Mo̱ o no̱ngi ponda o langa Njongo a Betatedi i tombi e? Ombwa te̱ nga we ná walabe̱ myuedi mi bupe̱:

Njika mbaki Yakobo 5:11 e mabolano̱ biso̱ ke̱ e makwala ná Yehova “a londi na bwam” na “ndedi” e?

Di bi ná nded’a Yehova e matute̱le̱ mo̱ o lakise̱ biso̱. Yakobo 5:11 e mabola biso̱ mbaki ná a le̱le̱m pe̱ o jongwane̱ biso̱. Biso̱ pe̱ jangame̱n jembilane̱ mo̱. —w21.01, dip. 21.

Ońola nje Yehova a te̱se̱no̱ doi la byanedi e?

A boli nde nika ońolana a to̱ndi biso̱. Nik’e mabola ná o̱da na musango ba be̱ o mbia mao. Elong’a mbia te̱ yena e mabupe̱ be bete̱sedi e bi nja ńangame̱n no̱nge̱ bedomsedi besukan, na bakise̱ pe̱ ná ba mabupe̱ mo̱. —w21.02, dip. 3.

Ońola nje kriste̱n yangame̱nno̱ no̱ngo̱ jangame̱ye̱ na mbad’a bolane̱ la belongisan ba loma na kusa la mye̱ndi e?

Moto a po̱si te̱ o bolane̱ be belongisan, angame̱n bia po̱so̱ mako̱m mao. Toboboto ke̱ milongwa ma bekwali mi be̱n bato jita. (1 Tim. 5:13) Angame̱n pe̱ no̱ngo̱ jangame̱ye̱ ná a si camane̱ mye̱ndi mi titi mbaki, na ná a si bolane̱ mulatako mao na bonasango o wasa mo̱ni. —w21.03, dip. 31.

Ońola nje Loba ese̱le̱no̱ ná Yesu a take a wo̱ pe̱ e?

Njo̱m po̱ ńe nde ná panabe̱ la Yesu o ebongo di ta di te̱se̱ Bonayuda wonja na lou. (Gal. 3:10, 13) Nipe̱pe̱ ńe nde ná Yehova a ta nde a longa Yesu ońola ebol’ao ya Prisi Ninde̱ne̱. Ni londe̱ ilalo ńe nde ná jemea la Yesu nate̱n’o kwedi di lee̱ ná mot’a benama e ná a be̱ jemea to̱ oboso ba makekisan mande̱ne̱. (Hiob 1:9-11) —w21.04, map. 16-17.

Nje weno̱ ná o bola yete̱na ye ndutu o so̱ bato o dikalo e?

We ná o keka wasa te̱ye̱ babo̱ dikalo ponda nipe̱pe̱ beno̱ ná ba be̱ omboa. We pe̱ ná o keka te̱ dikalo o bepolo bepe̱pe̱. O sumo te̱ nika, we pe̱ ná o keka mbad’a te̱ dikalo nipe̱pe̱, ka tila la maleta. —w21.05, map. 15-16.

Nje Paulo a pulino̱ kwala ponda a to̱pino̱ ná “O njo̱m a mbenda nde na wedino̱, na domno̱ dinde na mbenda” e? (Gal. 2:19)

Mbend’a Mose e bonde̱ si be̱ la ke̱nge̱nge̱ la mot’a benama, e die̱le̱ pe̱ Bonaisrael omboa Kristo. (Gal. 3:19, 24) E boli ná Paulo emeye Kristo. Na nika so̱ nde Paulo a wedino̱ “o njo̱m a mbenda;” e si ta pe̱ e be̱ne̱ ngińa omo̱ń ao. —w21.06, dip. 31.

Ne̱ni Yehova eno̱ biso̱ eyembilan a bwam o nje e mombweye̱ we̱lisane̱ e?

Yehova e o we̱lisane̱ lou di we̱le̱be̱ omo̱ń a dina lao, te̱nge̱ne̱ la doi lao la byanedi, pamo a bana bao bō̱, mpoṅ ma diabolo, ndutu i mako̱ye̱ baboledi bao, kwed’a mako̱m mao, bobe bwena bato bō̱ ba mabolane̱no̱ bane̱, na ńamsabe̱ la bewekedi. —w21.07, map. 9-12.

Njik’eyembilan a bwam ya we̱lisane̱ Yose̱f a die̱le̱no̱ biso̱ e?

A lembe̱ si te̱me̱ la sim la bonasango ao. Nik’e boli ná a numabe̱ njo̱m, nde a we̱le̱be̱ o beboa o Egipto mimbu jita. —w21.08, dip. 12.

Njika sousabe̱ la matumba kalat’a Hagai 2:6-9, 20-22 e bīse̱no̱ e?

Bato bō̱ ba si kasi mwe̱ndi ma Janea bwam, nde mbale̱ e tapi bato jita. Son a ponda, matumba ma me̱nde̱ sousabe̱ ponda ma me̱nde̱no̱ ńamsabe̱. —w21.09, map. 15-19.

Ońola nje di s’angame̱nno̱ wo̱lo̱ o te̱ dikalo e?

Yehova a me̱ne̱ miwe̱n masu, a mabwane̱ pe̱ mo̱ muńe̱nge̱. Di si wo̱li te̱, to̱so̱ di si bo̱bi te̱, di me̱nde̱ kusa longe̱ la bwindea. —w21.10, map. 25-26.

Ne̱ni Levitiko bepasi 19 e mongwane̱no̱ biso̱ o we̱le̱ man malea ná “Bińo̱ be̱ bosangi o bedangwedi bańu be̱se̱” o ebolo e? (1 Pet. 1:15)

Y’epas’a Bibe̱l e no̱ngo̱be̱ nde o Levitiko 19:2. Bepasi 19 ba kalat’a Levitiko be mabola byembilan jita ba ne̱ni we̱le̱ 1 Petro 1:15 o ebolo o longe̱ lasu la buńa te̱. —w21.12, map. 3-4.