Eski ou’n lir byen bann Latour Veyer pour sa lannen? Vwar si ou kapab reponn sa bann kestyon swivan:

Zak 5:11 i dir ki Zeova i annan “en kantite lafeksyon ek tandres ek mizerikord,” ki mannyer sa i reasir nou?

Vi ki Zeova i annan mizerikord, sa i motiv li pour pardonn nou. Zak 5:11 i asir nou ki Zeova i vreman anvi ed nou e i donn nou son led. I ti pou byen si nou swiv son legzanp.​—w21.01, paz 21.

Akoz Zeova ti fer laranzman pour serten annan lotorite?

Zeova ti fer laranzman pour serten annan lotorite akoz i kontan son fanmir. Sa laranzman i fer li posib pour annan lord ek lape dan Son fanmir. Bann fanmir ki swiv sa laranzman i konnen lekel ki pou fer desizyon final e lekel ki pou fer sa ki’n ganny deside.​—w21.02, paz 3.

Akoz bann Kretyen i bezwen fer atansyon ler zot servi bann aplikasyon elektronik ki anvoy e ganny mesaz?

Si en dimoun i deside pour servi sa bann aplikasyon ki anvoy e ganny mesaz, i bezwen swazir bann bon zanmi. Sa i kapab difisil pour fer, sirtou si sa group ki nou ladan i en gran group. (1 Tim. 5:13) I osi bezwen fer atansyon pour pa repet lenformasyon ki napa laprev e pour pa servi bann aplikasyon ki anvoy mesaz pour vann, aste e promot bann prodwi avek bann frer ek ser.​—w21.03, paz 31.

Ki serten rezon ki Zeova ti les Zezi soufer e mor?

En rezon akoz Zezi ti bezwen mor lo en poto ti pour liber bann Zwif anba en malediksyon. (Gal. 3:10, 13) En dezyenm rezon, i akoz Zeova ti pe form Zezi pour ler i vin Granpret. Osi, vi ki Zezi ti reste fidel ziska lanmor, sa ti montre ki bann imen i kapab reste fidel avek Zeova menm ler zot pas dan bann gro leprev. (Zob 1:9-11, NWT)​—w21.04, paz 16-17.

Ki ou kapab fer si i difisil pour zwenn dimoun dan predikasyon?

Ou kapab esey zwenn zot en ler ki zot normalman kot lakour. Ou kapab osi esey sanz landrwa kot ou fer predikasyon. Ou kapab esey anons sa bon nouvel dan en lot fason, par egzanp, ou kapab ekri let.​—w21.05, paz 15-16.

Ki zapot Pol ti pe esey dir ler i ti dir: “Se parski mon’n aksepte lalwa ki mon’n mor an sa ki konsern lalwa”? (Gal. 2:19, not.)

Lalwa Moiz ti ganny donnen pour montre ki bann imen i enparfe e pour ed bann Izraelit konnen lekel Kris. (Gal. 3:19, 24) Lalwa Moiz ti fer Pol aksepte Kris. Ler Pol ti fer sa, i ti “mor an sa ki konsern lalwa,” setadir i ti nepli anba Lalwa Moiz.​—w21.06, paz 31.

Akoz nou kapab dir ki Zeova i sa pli bon legzanp landirans?

Zeova in andire menm si son non in ganny sali, bokou dimoun i opoz li ek son drwa pour dirize, serten son bann zanfan in rebele, Satan in koz manti, son bann serviter pe soufer, son bann zanmi in mor, bann move dimoun pe fer lezot soufer e dimoun pe detri sa ki I’n kree.​—w21.07, paz 9-12.

Ki mannyer Zozef ti demontre pasyans?

I ti andire menm si son bann frer ti tret li dan en move fason. Sa ti fer ki i ti ganny akize pour en keksoz ki i pa’n fer e i ti ganny met dan prizon Lezip pour plizyer lannen.​—w21.08, paz 12.

Ki sa sekwe ki ganny dekrir dan Agay 2:6-9, 20-22?

Bann nasyon pa aksepte sa mesaz Rwayonm ki pe ganny anonse. Me en kantite dimoun in reazir byen anver sa mesaz. Byento, bann nasyon pour ganny en dernyen sekwe ler zot ganny detrir.​—w21.09, paz 15-19.

Akoz nou pa devret aret fer sa travay predikasyon?

Zeova i vwar nou bann zefor e sa i fer li plezir. Si nou pa arete oubyen pa abandonnen, nou pou ganny lavi eternel.​—w21.10, paz 25-26.

Ki mannyer Levitik sapit 19 i ed nou aplik sa konsey pour “vin sen dan tou zot kondwit”? (1 Pyer 1:15)

I tre probab ki 1 Pyer 1:15 ti pe sit Levitik 19:2. Levitik sapit 19 i ed nou pour vwar ki mannyer nou kapab aplik 1 Pyer 1:15.​—w21.12, paz 3-4.