya ima rẹn wẹẹ, e Jehova mu egbe ne ọ ya ru iyobọ ne ima. Te ọ khẹke ne ima ya egbe taa e Jehova.​—w21.01, ipapa 21.

Vbọzẹ ne Jehova na ru emwamwa ọghe uhunmwuta?

Ahoẹmwọmwa ne ọ mwẹ ne ima ẹre ọ yae ru ẹre. Emwamwa na ẹre ọ zẹe ighẹ emwi hia khian hẹnẹhẹnẹ vbe ẹgbẹe ọghe Jehova. Emwa ni lele emwamwa ọghe Jehova rẹn wẹẹ, ọmwa rrọọ nọ khẹke nọ gha ta ẹmwẹ nọ sẹ vbe uwu ẹgbẹe.​—w21.02, ipapa 3.

Vbọzẹe nọ na khẹke ne Ivbiotu e Kristi gha begbe, vbe odẹ ne iran ya loo avbe application ughughan na ya gie uhunmwu gie emwa?

Te ọ khẹke ne emwa ni loo application vbenian, gha hannọ emwa ne iran gu mu obọ vbe intanẹt. Ọna wa kakabọ lọghọ na ru vbe group chat ne emwa na bun. (1 Tim 5:13) Ọ khẹke na vbe gha begbe vbe iyẹn nẹi mwẹ ẹzi na miẹn vbe intanẹt kevbe na gha ya etẹn ima khuan igho.​—w21.03, ipapa 31.

Vbọzẹ ne Jehova na kue ne Jesu wu uwu obalọ?

Vbe okaro, te a gha si Jesu rrọ ye erhan na mieke na sẹtin sẹrhiẹn ihẹn nọ ghaa lele Ivbi e Ju khian. (Gal 3:​10, 13) Nogieva, te Jehova ghaa maa ẹre emwi khẹ ọ dee, ne ọ mieke na sẹtin ru iwinna ọghẹe zẹvbe Ogie Ohẹn. Nogieha, te Jehova kue ne Jesu rri oya ọghe ọhanabe ne ọ mieke na sẹtin rhie ẹre ma wẹẹ, emwa nagbọn gha sẹtin mudia ẹse, ọ gha khọnrẹn ne iran werriẹ aro daa ọlọghọmwa nọ wegbe. (Job 1:​9-11)​—w21.04, ipapa 16-17.

Vbọ khẹke ne u ru, deghẹ u na gha kporhu vbe ẹdogbo na i na kẹ miẹn emwa vbe owa?

U sẹtin ya gualọ iran, vbe ẹghẹ ne u rẹnrẹn wẹẹ, u gha ya miẹn iran vbe owa. U sẹtin fi eke ne u na kporhu werriẹ. U sẹtin vbe fi obẹlẹ ne u ya kporhu werriẹ; vbe igiemwi, u sẹtin loo elẹta ya kporhu.​—w21.05, ipapa 15-16.

De emwi ne ukọ e Pọl yae kha vbe ọ khare wẹẹ: “Mẹ wu nẹ, nene Uhi tobọ ẹre, ẹre ọ vbe gbe mwẹ uan”?​— (Gal 2:19)

Te Uhi e Mosis yae dewarorua wẹẹ, emwa orukhọ ẹre emwa nagbọn gele khin; ọ vbe ya iran rẹn wẹẹ Jesu ọre Kristi. (Gal 3:​19, 24) Uhi na ẹre ọ ru iyobọ ne Pọl ya mu ẹtin yan e Kristi. Odẹ vbenian ẹre nene Uhi ya gbe Pọl rua; ọ ma ghi gha rre ototọ Uhi nii.​—w21.06, ipapa 31.

De vbene Jehova ya rhie ẹre ma wẹẹ, ọmwa ne ọ zin egbe emwi ẹre irẹn khin?

A sa ọrho ye eni e Jehova, a gbodan ghee asẹ ne ọ ya khaemwisẹ, ivbi ẹre eso sọtẹ daa ẹre, Esu ta ohoghe khian vbekpa ẹre, eguọmwadia ẹre sẹ usẹ, ọsiọre nibun wulo nẹ, emwa dan ya obọ yẹnyẹn emwa mu otọ, uyinmwẹ esakan gba erhan gba irri, emwa nagbọn vbe mu agbọn na rhia; e Jehova keghi zin egbe ena hia.​—w21.07, ipapa 9-12.

De vbene Josẹf ya rhie ẹre ma wẹẹ, ọmwa ne ọ zin egbe ẹre irẹn khin?

Etiọnrẹn ma ya obọ esi muẹn. A keghi ba ẹre ifiẹzọ ohoghe, a na vbe muẹn ye eghan vbe otọ Igipt vbe ọwara ukpo nibun; ọ keghi zin egbe ena hia.​—w21.08, ipapa 12.

De ẹmwẹ akhasẹ nọ dekaan vbene a khian ya mu ehe hia rueghe nọ rre ebe Hagai 2:​6-9, 20-22?

Agharhemiẹn wẹẹ, emwa nibun i danmwehọ ikporhu iyẹn nọ maan, emwa ni do gha ga e Jehova i re avbiẹ. Vbe nẹi khian ghi kpẹẹ gbe, Osanobua gha mu agbẹnvbo hia rueghe, ọ ghi guọghọ emwa dan hia rua.​—w21.09, ipapa 15-19.

Vbọzẹ nọ ma na khẹke ne egbe ikporhu wọọ ima?

E Jehova gbọyẹmwẹ ye ẹrhiọn ne ima loo. Adeghẹ ima ma na gi egbe wọọ ima, arrọọ etẹbitẹ gha sẹ ima obọ.​—w21.10, ipapa 25-26.

De vbene ebe Lẹvitikọs uhunmwu ẹnrẹn 19 khian ya ru iyobọ ne ima ya lele adia na: “Wa gha re ne ọ huanrẹn vbe emwi ne uwa ru hia”? (1 Pit 1:15)

Ọ khọ wẹẹ, emwi nọ rre ebe Lẹvitikọs 19:2 ẹre Pita ghaa ya unu kaan vbe ọ rhie ibude na ne Ivbiotu e Kristi. Ebe Lẹvitikọs uhunmwu ẹnrẹn 19 ya ima rẹn odẹ eso ne ima khian ya lele ibude nọ rre ebe 1 Pita 1:15.​—w21.12, ipapa 3-4.