Ès ou pa pèd on may adan sé Tou dè Gad la ki sòti an 2021 la ? Si sé sa, gadé si ou ka rivé réponn a sé kèsyon-lasa :

Jak 5:11 ka palé dè lanmou a Jéova, dè tandrès a-y men i ka palé dè mizérikòd a-y osi. Dè kibiten nou pé sèten ?

Konm Jéova sé on Bondyé ki ni mizérikòd, nou sav kè i toujou paré a padonné-nou. Jak 5:11 ka montré-nou osi kè konm i enmé-nou onlo, i anvi édé-nou. An-nou imité-y (w21.01, p. 21).

Poukwa Jéova ba sèwten moun on otorité ?

I fè sa pas i enmé-nou. Si Jéova pran dispozisyon-lasa pou fanmi a-y, sé pou tout biten fèt byen konm i fo é pou toutmoun antann-yo byen. Lè on fanmi dakò èvè dispozisyon-lasa, ki misyé-la, ki madanm-la, ki sé timoun-la sav kimoun ki dwètèt pran sé désizyon-la é kimoun ki dwètèt fè ansòt pou yo apliké-yo (w21.02, p. 3).

Poukwa fò sé krétyen-la fè atansyon lè yo ka sèvi èvè aplikasyon ki ka pèwmèt-yo voyé é rèsèvwa mésaj ?

Lè on moun ka sèvi èvè sé aplikasyon-lasa, fò i pran prékosyon lè i ka chwazi zanmi a-y. Lè i ka rantré adan on gwoup ki plen moun adan-y, fò i pran plis prékosyon ankò (1 Tim. 5:13). Si i pa sèten kè on enfòwmasyon vré, i pé’é répété-y é i pé’é kouté-y menmsi i ni lenprésyon kè sé dènyé fré-la yo ka pòté ba-y. Nou ka tou konprann kè i pé’é sèvi èvè sé aplikasyon-lasa nonplis pou fè piblisité pou on pwodui i ka vann oben pou vann dòt biten ba frè é sè a-y (w21.03, p. 31).

Poukwa Bondyé lésé Jézi soufè konsa é poukwa i lésé-yo tchouyé-y ?

1) