Hnei epuni kö hna e la itre Ita Ne Thup ne la macatre celë? Atreine kö epuni sa la itre hnying celë:

Nemene la ka mama göi Iehova ngöne la tusi Iakobo 5:11, lo kola hape, “ka nyipi menyik” nge “ka iutipi” Nyidrë?

Atre hi së laka, ka iutipi Iehova nge aja i Nyidrë troa nue la itre ngazo së. Kola akeukawanyi së hnene la tusi Iakobo 5:11 laka, aja i Iehova troa xatua së. Nge loi e tro sa nyitipu Nyidrë.—w21.01, g. 21.

Pine nemene matre hnei Iehova hna acile la itre xan troa mus?

Pine laka, Nyidrëti a hnimi së. Celë hi ka aijijëne la organizasio i Nyidrë troa mele tingeting me caas. Atre hi la itre hlue i Iehova la ka troa axecië mekun, me elemeken, me thupë angatr.—w21.02, g. 3.

Pine nemene matre loi e tro sa thupëne la aqane huliwane së la itre jiane huliwa nyine icinyanyikeu?

Ame la itre ka huliwane la itre jiane huliwa cili ke, loi e tro angatr a iëne hnyawa la itre sinee i angatr. Ngazo pe, jole catr troa iën la itre sinee ngöne la kola könë së troa sine la ketre gurup ngöne Ëternet. (1 Tim. 5:13) Ketre, hetre ethan e troa iupi fë la itre xaa ithuemacany ka thoi, me nyisineene la itre trejin matre salemë ewekë koi angatr.—w21.03, g. 31.

Pine nemene matre hnei Akötresie hna nue Iesu troa akötr me mec?

Ame la pane kepin ke, hnei Iesu hna amelene la angetre Iudra qa ngöne la hnëjin. (Gal. 3:10, 13) Ame la hnaaluene kepin ke, Iehova a hnëkë Iesu kowe la hnëqa ne Atre Huuj Ka Sisitria. Nge ame la hnaakönine kepin ke, göne la troa anyipicine laka, ijije hi tro la itre atr a mele nyipici ngöne la itre jol. (Iobu 1:9-11)—w21.04, g. 16-17.

Nemene la nyine tro sa kuca e jole troa iöhnyi memine la itre atr ngöne la hna cainöj?

Loi e tro sa wai angatr ngöne la itre hawa ne angatr e koilo hnalapa. Loi e tro fe sa cainöj ngöne la itre xaa götran. Nge loi e tro sa saze la aqane cainöje së, tune la troa cinyianyi tus.—w21.05, g. 15-16.

Nemene la aliene la trengewekë i Paulo aposetolo ka hape: “Hnene la wathebo, ka meci hë ni thenge la wathebo”? (Gal. 2:19)

Hnene la Wathebo i Mose hna qaja amamane la itre ngazo ne la itre atr, me eatrongëne la angetre Isaraela koi Keriso. (Gal. 3:19, 24) Eje fe la ka upi Paulo troa kepe Keriso. E cili, hnei Paulo hna ‘mec thenge la wathebo,’ matre tha nyipiewekë hë tro nyidrëti a xötrethenge ej.—w21.06, g. 31.

Nemene la aqane xomihni aqeanyi Iehova?

Hnei Iehova hna xomihnine la itre trengathoi hna sil göne la ëje i Nyidrë, me itre ka icilekeu memine la musi Nyidrë, me itre nekö i Nyidrë ka tha idrei, me itre trengathoi Satana, me itre akötre ne la itre hlue i Nyidrë, me itre hlue i Nyidrë ka mec, me itre akötr ka traqa kowe la nöjei atr asë, me itre ka adrone la ihnadro.—w21.07, g. 9-12.

Nemene la tulu hna hamën hnei Iosefa göne la troa xomihni aqeany?

Hnei Iosefa hna xomihnine la kola qanangazo angeic hnene la itre trejin me angeic. Thupene lai, hna upezö angeic la ketre ngazo ka tru nge hna akalabusi angeic e Aigupito koi itre macatre.—w21.08, g. 12.

Nemene la hna perofetan ngöne Hagai 2:6-9, 20-22?

Tro la itre nöj a thipetrije la maca ne Baselaia, ngo alanyimu la itre atr ka troa lö hnine la nyipici. Easenyi hë matre troa jumejume la nöjei nöj asë me apatrenyi angatr.—w21.09, g. 15-19.

Pine nemene matre loi e tro sa catre cainöj?

Öhne hi Iehova la itre trengecatre së, nge celë hi ka amadrinë Nyidrë. Maine tro palahi sa catr, tro hë sa hetrenyi la mel ka pë pun.—w21.10, g. 25-26.

Nemene la aqane tro la Levitiko 19 a xatua së troa trongëne la eamo celë: “Hmitrötre ju fe ngöne la nöjei aqane ujë i nyipunie”? (1 Pet. 1:15)

Hna xome la xötre celë qa ngöne la Levitiko 19:2. Kola amamane ngöne la mekene 19 la itre xaa aqane tro sa trongëne la hna qaja ngöne 1 Peteru 1:15.—w21.12, g. 3-4.