Ani okane Buu-Mɔɔ srɔtoi ni ba afi nɛɛ jogbaŋŋ? Kwɛmɔ akɛ obaanyɛ ohã sanebimɔi ni nyiɛ sɛɛ nɛɛ ahetoo lo:

Yakobo 5:11 kɛ eshishigbɛ niŋmaa lɛ kɛɔ akɛ: “Yehowa dɔɔ mɔ he waa, ni enaa mɔbɔ hu.” Mɛni wiemɔi nɛɛ hãa wɔleɔ yɛ Yehowa he?

Yehowa mɔbɔnalɛ lɛ hewɔ lɛ, ekɛ wɔtɔmɔi keɔ wɔ. Yakobo 5:11 lɛ hãa wɔleɔ hu akɛ, Yehowa nuɔ he ehãa wɔ waa, ni eesumɔ ni eye ebua wɔ. Esa akɛ wɔbɔ mɔdɛŋ wɔkase lɛ.​—w21.01, bf. 21.

Mɛni hewɔ Yehowa to yitsoyeli he gbɛjianɔ?

Yehowa sumɔɔ eweku lɛ ni no hewɔ eto yitsoyeli he gbɛjianɔ lɛ. Yitsoyeli he gbɛjianɔ ni Yehowa eto yɛ eweku lɛ mli lɛ hewɔ lɛ, toiŋjɔlɛ yɛ eweku lɛ mli, ni nɔ fɛɛ nɔ yaa lɛ jogbaŋŋ. Weku lɛ mli bii lɛ ateŋ mɔ fɛɛ mɔ ni kɛ yitsoyeli he gbɛjianɔtoo lɛ tsuɔ nii lɛ le mɔ ni esa akɛ ekpɛ yiŋ yɛ saji ahe kɛ mɔ ni baanyiɛ hiɛ ni akɛ nakai yiŋkpɛi lɛ atsu nii.​—w21.02, bf. 3.

Mɛni hewɔ esa akɛ Kristofoi akwɛ jogbaŋŋ kɛ́ amɛkɛ app srɔtoi ni akɛsɛndiɔ mɛi mɛseji lɛ miitsu nii?

Kɛ́ mɔ ko kpɛ eyiŋ akɛ ekɛ app srɔtoi nɛɛ eko baatsu nii lɛ, belɛ esa akɛ ekwɛ ehe nɔ jogbaŋŋ yɛ mɛi ni ekɛgbaa sane yɛ nɔ lɛ ahe, titri lɛ, kɛ́ atse kuu yɛ app nɛɛ nɔ, ni mɛi ni yɔɔ kuu lɛ mli lɛ ayi fa waa. (1 Tim. 5:13) Agbɛnɛ hu, abaanyɛ atsɔ app srɔtoi nɛɛ anɔ agbɛ saji ni abɛ nɔmimaa akɛ amɛji anɔkwale lɛ ashwã loo atsɔ nyɛmimɛi lɛ anɔ atao shika.​—w21.03, bf. 31.

Mɛni hewɔ Nyɔŋmɔ ŋmɛ gbɛ ni apiŋ Yesu waa ni agbe lɛ lɛ?

Yiŋtoo kome ji akɛ, ehe bahia ni asɛŋ Yesu yɛ tso nɔ koni ejie loomɔ ko kɛje Yudafoi lɛ anɔ. (Gal. 3:10, 13) Yiŋtoo ni ji enyɔ lɛ ji, no mli lɛ Yehowa miitsɔ no nɔ eetsɔse Yesu kɛhã enitsumɔ akɛ Osɔfonukpa lɛ. Ni nɔ ni ji etɛ lɛ ji, bɔ ni Yesu ye anɔkwa kɛtee gbele mli lɛ hã ana akɛ, adesa ko baanyɛ aya nɔ aye Yehowa anɔkwa kɛji eyaje shihilɛ ni mli wa waa mli po. (Hiob 1:9-11)​—w21.04, bf. 16-17.

Mɛni obaanyɛ ofee koni kɛ́ otee shiɛmɔ lɛ, onine ashɛ mɛi pii anɔ?

Yaa shiɛmɔ be ni mɛi fɔɔ shĩa hilɛ. Agbɛnɛ hu, yaa he ni obaana mɛi lɛ yɛ, ni otsɔ gbɛi krokomɛi anɔ oshiɛ. Akɛ nɔkwɛmɔnɔ lɛ, obaanyɛ oŋma mɛi woji.​—w21.05, bf. 15-16.

