A ka xà Atɔxwɛ yaɖeyaɖe e tɔ́n wá yì lɛ é ganji à? É nyɔ́, kpɔ́n ɖɔ a ka sixu na xósin nú nǔkanbyɔ elɔ lɛ à jí:

Jaki 5:11 ɖɔ ɖɔ Jehovah nɔ “nyɔ́ xomɛ ɖesu” bɔ “mɛ nú nɔ blawǔ n’i titewungbe.” Ganjɛwu tɛ enɛ ka na mǐ?

Mǐ tuùn ɖɔ nǔblawukúnúmɛ nɔ sísɛ́ Jehovah bɔ é nɔ ba na sɔ́ nǔwanyido mǐtɔn lɛ kɛ mǐ. Jaki 5:11 na mǐ ganjɛwu ɖɔ é nɔ lɛ́ d’alɔ mǐ kpo wanyiyi kpo. É na nyɔ́ ɖɔ mǐ ni nɔ wà nǔ éɖɔhun.—w21.01, wex. 21.

Etɛwu Jehovah ka ɖó tuto acɛkpikpa tɔn ayǐ?

Wanyiyi wɛ sísɛ́ ɛ bɔ é wà mɔ̌. Tuto acɛkpikpa tɔn enɛ ɔ nɔ zɔ́n bɔ xwédo Jehovah tɔn nɔ nɔ fífá mɛ, bo nɔ lɛ́ wà nǔ kpo tuto kpo. Mɛ e ɖò xwédo ɔ mɛ bo nɔ wà nǔ sɔgbe xá tuto acɛkpikpa tɔn enɛ é ɖokpo ɖokpo nɔ tuùn mɛ e ɖó na wá gbeta gudogudo tɔn lɛ kɔn, lobo ɖó na lɛ́ nɔ nukɔn bonu è na xwedó gbeta enɛ lɛ é.—w21.02, wex. 3.

Etɛwu Klisanwun lɛ ka ɖó na nɔ nɔ acéjí, hwenu e ye ɖò tɛn Ɛntɛnɛti tɔn ɖěɖee è nɔ zán dó ɖɔ xó ɖó kpɔ́ xá mɛ lɛ é zán wɛ é?

Enyi mɛɖé wá gbeta ɔ kɔn bo na zán tɛn Ɛntɛnɛti tɔn enɛ lɛ ɔ, é ɖó na cyan mɛ e é ɖó na dó gbɛ̌ xá lɛ é. Nú gbɛ̌ta ɖaxó ɖaxó lɛ wɛ é ka nyí ɔ, enɛ na vɛwǔ tawun. (1 Tim. 5:13) Gbeɖiɖó e ma ɖó jiɖe ǎ lɛ é fúnfún fúnfún kpé kpo alokankɛ́n yɛhwexɔ́suɖuto ɔ tɔn lɛ zinzán dó wà ajɔ̌ na kpo nyla tawun.—w21.03, wex. 31.

Ðɔ hwɛjijɔ e wu Mawu yí gbè bɔ Jezu sè wuvɛ̌, bo lɛ́ kú é ɖé lɛ.

Hwɛjijɔ e wu wɛ é ɖokpo wɛ nyí ɖɔ, è ɖó na xwè è dó atín ɖé wu, bo na dó xɔ Jwifu lɛ sín nudómɛ ɖé sí. (Ga. 3:10, 13) Hwɛjijɔ wegɔ́ ɔ wɛ nyí ɖɔ, nǔ sɔ́ nú Jezu wɛ Jehovah ɖè mɔ̌ nú Vɔsanúxwlémawutɔ́ Ðaxó sín azɔ̌ e é na wá wà ɖò nukɔnmɛ é. Hwɛjijɔ atɔngɔ́ ɔ wɛ nyí ɖɔ, dɛ e Jezu dɛ kpo gbejininɔ kpo kaka jɛ kú é xlɛ́ ɖɔ, enyi gbɛtɔ́ lɛ na bo tlɛ ɖò wuvɛ̌ syɛnsyɛn ɖebǔ mɔ wɛ ɔ, ye sixu nɔ gbeji. (Jɔb. 1:9-11)—w21.04, wex. 16-17.

Enyi é nɔ vɛwǔ bɔ è na mɔ mɛ lɛ ɖò fí e a nɔ ɖɔ Mawuxó ɖè é ɔ, etɛ a ka sixu wà?

