Yoo don reed aala Di Wachtowa magazeen fi dis yaa? Wel, mek wi si if yu ku ansa dehnya kweschan:

How di skripcha eena Jaymz 5:11 mek wi noa fi shoar dat Jehoava “ful a mersi ahn kompashan”?

Wi noa dat wen Jehoava shoa mersi tuwaadz wi, ih fergiv wi mistayk dehn weh wi mek. Jaymz 5:11 shoa wi dat Jehoava redi fi help wi bikaaz ih ful a kompashan. Mek wi kapi Jehoava egzampl a mersi ahn kompashan.—w21.01, payj 21.

Wai Jehoava giv atariti tu adaz?

Hihn mi giv atariti tu adaz bikaaz ih lov ih famili. Dis araynjment alow ih laayal famili fi fongshan eena wahn peesful an aadali way. Eech famili memba weh werk lang wid dis araynjment noa hoo fi mek di fainal disizhan eena eni sichuwayshan er hoo fi du weh dehn disaid fi du.—w21.02, payj 3.

Wai Kristyanz haftu bee kyaaful wen dehn yooz eni mesij ap?

If wahn persn chooz fi yooz dehndeh ap, ih need fi mek shoar ih noa hoo ih di spen taim wid. Dat haad fi du, espeshali if da wahn big groop. (1 Tim. 5:13) Dehn ga ada daynja tu bikaaz peepl ku paas aan infamayshan weh noh chroo ahn dehn ku yooz wi bradaz ahn sistaz kantak infamayshan fi bai ahn sel.—w21.03, payj 31.

Wat da sohn reezn wai Gaad mi alow Jeezas fi sofa ahn ded?

Wan reezn da bikaaz Jeezas mi haftu ded pahn wahn stayk fi set di Jooz free fahn wahn kers. (Gal. 3:10, 13) Di sekant reezn da bikaaz Jehoava mi-di chrayn Jeezas fi wen ih mi wahn bee fi wee Hai Prees eena di fyoocha. Ahn di terd reezn da bikaaz Jeezas det proov dat hyoomanz ku stay faytful eevn if dehn di goh chroo wahn haad tes. (Job 1:9-11)—w21.04, payj 16-17.

Weh yu ku du if ih haad fi reech peepl eena di minischri?

Yu ku preech joorin wahn taim wen dehn moa laikli fi deh hoam. Yu ku chrai preech da wahn difrent loakayshan. Ahn yu ku chrai fain wahn difrent way fi preech, laik rait letaz.—w21.05, payj 15-16.

Weh di apasl Paal mi meen wen ih seh: “Ai ded az faar az di Laa kansaan”? (Gal. 2:19)

Moaziz Laa mek it klyaa dat hyoomanz sinful ahn noh perfek, an ih help di peepl a Izrel fi ga fayt eena Jeezas Krais. (Gal. 3:19, 24) Dis mi help Paal fi aksep Jeezas Krais. Soh den, Paal mi “ded az faar az di Laa kansaan.” Di Laa neva ga no powa oava hihn nohmoh.—w21.06, payj 31.

How Jehoava da di bes egzampl a sombadi weh indyoar?

Jehoava indyoar lata tingz. Fi egzampl, Jehoava naym noh geh di aana weh ih dizerv, lata peepl deh gens Gaad ahn fi hihn roolaship, som a ih chiljren ton gens ahn, Saytan lai dehn, di sofarin a ih faytful servants, ih frenz weh don ded, di wikidnis a bad peepl, ahn hyoomanz di dischrai di ert weh Gaad kriyayt.—w21.07, payj 9-12.

How Joazef mi set wahn gud egzampl wen ih kohn tu payshens?

Fi hihn breda dehn mi chreet ahn bad. Wen Joazef mi deh da Eejip, dehn mi akyooz ahn fi du sohnting weh ih neva du an ih mi gaan da jayl fi lata yaaz.—w21.08, payj 12.

Weh Haggai 2:6-9, 20-22 mi seh wahn hapm eena fi wee taim?

Di nayshan dehn rijek di gud nyooz bowt Gaad Kingdom, bot wahn lata peepl aksep di mesij. Soon, Jehoava wahn shayk di nayshan dehn fi di laas taim, ahn dat wahn bee fi dehn dischrokshan.—w21.09, payj 15-19.

Wai wi noh fi giv op eena wi minischri?

Jehoava pay atenshan tu how haad wi werk, an ih hapi wid wi. If wi noh giv op er taiyad owt, Jehoava wahn gi wi evalastin laif.—w21.10, payj 25-26.

How Leviticus chapta 19 ku help wi aplai di kongsl: “Unu fi bee hoali eena evriting weh unu du”? (1 Peet. 1:15)

Peeta praabli di koat Leviticus 19:2. Chapta 19 ga lata egzampl a how wi ku aplai 1 Peeta 1:15 eena wi evriday laif.—w21.12, payj 3-4.