Be ni bɔfo Paulo wie akɛ: “Mi lɛ mitsɔ mla nɔ migbo yɛ mla gbɛfaŋ” lɛ, no mli lɛ, mɛni etsɔɔ lɛ? (Gal. 2:19)

Mose Mla lɛ hã efee faŋŋ akɛ, adesai yeee emuu, ni etsɔɔ Israelbii lɛ gbɛ kɛtee Kristo lɛ ŋɔɔ. (Gal. 3:19, 24) Be ni Mla lɛ tsɔɔ Paulo gbɛ kɛtee Yesu ŋɔɔ ni ehe Yesu nɔ eye lɛ, ‘egbo yɛ mla lɛ gbɛfaŋ,’ ejaakɛ kɛjɛ nakai be lɛ nɔ kɛyaa lɛ, Mla lɛ bɛ hewalɛ ko yɛ enɔ dɔŋŋ.​—w21.06, bf. 31.

Mɛni hewɔ wɔbaanyɛ wɔkɛɛ akɛ Yehowa ji mɔ ni efi shi fe mɔ fɛɛ mɔ lɛ?

Awo Yehowa gbɛ́i lɛ he muji, awie ashi lɛ akɛ jeee lɛ esa akɛ eye jeŋ muu lɛ fɛɛ nɔ, ebii lɛ ekomɛi ete shi amɛwo lɛ, Satan miimale lɛ kɛ etsuji lɛ ahe, etsuji miipiŋ, ehiɛ tseɔ enanemɛi ni egboi lɛ, mɛi fɔji ehã mɛi miipiŋ, ni aafite shikpɔŋ lɛ. Shi fɛɛ sɛɛ lɛ, Yehowa miifi shi.​—w21.07, bf. 9-12.

Mɛɛ gbɛ nɔ Yosef sane lɛ baanyɛ aye abua wɔ ni wɔto wɔtsui shi waa?

Lɛ diɛŋtsɛ enyɛmimɛi fee lɛ nibii ni ehiii kwraa, shi ebɛɛɛ amɛ ewooo emli. Sɛɛ mli lɛ, afolɔ enaa ni awo lɛ tsuŋ yɛ Ejipt afii pii.​—w21.08, bf. 12.

Mɛɛ mfonirifeemɔŋ hosomɔi enyɔ gbalɔ Hagai gba efɔ̃ shi yɛ Hagai 2:6-9, 20-22 lɛ?

Jeŋmaji lɛ náaa Maŋtsɛyeli lɛ he sane kpakpa lɛ ni wɔshiɛɔ lɛ he miishɛɛ, shi mɛi pii eba anɔkwale lɛ mli. Etsɛŋ abaahoso jeŋmaji lɛ nɔ ni ji naagbee nɔ, ni tsɔɔ akɛ, abaakpãtã amɛhiɛ.​—w21.09, bf. 15-19.

Mɛni hewɔ esa akɛ wɔya nɔ wɔshiɛ ni wɔkpaaa lɛ?

Yehowa naa ekãa ni wɔyɔɔ lɛ, ni eyɛ wɔsɔɔmɔ nitsumɔ lɛ he miishɛɛ. Kɛ́ wɔtee nɔ wɔshiɛ ni wɔkpaaa lɛ, wɔbaaná naanɔ wala.​—w21.10, bf. 25-26.

Biblia lɛ kɛɔ yɛ 1 Petro 1:15 lɛ akɛ: “Nyɛfea mɛi krɔŋkrɔŋi yɛ nyɛnifeemɔi fɛɛ amli.” Mɛɛ gbɛ nɔ 3 Mose yitso 19 lɛ baanyɛ aye abua wɔ ni wɔbo ŋaawoo nɛɛ toi?

Eeenyɛ efee akɛ, akɔ wiemɔi nɛɛ kɛjɛ 3 Mose 19:2 lɛ mli. Yitso 19 lɛ tsɔɔ wɔ nibii srɔtoi ni kɛ́ wɔfee lɛ no baatsɔɔ akɛ wɔmiibo gbɛtsɔɔmɔ ni yɔɔ 1 Petro 1:15 lɛ toi.​—w21.12, bf. 3-4.