Aliiha humaaru san sun Garüdia Awisahatu to lánina irumu le? Ariha huméi anhein gayara lubéi hóunabuni álügüdahani burí le:

Ida liña lachoururuni Santiagu 5:11 woun lau lariñagun “hínsiñehabu” lan Heowá ani “gudemehabu ligía”?

Subudi wamuti gudemehabu lan Heowá, ligía aranseñu liña lubéi lun feruduna lani wachara.Chóurugüda lumuti Santiagu 5:11 woun aranseñu liña lan Heowá lau ínsiñehabuni lun líderaguniwa. Buídubei wadüga ánhawa asigirei lani hénpulu (w21.01, páhina 21).

Ka uagu líchiga Heowá ubafu houn gürigia?

Ladügünbalin le, ladüga línsiñehabu. Seremei adundehani le, buiti léibugun sun katei hadan lisaanigu Heowá adüga hamuti katei lidan darangilaü sin chagaguaü. Kada aban hádangiñe tílana muna ha inebebei aransehani le houn subudi hamuti ka lan laubei lagumuhóun dimurei lidan luáguti lanuadirún somu katei luma kaba lan agumesera adügei (w21.02, páhina 3).

Ka uagu lunti lubéi duari wamá wagía kristiánugu dan le wabürühan houn gürigia luéigiñe gágamuru?

Anhein anúadira aban gürigia lun layusuruni katei le lun labürühan luéigiñe gágamuru lunti lóunigiruni ka lan uma lóundaragua. Hénrenguti ladügüniwa katei le dan le gibe hamá lidan aba sétanu le ñéingiñe lubéi lóunahoun ariñahani (1 Tim. 5:13). Denchati giñe katei le ladüga gayaraati ladügün lun laburuchagun ariñahani le machourunti luma burí ladügǘn bísinisi hama íbirigu lun lagañeirun seinsu hádangiñe (w21.03, páhina 31).

Ka san uagu lígira Bungiu lun lasufurirun Hesusu ani hilá ligía?

Lidan furumiñeti lúgaaru, lau ládarawaguniwa Hesusu luagu aban wagabu, ladügüña meha lun gayara lan hesefurun huríu lídangiñe íñarawaguni (Gal. 3:10, 13). Lidan libiaman lúgaaru, laransehañein meha Heowá Hesusu lun fádiri lan le íñugutimabei. Ani lidan lǘrüwan lúgaaru, arufudati lúaragun Hesusu gayara lan úaragua hamá gürigia íbini dan le hasufurirun óuchawaguni le dereti (Hob. 1:9-11) (w21.04, páhina 16 luma 17).

Ka san gayaraabei wadügüni anhein hénrengu lubéi lun wadariruniña gürigia hábiñe?

Gayaraati wapurichihan lidan burí oura le ídanbei gayara lan wadariruniña gürigia hábiñe. Gayaraati giñe wouchun ámuñegueinarügü ligaburi apurichihani lidan ámuñegueinarügü fulasu. Gayaraabei wasansiruni ligaburi wapurichihan, lau wabürühan gárada (w21.05, páhina 15 luma 16).

Ka san labusenrunbei apostolu Pábulu lariñagun dan le lariñagubei: “Luéigiñe lilurudun Moisesi, hilaadina lun lúrudu”? (Gal. 2:19).

Adügati lilurudun Moisesi lun larihin hachara o hafigoun gürigia ani adundeha lumutiña ísüraelina lun Kristu (Gal. 3:19, 24). Adügati le lun lánharun Pábulu lun Hesusu. Ítara liña “hilañu lan lun lúrudu” ani mabafuhali lúrudu ligía ni murusun luagu (w21.06, páhina 31).

Ka hénpulu lánina awanduni líchugubei Heowá woun?

Awandaali Heowá lanagawagun liri, liricha lun larúeihan, hebedaagun hádangiñe lisaanigu, liyeeni Mafia, hasufurirun lubúeingu, hóunwegun lumadagu, wuribani le hadügübei gürigia wuribatiña houn gürigia háledigu lúmati hagünrinchaguni katei le ladügübei (w21.07, páhina 9 darí 12).

Ka wafurendeirubei lídangiñe gurasu le larufudubei Hosé?

Awanda lumuti Hosé marichaü le hadügübei líbugañanu lun. Ladüga katei le iridahóuati luagu duru le mama ladüga, ani dáüwati luagu saragu irumu Ehiptu (w21.08, páhina 12).

Ka adadagaruni uágubei layanuhóua tidan liliburun Ahéu 2:6-9, 20-22?

Wuribati hóunabun néchanigu lun uganu luáguti larúeihan Bungiu, gama lumoun saragu gürigia achawaha laaña inarüni le. Yarafa madise hasufuriruba néchanigu aba ánhingichuni danme le hagünrinchawagun (w21.09, páhina 15 darí 19).

Ka uagu moun lumuti lubéi lábürühan warüna lidan wapurichihan o lidan wani ministeriu?

Ariha lumuti Heowá áfaaguni le wadügübei ani gúndaati lau. Anhein mabuchadun wawagu ani mábürühan ligíame warüna, wibihiba ibagari magumuchaditi (w21.10, páhina 25 luma 26).

Ida liña tíderaguniwa haliburun Fádirigu 19 lun wasigiruni adundehani le: “Abagarida humá aban ibagari sánduti le gumuti”? (1 Fe. 1:15).

Másiñati lídangiñe lan Fádirigu 19:2 lasagarúa bérusu le. Ruti kapítulu 19 saragu hénpulu luáguti ida luba lan wayusuruni 1 Fe. 1:15 lidan wabagari (w21.12, páhina 3 luma 4).