Tukum Vennak Innsang capar pawl kha ṭha tein na rel maw? Na rel ahcun a tanglei biahalnak hna i a phi kha na phit khawh lai:

Jeim 5:11 nih Jehovah cu “zaangfahnak le zawnruahnak in a khatmi” a si ti kha zeitindah a kan zumhter?

Jehovah zaangfahnak nih kan palhnak ngaihthiam a kan duh ti kha kan hngalh. Jeim 5:11 nih kanmah bawmh awkah Pathian nih zawnruahnak zong a langhter ti kha a kan zumhter. Amah kha kan i zohchunh awk a si.—w21.01, ca. 21.

Jehovah nih lu sinak kha zeicah a dirh?

Dawtnak a ngeih caah cutin a tuahmi a si. Mah timhtuahnak nih zumhfekmi a chungkhar hna kha dai tein le ningcang tein a umter hna. Mah timhtuahnak ningin a zulmi a chungkharmi dihlak nih hmanung bik biakhiahnak tuah awkah ahodah rian a ngei i ahodah an hruaitu a si ti kha an hngalh.—w21.02, ca. 3.

Khrihfa hna nih electronic cakuatnak app an hman tikah zeicah an i ralrin awk a si?

Mi pakhat nih mah cakuatnak app kha hman dingin aa thim ahcun aa komh dingmi hawikom pawl kha ṭha tein aa thim hna a hau. Mi tampi aa telmi group cakuatnak kan hman tikah cutin tuah cu a har. (1 Tim. 5:13) Mah ah a hmaan lomi thawngpang karhternak le Pathian biaknak caah si loin chawlehnak caah pehtlaihnak tuah ti bantuk aa tel caah ṭih a nung tukmi a si.—w21.03, ca. 31.

Pathian nih Jesuh sihfah harnak in awk le thih awkah nawl a awnhnak a ruang cheukhat cu zeidah a si?

A pakhatnak a ruang cu Judah mi chiatserhnak in an luat khawh nakhnga Jesuh cu tungcung ah thlai a hau. (Gal. 3:10, 13) A pahnihnak cu Tlangbawi Ngan caah Jehovah nih Jesuh kha a cawnpiakmi a si. Cun a pathumnak cu Jesuh zumhfek tein a thihmi nih minung zong hneksaknak tampi an ton buin Pathian cungah zumhfek tein an um kho ti kha a langhter. (Job 1:9-11)—w21.04, cc. 16-17.

Lohmun ah mi pawl hmuh an har ahcun zeidah na tuah khawh?

Mi pawl inn an um deuh caan ah phungchim dingin naa zuam kho. Aa lo lomi hmun ah phungchim awkah naa zuam kho. Cun cakuat ṭial ti bantuk aa lo lomi fuhpanh ning hna zong kha na hman khawh.—w21.05, cc. 15-16.

Lamkaltu Paul nih “nawlbia kong ti ahcun, kei cu a thimi ka si ko cang” tiah a ti tikah zeidah a chim duhmi a si? (Gal. 2:19)

Moses Nawlbia nih minung tlinlonak kha a langhter i Israel mi kha Khrih sinah lam a hruai hna. (Gal. 3:19, 24) Mah ruangah Paul nih Khrih kha a rak cohlan. Cuticun Paul cu ‘nawlbia ah a thimi a rak si’ i nawlbia cu a cungah huham a ngei kho ti lo.—w21.06, ca. 31.

Inkhawhnak kong he aa tlaiin Jehovah nih kan caah zeitindah zohchunh awk ṭha a chiah?

Jehovah nih a min thangchiat a sinak, cungnung bik a sinak ralchanhnak, a fale cheukhat i ralchanhnak, Satan lihbia, a salle pawl harnak an tonmi, a thimi an hawile pawl he i ṭhennak, minung chungkhar ralchanhnak le a sermi thil hrawhpiaknak hna kha a inkhawh.—w21.07, cc. 9-12.

Josef nih lungsaunak kong he aa tlaiin zei zohchunh awk ṭha dah a chiah?

A ule nih a ding loin an pehtlaihmi kha a rak inkhawh. A hmaan loin sualpuh a si i Izipt ram ah kum tampi chung thong a rak tla.—w21.08, ca. 12.

Haggai 2:6-9, 20-22 nih zei bantuk hninhnak kong dah a chimchung?

Miphun hna nih Pennak kong an chimmi kha a ṭhatlonaklei in an lehrulh nain mi tampi cu biatak nih a hnuh hna. A rauhhlan ah hrawh an sinak thawngin miphun hna cu hninh an si lai.—w21.09, cc. 15-19.

Phungchim rianṭuannak ah zeicah kan lung a dongh awk a si lo?

Jehovah nih kan i zuamnak kha a hmuh i aa lawm. Kan tha a bat lo asiloah kan lung a dongh lo ahcun zungzal nunnak kan hmu lai.—w21.10, cc. 25-26.

Levitikas dal 19 nih “nannih zong thiangte in nung ve u” timi ruahnak cheuhnak kha zulh awkah zeitindah a kan bawmh khawh? (1 Pet. 1:15)

Mah Baibal caang hi Levitikas 19:2 in cherhchan dawh a si. Dal 19 ah nifatin kan nunnak ah 1 Peter 1:15 kan zulh khawh ning kong tampi a um.—w21.12, cc. 3-4.