A sixu tɛ́n kpɔ́n bo ba ye mɔ ɖò hwenu e ye na ɖibla ɖò xwégbe hugǎn é. A sixu lɛ́ tɛ́n fí vovo kpɔ́n. Gɔ́ na ɔ, dǒ gǎn bo tɛ́n wlɛnwín ɖevo kpɔ́n, ɖi nǔwlanwlán sɛ́dó mɛ mɔ̌.—w21.05, wex. 15-16.

Etɛ ɖɔ wɛ mɛsɛ́dó Pɔlu ka ɖè bo ɖɔ: “Ðò sɛ́n ɔ lixo ɔ, un ko kú”? (Ga. 2:19)

Mɔyizisɛ́n ɔ ɖè nǔwanyido gbɛtɔ́ tɔn lɛ xlɛ́, lobo xlɛ́ ali Izlayɛli-ví lɛ kaka jɛ hwenu e Jezu wá dó é. (Ga. 3:19, 24) Enɛ zɔ́n bɔ Pɔlu ɖi nǔ nú Jezu. Mɔ̌ mɛ ɔ, “ɖò sɛ́n ɔ lixo ɔ” Pɔlu “kú;” é ka sɔ́ ɖò sɛ́n ɔ kannu ǎ.—w21.06, wex. 31.

Nɛ̌ Jehovah ka sɔ́ kpɔ́ndéwú didɛ tɔn ɖ’ayǐ nú mǐ gbɔn?

Jehovah ɖò didɛ wɛ ɖò nǔ elɔ lɛ nu: cí e è kɔn dó nyikɔ tɔn wu é, gbè e è klán xá Nǔbǐwukpétɔ́ e nyí é, gǔ e vǐ tɔn ɖé lɛ fɔ́n é, adingban e Satáan nɔ fɔ́n bo nɔ ɖò ɖiɖó wɛ lɛ é, wuvɛ̌ e sè wɛ mɛsɛntɔ́ tɔn lɛ nɔ ɖè é, sɛ̀ e kú nɔ sɛ̀ xɔ́ntɔn tɔn lɛ ɖó zɔ n’i é, ya e dakaxotɔ́ lɛ nɔ dó nú gbɛtɔ́ lɛ é, kpo nǔɖiɖó lɛ e hɛn gblé wɛ gbɛtɔ́ lɛ ɖè é kpo.—w21.07, wex. 9-12.

Kpɔ́ndéwú suúluɖiɖó tɔn ɖagbe tɛ Jozɛfu ka sɔ́ ɖ’ayǐ?

É dɛ ɖò nǔ agɔ e nɔví tɔn lɛ wà xá ɛ é nu. Nǔ agɔ enɛ e ye wà xá ɛ é zɔ́n bɔ è dóhwɛ agɔ ɛ, bo sɔ́ ɛ dó ganmɛ nú xwè mɔ̌kpan ɖò Ejipu.—w21.08, wex. 12.

Nǔ hunhun húnhún nǔjlɛdonǔwu tɔn tɛ xó Ajée 2:6-9, 20-22 ka ɖɔ ɖ’ayǐ?

Mɛ lɛ nɔ ba na ɖótó wɛnɖagbe Axɔ́suɖuto ɔ tɔn ǎ, é ɖò mɔ̌ có, mɛ gegě ka ko wá nǔgbo ɔ mɛ. Malin-malin mɛ ɔ, è na hunhun akɔta lɛ azɔn gudo tɔn ɔ, hwenu e è na sú kún yetɔn dó é.—w21.09, wex. 15-19.

Aniwu awakanmɛ ma ka ɖó na kú mǐ dó sinsɛnzɔ́ mǐtɔn wu ǎ?

Jehovah nɔ mɔ gǎn e dó wɛ mǐ ɖè lɛ é, bɔ é nɔ nyɔ́ nukún tɔn mɛ. Enyi awakanmɛ ma kú mǐ ǎ ɔ, mǐ na mɔ gbɛ̀ mavɔmavɔ.—w21.10, wex. 25-26.

Nɛ̌ Levíi ví lɛ wemata 19gɔ́ ɔ ka d’alɔ mǐ bɔ mǐ na zán wěɖexámɛ elɔ gbɔn: “Mi ni nyí mɛ mímɛ́ ɖò nǔwiwa mitɔn bǐ mɛ”? (1 Pi. 1:15)

É cí ɖɔ Levíi ví lɛ 19:2 mɛ wɛ è ɖè xó enɛ sín. Kpɔ́ndéwú lee mǐ sixu zán 1 Piyɛ́ɛ 1:15 ɖò gbɛzinzan ayihɔngbe ayihɔngbe tɔn mǐtɔn mɛ gbɔn é tɔn gegě wɛ ɖò wemata 19gɔ́ ɔ mɛ.—w21.12, wex. 3-4.