¿Ask’in kiwäch ri wuj Ri Chajinel ri ye alenäq pä chpan re junaʼ reʼ? Tatzʼetaʼ we yakowin yeʼaqʼalajsaj re kʼutunïk reʼ:

Rma Santiago 5:11 nuʼij chë Jehová «kan kowan nqrajoʼ» chqä «kan nupoqonaj qawäch», ¿achkë ütz nqayaʼ chwäch qan?

Qataman chë Jehová, rma kan nupoqonaj qawäch, ma nukʼewaj ta nuküy qamak. Santiago 5:11 nuʼij chqä chë ryä kan xtqrtoʼ pä rma kowan nqrajoʼ. Röj ütz nqakʼän qanaʼoj chrij (w21.01, ruxaq 21).

¿Achkë rma Jehová xyaʼ qa uchqʼaʼ pa kiqʼaʼ ri nkʼaj chik?

Ryä xuʼän riʼ rma kowan nqrajoʼ. Chqä ya riʼ rubʼanon chë ru-familia Jehová majun ta chʼaʼoj chkiwäch chqä kan pa rubʼeyal nbʼan ronojel chpan. Chkipan ri familias, ri yesmajin re naʼoj reʼ, kitaman achkë nbʼin ri achkë kʼo chë nbʼan chqä achkë xtbʼanö ri nkʼatzin nbʼan (w21.02, ruxaq 3).

¿Achkë rma röj, ri cristianos, nkʼatzin nqatzʼët na achkë rubʼanik yeqaksaj ri aplicaciones ri yekitäq mensajes?

We jun qachʼalal nuksaj re aplicaciones reʼ, naʼäy nkʼatzin nutzʼët achoq kikʼë xttzjon wä äl. Ya riʼ kan más kʼayewal xtuʼän we xttïtzʼ riʼ chpan jun grupo ri akuchï kan ye kʼïy winäq nkitaqalaʼ mensajes chkiwäch (1 Tim. 5:13). Chqä re aplicaciones reʼ rkʼë jbʼaʼ nkiʼän chë nqesaj rutzjol jun ri ma bʼin ta chë kantzij xbʼanatäj o rkʼë jbʼaʼ nkiʼän chë nqajoʼ nqbʼeyomär chkij ri qachʼalal pa congregación (w21.03, ruxaq 31).

¿Achkë jojun rma chë Jehová xyaʼ qʼij chë Jesús kowan xtäj poqän chqä xkamsäx äl?

Naʼäy, rma xtzeqebʼäx chwäch jun cheʼ, Jesús xkowin xeruköl ri judíos chwäch jun mamaʼ kʼayewal (Gál. 3:10, 13). Rukaʼn, Jehová xtjoj apü Jesús rchë nbʼeʼok Sumo Sacerdote. Y, rox, ri xuʼän Jesús xkʼüt chë röj nqkowin ma nqaqʼäj ta rutzij Jehová tapeʼ nyaʼöx nmaʼq taq kʼayewal pa qawiʼ (Job 1:9-11) (w21.04, ruxaq 16 y 17).

¿Achkë ütz nqaʼän we ma yeqïl ta ri winäq chkachoch taq nqabʼetzjoj le Biblia?

Röj ütz nqabʼetzjoj le Biblia chkipan ri horas ri rkʼë jbʼaʼ más ye kʼo ri winäq chkachoch. O rkʼë jbʼaʼ ütz nqbʼä jukʼan chik rchë nqabʼetzjoj le Biblia. Chqä ütz nqajäl rubʼanik nqatzjoj le Biblia, achiʼel nqatzʼibʼaj cartas (w21.05, ruxaq 15 y 16).

¿Achkë xrajoʼ xuʼij ri apóstol Pablo taq xuʼij: «Rma ri pixaʼ, rïn achiʼel ta yïn kamnäq chik chuxeʼ ri pixaʼ»? (Gál. 2:19).

Ri Rupixaʼ Moisés xkʼüt chë röj, ri winäq, xa yoj ajmakiʼ chqä xerukʼwaj ri israelitas kʼa rkʼë ri Cristo (Gál. 3:19, 24). Ri Pixaʼ riʼ xuʼän chqä chë Pablo xkʼuqbʼaʼ rukʼuʼx chrij Jesús. Ya riʼ ntel chë tzij taq ryä xuʼij chë achiʼel ta ya «kamnäq chik chuxeʼ ri pixaʼ», chqä kikʼë ri tzij riʼ ryä xkʼüt chë ma kʼo ta wä chik chuxeʼ Rupixaʼ Moisés (w21.06, ruxaq 31).

¿Achkë rukochʼon pä Jehová?

Jehová rukochʼon pä chë kitzʼilbʼisan rubʼiʼ, chë ye kʼïy ma nkajoʼ ta ryä nixta Ruqʼatbʼäl Tzij, chë jojun ralkʼwal ma xkinmaj ta chik rutzij, chë Satanás yerubʼin tzʼukün taq tzij chrij, chë ri rusamajelaʼ nkitäj poqän, chë nutzʼët taq yekäm äl rachiʼil, chë ri itzel taq winäq yekitzʼlaʼ ri nkʼaj chik chqä chë ri winäq najin nkitzʼlaʼ le Ruwachʼulew ri xuʼän qa ryä (w21.07, ruxaq 9 kʼa 12).

¿Achkë rubʼanik xkʼüt José chë kan xkochʼon?

José xköchʼ jontir ri itzelal xkiʼän runimal che rä. Ya riʼ xuʼän chë xekʼwäx äl Egipto, xtzʼuk tzij chrij chqä kan kʼïy junaʼ xyaʼöx pacheʼ (w21.08, ruxaq 12).

¿Achkë nuʼij chpan Ageo 2:6 kʼa 9 chqä 20 kʼa 22 chë xtbʼanatäj pa qaqʼij komä?

Dios xkerusloj ri tinamït, ntel chë tzij, chë kan konojel bʼaʼ chkë ri winäq ma ütz ta xtkikʼoxaj ri utziläj taq rutzjol chrij Ruqʼatbʼäl Tzij Dios, ye kʼa kan ye kʼïy chqä xkeʼok pä chpan rutinamit Jehová. Xa jbʼaʼ chik apü Dios xtsloj le Ruwachʼulew chqä ri kaj, ntel chë tzij, xtchüp kiwäch ri itzel taq winäq (w21.09, ruxaq 15 kʼa 19).

¿Achkë rma kʼo chë ma nikʼo ta qakʼuʼx chbʼanik rusamaj Jehová?

Jehová nutzʼët taq röj nqatäj qaqʼij chbʼanik rusamaj y kan kiʼ rukʼuʼx nuʼän qkʼë rma nqaʼän riʼ. We ma xtqkos ta chqä ma xtikʼo ta qakʼuʼx chbʼanik rusamaj, ryä xtyaʼ qakʼaslemal ri majun bʼëy xtkʼis ta (w21.10, ruxaq 25 y 26).

¿Achkë rubʼanik nqrtoʼ Levítico 19 rchë nqasmajij re naʼoj reʼ: «Kixok loqʼoläj rkʼë jontir ri ibʼanobʼal yeʼiʼän»? (1 Ped. 1:15).

Rkʼë jbʼaʼ re versículo reʼ chpan Levítico 19:2 xesäx wä pä. Ri capítulo 19 nukʼüt kʼïy rubʼanik rchë röj nqasmajij 1 Pedro 1:15 chpan qakʼaslemal (w21.12, ruxaq 3 y 4).