Shina watanga mitwe ya Tuposhi eswe a mwaka uno? Tala nyi muhasa kukumbulula yihula yino:

Mukanda wa Tiangu 5:11, unambe ngwo, Yehova “wa too ni vumbi ni keke.” Shindakenyo yika maliji wano anatwehe?

Mumu lia keke yenyi, Yehova kanazange chinji kukonekena shili yetu. Nawa Tiangu 5:11, unatwehe shindakenyo ngwo, iye kakulihana hanga atukwase. Tunafupiwa kwimbulula chilweza chenyi.—w21.01, lifwo 21.

Mumu liaka Yehova asele shimbi ya wata?

Mumu iye kakutuzanga. Wata wakukwasa hanga yuma yeswe yende kanawa mu usoko wa Yehova ni kulita ni ululi. Nyi te kukushi wata kachi te kukushi mutu yoze makwata chiyulo cha kasula hanga akwo achikaule.—w21.02, Lifwo 3.

Mumu liaka akwa-Kristu atamba kukanyama ha kuzachisa ma aplicativo akutumina ni kutambula mesage?

Mweswe mazanga kuzachisa aplicativo ya kutumina ni kutambula mesage, katamba kusakula kanawa atu waze mahanjika no, chipi-chipi nyi chizavu chize chinatuma mesage chili chinene. (1 Timo. 5:13) Chikwo nawa, twatamba kukeya hanga tuhone kulumba sango hanji kulanjisa yuma kuli mandumbu jetu.—w21.03, lifwo 31.

Yikuma yika yimwe yize yatwalile Zambi eche Yesu amone lamba ni kufwa?

Chitangu, Yesu katambile kufwila ha mutondo wa lamba hanga atusule A-Yunda ku limwe shingo. (Ngala. 3:10, 13) Chamuchiali, Yehova te kanafumbu Yesu ha chiteli chize mapwa nacho kulutwe ngwe Sasendote wa Lutwe. Chamuchitatu, amu Yesu ashishikile ndo ku kufwa kasolwele ngwenyi, atu mahasa kushishika kuli Zambi nyi kanapalika mu yipikalo yinji. (Yombi 1:9-11)—w21.04, mafwo 16-17.

Yika muyihasa kutukwasa mba twambujole kuli atu waze chapwa chikalu kwawana ku mazuwo?

Mutuhasa kwambujola ha maola waze mutuwana atu ku mazuwo, hanji kwambujola ku yihela yalisa. Mutuhasa kwambujola nawa mu majila alisa, ngwe kusonekena mikanda.—w21.05, mafwo 15-16.

Yika Paulu ambile kwamba muze ambile ngwenyi: “Ami ku shimbi nafwile ku shimbi?” (Ngala. 2:19)

Shimbi ya Mose yapwile ni kusolola zwalala ngwo, atu kali yihenge nawa ngwo te kanafupiwa ukuule. Shimbi yacho yapwile ni kutwala nawa atu kuli Kristu. (Ngala. 3:19, 24) Chino chatwalile Paulu kutayiza Kristu. Mumu lia chino, Paulu ‘yafwa ku shimbi,’ hanji ngwetu, shimbi te kuyishi nawa ni chiyulo hali iye.—w21.06, lifwo 31.

Kuchi Yehova akutwaha chilweza chipema cha kunyongonona?

Yehova kananungu ni kunyongonona chipwe ngwe hanapihisa lufuma wa jina lienyi, kulimika ni Wanangana wenyi, kupianguka cha ana jenyi amwe, mahuza waze Ndiapu akumwanga, lamba lize tuvumbi twenyi akumona, kufwisa masepa jenyi, yingalwe waze akumwesa atu lamba, kupihia cha yitanga ya atu hano hashi ni kupihisa cha yitangiwa yenyi hano hashi.—w21.07, mafwo 9-12.

Chilweza chika cha uhumikizo chize Yosefwe asolwele?

Iye kanyongonwene chipwe ngwe mandumbu jenyi kamulingile yuma yipi. Kamulamikijile yuma yize kakalingile, chocho yamusa mu zuwo lia ususu mu Engitu ha yimwe miaka.—w21.08, lifwo 12.

Kunyika chika aprofetezele ha Hagaia 2:6-9, 20-22?

Mavungu keshi kutayiza sango lipema lia Wanangana. Alioze atu anji kanatayiza umwenemwene. Kashika kwasala hakehe, mavungu makanyika muze kakaanongesa.—w21.09, mafwo 15-19.

Mumu liaka kutushi kwecha kwambujola?

Yehova kakulihulikila ha tachi jize twakusa mu mulimo wa kwambujola nawa chino chakumuvwisa kuwaha. Nyi twanyongonona, mutukazuka mwono wa mutolo.—w21.10, mafwo 25-26.

Kuchi Ulevi kapitulu 19, unatukwase kukaula chiyulo chino: “Pwenu asandu ha kwenda chenu cheswe”? (1 Petu. 1:15)

Chisoneko chino kota chatongwele maliji a Ulevi 19:2. Kapitulu 19 kanasolola majila anji a chize mutuhasa kukawilamo ku mwono wetu wa hita tangwa chiyulo chili ha 1 Petulu 1:15.—w21.12, mafwo 3-4.