Enggo nge bacandu artikel-artikel Sora Ermomo tahun enda? Adi enggo, cuba jawapndu penungkunen-penungkunen enda:

Bas Jakup 5:11 ikataken maka “lembut kel kekelengen” Jahwe ras “mbelin perkuah ateNa.” SipatNa e erban kita tek kerna kai?

Siteh maka Jahwe e perkuah, emaka nggit Ia ngampuni kesalahenta. Kata-kata bas Jakup 5:11 mpetetap ukurta maka nggit Ia nampati kita. Arus siusih Ia.​—w21.01, hal. 21.

Engkai maka iban Jahwe pengaturen kerna wewenang?

Iban Jahwe pengaturen kerna wewenang perban keleng ateNa kita. Perban lit pengaturen e, kerina si lit i bas keluarga Jahwe banci ratur ras dame. Tiap anggota keluarga si ngikutken pengaturen e, tehna ise si arus erban keputusen ras tehna ise si arus ndalankenca.​—w21.02, hal. 3.

Engkai maka kalak Kristen perlu hati-hati sanga nggunaken aplikasi guna ngirim pesan singkat?

Adi lit kalak si pakena atena aplikasi si bage, arus ia hati-hati sanga milih teman. Memang mesera ngelakoken si e sanga ngerana-ngerana bas grup chatting si enterem kel anggotana. (1 Tim. 5:13) Arus ka kita hati-hati gelah ula sipebelang laporen si lenga tentu benar ras ula simanpaatken turang seninata guna ndatken untung.​—w21.03, hal. 31.

Kai saja alasenna maka ipediat Dibata Jesus ngenanami kiniseran?

Alasen si pertama, arus Jesus igantung i tiang guna mbebasken kalak Jahudi arah sumpah nari. (Gal. 3:10, 13) Si peduaken, guna nikapken Jesus jadi imam si mbelin man banta. Janah si peteluken, guna mbuktiken maka banci nge manusia tetap setia man Dibata amin pe ngadapi percuban si seh kel beratna. (Jop 1:9-11)—w21.04, hal. 16-17.

Kai si banci silakoken adi mesera siakap njumpai kalak sanga erberita?

Usahakenlah njumpai kalak bas waktu si biasana kalak enggo i rumah. Cubaken ka erberita bas erbage-bage ingan. Banci ka cubakenndu cara erberita si deban, misalna nulis surat.​—w21.05, hal. 15-16.

Kai maksud Paulus sanga ikatakenna, “Undang-undang e si erbanca aku mate bas undang-undang”? (Gal. 2:19)

Perban lit Undang-Undang Musa, banci iteh manusia maka ia la sempurna. Undang-Undang e pe negu-negu kalak Israel ku Kristus. (Gal. 3:19, 24) Enda erban Paulus erkiniteken man Kristus. Alu bage, Paulus “mate bas undang-undang” eme ibebasken arah undang-undang e.​—w21.06, hal. 31.

Jahwe kap usihen si mehuli bas ncidahken sipat megenggeng. Kai saja kin si arus adapiNa?

Jahwe megenggeng sanga gelarNa icedai, melala si nentang pemerentahenNa, piga-piga anakNa mberontak, Iblis lalap erbual, umat si ikelengiNa ngenanami kesusahen, melala teman-temanNa si enggo mate, melala kalak si susah perban kalak jahat, manusia reh jahatna, ras ceda ban manusia ciptanNa.​—w21.07, hal. 9-12.

Engkai maka Jusup jadi usihen bas ncidahken sipat sabar?

Megenggeng ia ngadapi perbahanen si la adil arah abang-abangna. Bas pudi wari, ipitnah ia ras ipenjaraken i Mesir ertahun-tahun dekahna.​—w21.08, hal. 12.

Kai nge maksudna si iugur-ugur bas Hagai 2:6-9, 20-22?

Melala bangsa-bangsa la senang nandangi pendahin erberita si enggo silakoken, tapi melala kalak si nggit ngaloken kebenaren. Ntisik nari, iugur-ugur me bangsa-bangsa sanga kalak e ikernepken.​—w21.09, hal. 15-19.

Engkai maka la kita nyerah bas ngelakoken pelayanenta?

Meriah ukur Jahwe ngidah kerja kerasta. Adi la kita nyerah, sialoken pagi kegeluhen si rasa lalap.​—w21.10, hal. 25-26.

Uga Imamat pasal 19 nampati kita gelah ‘badia bas kerina perbahanenta’? (1 Pet. 1:15)

Banci saja ayat enda ikutip arah Imamat 19:2. Bas Imamat pasal 19, melala contoh si njelasken uga carana ndalanken kata-kata si lit bas 1 Petrus 1:15 bas geluhta tiap wari.​—w21.12, hal. 3-4.