Ndi ama etịn̄ enyịn okot mme Enyọn̄-Ukpeme isua emi? Ọfọn, se m̀mê emekeme ndibọrọ mme mbụme emi:

James 5:11 ndidọhọ ke Jehovah “enen̄ede enyene esịt ima onyụn̄ atua owo mbọm” ekpep nnyịn nso?

Imọdiọn̄ọ ke mbọm esinam ọdọn̄ Jehovah ndifen mme idiọkn̄kpọ nnyịn. James 5:11 anam ikụt n̄ko ke ima anam enye ọdọhọ ke iyan̄wam nnyịn. Ọfọn ikpebe Jehovah.—w21.01, p. 21.

Nso inam Jehovah ọnọ mbon en̄wen odudu yak ẹdi ibuot?

Ima anam enye anam ntre. Jehovah ndinọ mbon en̄wen odudu yak ẹdi ibuot anam emem odu ke ubon Jehovah, ẹnyụn̄ ẹnam n̄kpọ ke nde ke nde. Edieke owo kiet kiet ke ubon ẹtienede ndutịm emi, mmọ ẹyediọn̄ọ owo emi enyenede unen ndibiere n̄kpọ, ye owo emi okpokụtde ete ke ẹnam se ẹbierede.—w21.02, p. 3.

Ntak emi mme Christian ẹkpekpemede nte mmọ ẹdade mme app emi ẹsidade ẹnọ owo etop ẹnam n̄kpọ?

Edieke owo oyomde ndidụk otu emi ẹsidade utọ app oro ẹnọ owo etop, ọfọn enye ekere utọ mme owo emi enye oyomde ndidụk ndụk do. Eyenen̄ede ọsọn̄ enye ndinam emi ekpedi mme owo ẹwak etieti ke otu oro. (1 Tim. 5:13) Mme owo ẹkeme ndida utọ app oro nsuan mbụk emi mmọ mîdiọn̄ọke m̀mê edi akpanikọ, ẹnyụn̄ ẹkeme ndidomo ndida nditọete n̄n̄wana okụk.—w21.03, p. 31.

Nso idi ndusụk ntak emi akanamde Abasi ayak Jesus ọbọ ufen onyụn̄ akpa?

Akpa ntak edi ke Jesus ndikọkọn̄ọ ke eto ama anam mme Jew ẹbọhọ isụn̄i emi okomụmde mmọ. (Gal. 3:10, 13) Ọyọhọ iba edi ke Jehovah eketịm Jesus idem ọnọ ini emi enye edidide Akwa Oku nnyịn. Ọyọhọ ita edi ke Jesus ndikọsọn̄ọ nda ye Jehovah tutu enye akpa ama owụt ke owo ekeme ndika iso nsọn̄ọ nda ye Jehovah idem ke ini ẹnen̄erede ẹdomo enye. (Job 1:9-11)—w21.04, p. 16-17.

Akpanam nso edieke ọsọn̄de fi ndikụt owo n̄kwọrọ ikọ nnọ?

Emekeme ndidomo ndisika ukwọrọikọ ke ini emi mme owo ẹsiwakde ndidu ke ufọk. Domo n̄ko ndikwọrọ ikọ ke ebiet en̄wen. Domo usụn̄ en̄wen se, utọ nte ndiwet leta.—w21.05, p. 15-16.

Apostle Paul ọkọdọhọ ke Galatia 2:19 ete: “N̄kpa ke ntak ibet.” Ọkọwọrọ nso?

Ibet Moses ama anam ẹkụt ke inyeneke nte owo emi mîfọnke ima ekemede ndinịm Ibet oro, isụk iduehe n̄kpọ ndomokiet, ama onyụn̄ an̄wam nditọ Israel ẹdiọn̄ọ Christ. (Gal. 3:19, 24) Ibet oro ama an̄wam Paul edidiọn̄ọ Christ. Paul ndidiọn̄ọ Christ ama anam enye akpa ọwọrọ ke Ibet Moses. Oro ọwọrọ ke Ibet oro ikọbọpke Paul aba.—w21.06, p. 31.

Didie ke Jehovah ekpep nnyịn ndiyọ n̄kpọ?

Jehovah ọyọ nte ẹsuenede enyịn̄ esie, nte mme owo ẹsịnde enye ye ukara esie, nte ndusụk nditọ esie ẹsọn̄de ibuot ye enye, nte Devil akade iso ndisu nsu ndori enye, nte ndima ikọt esie ẹbọde ufen, nte n̄kpa adade mme ufan esie, nte ndiọi owo ẹfịkde mme owo, ye nte mme owo ẹbiatde mme n̄kpọ emi enye okobotde.—w21.07, p. 9-12.

Didie ke Joseph ekekpep nnyịn nte ikpenyenede ime?

Nditọete esie ẹma ẹnam enye ibak. Se mmọ ẹkenamde enye akada enye ekesịm Egypt emi ẹkedoride enye ikọ ẹnyụn̄ ẹkọbide enye ke ediwak isua.—w21.08, p. 12.

Mme nnyen̄e ewe ke Haggai 2:6-9, 20-22 ẹtịn̄ ẹban̄a?

Mme idụt imaha etop Obio Ubọn̄ emi ikwọrọde, edi etop oro anam ediwak owo ẹdituak ibuot ẹnọ Jehovah. Ibịghike, ẹyenyen̄e mme idụt akpatre nnyen̄e. Ini oro ke ẹdisobo mmọ.—w21.09, p. 15-19.

Ntak emi nnyịn mîkpakpaha mba ndikwọrọ ikọ?

Jehovah okụt nte isịnde idem ikwọrọ ikọ, nnyịn ndikwọrọ ikọ onyụn̄ enem enye. Enye ayanam idu uwem ke nsinsi edieke nnyịn mîkpaha mba.—w21.10, p. 25-26.

Akpa Peter 1:15 ọdọhọ: “Ẹkabade ẹsana ke ofụri edu uwem mbufo.” Didie ke Leviticus ibuot 19 an̄wam nnyịn inam item emi?

Etie nte item emi oto Leviticus 19:⁠2. Leviticus ibuot 19 etịn̄ ediwak usụn̄ emi ikpanamde se 1 Peter 1:15 etịn̄de ke usen ke usen.—w21.12, p. 3-4.