Ka fen álleaniéchú meinisin ekkewe Leenien Mas lón ei ier? Ika ewer, ppii ika ka tongeni pélúweni ekkeei kapas eis:

Met James 5:11 a alúkúlúkú ngenikich atun a erá pwe Jiowa “a uren kirikiröch” me úméúméch?

Sia silei pwe pokiten án Jiowa úméúméch, iwe a tipemecheres le omusaaló ach kewe tipis. James 5:11 a alúkúlúkú ngenikich pwe lón an tong a mochen álisikich. Iwe sia pwal tongeni áppirú i.​—w21.01, p. 21.

Pwata Jiowa a akkóta ewe kókkótun nemenem?

A akkóta pokiten an tong. Ei kókkót a atufichi kókkótéchún me kinamween an we famili mi tuppwél. Eú me eú famili mi fiti ena kókkót epwe silei ika ié epwe wisen apwúngaló mettóch, me ié epwe wisen mesemes wóón met ekkena a fen pwúngúló.​—w21.02, p. 3.

Pwata Chón Kraist repwe túmúnúéch atun ra áeá ekkewe message app?

Ika emén a filatá le áeá ekkena esin app, a lamot an epwe túmúnú kefilin chiechian. A weires an epwe féri ena ika a fiti ekkewe chat group mi chómmóng chón lón. (1 Tim. 5:13) Pwal eú efeiengawan, aramas ra tongeni áeá le achéúfetálei pwóróus ese ffat, me áeá pwe repwe amémé, kamé, me advertise pisek ngeni pwiich kewe.​—w21.03, p. 31.

Ikkefa ekkóch popun Kot a mutatá án Jesus epwe kúna riáfféú me máló?

Áeúin, a lamot án Jesus epwe eitiwetá wóón efóch iráán ninni pwe epwe angasaaló ekkewe chón Jus seni eú anúmamaú. (Kal. 3:10, 13) Oruuan, Jiowa a ammólnatá Jesus fán iten wisan we emén Souasor mi Lap. Me aúlúngátin, án Jesus tuppwél tori máló a ánnetatá pwe aramas ra tongeni pwal amwéchú ar tuppwél inaamwo ika ra kúna watteen sóssót. (Hiop 1:9-11)​—w21.04, p. 16-17.

Met ka tongeni féri ika a weires óm kopwe chuuri aramas lón ewe angangen afalafal?

Ka tongeni sótun chuuriir lón ekkewe atun eli repwe nóm lón imwer kewe. Ka pwal tongeni sótuni le afalafal lón sókkopaten leeni. Me ka pwal tongeni sótuni ekkóch ekkewe napanapen alen afalafal, áwewe chék ren mak taropwe.​—w21.05, p. 15-16.

Met weween alon aposel Paulus ei lupwen a erá: “Ren pwüngün ekewe Allük ngang üa fen mäla”? (Kal. 2:19)

Ewe Allúkún Moses a affata pwe aramas rese unuséch rese tongeni unusen álleasochisi ewe Allúk, me a emmweni ekkewe chón Israel ngeni Kraist. (Kal. 3:19, 24) Ina popun, Paulus a etiwa Kraist ren ena Allúk, ina minne a ‘mäla ngeni ewe Allük,’ ese chúen nóm fán nemenian.​—w21.06, p. 31.

Ifa usun Jiowa a isetiw ngenikich eú leenien áppirú usun likiitú?

Jiowa a likiitú fán ewe itengaw mi weneiti itan we, ewe féfférún ú ngeni an pwúngún nemenem, án ekkóch néún kewe ú ngeni, án Satan kakkapas chofona, riáfféún néún kewe chón angang, án chiechian kewe má seni, án aramas mi ngaw eriáfféwú aramas, me án aramas angawaló férian kewe.​—w21.07, p. 9-12.

Ifa usun Josef a isetiw eú leenien áppirú mi múrinné usun mosonottam?

A likiitú fán án pwiin kewe kirikiringaw ngeni. Ena mettóch a efisi an epwe nóm Isip, ikewe emén a tipimwáál ngeni me ie, iwe a kóturulong lón kalapus ren fite ier.​—w21.08, p. 12.

Ifa ewe angangen áchchech Akai 2:6-9, 20-22 a oesini usun?

Chón ekkewe mwú rese etiwa pwóróusen ewe Mwúún Kot sia afalafala usun, nge chómmóng aramas ra fen etiwa ena pwóróus mi enlet. Ekiseló chék Kot epwele áchechcha mwúún fénúfan lupwen epwe nireló.​—w21.09, p. 15-19.

Pwata a lamot ach sisap achanú lón ach fiffiti ewe angangen afalafal?

Jiowa a áfánni ach achocho, me a pwapwa. Ika sise achanú, sipwe kúna manaw esemuch.​—w21.10, p. 25-26.

Ifa usun Lifitikos sópwun 19 a álisikich le apwénúetá ei kapasen pesepes: “Oupwe pin lon mettoch meinisin mine oua föri”? (1 Pet. 1:15)

Ese mwáál ena wokisin a aloni alon Lifitikos 19:2. Sópwun 19 a áiti ngenikich chómmóng mettóch ren ifa usun sipwe tongeni apwénúetá 1 Petrus 1:15 lón manawach iteiten rán.​—w21.12, p. 3-4.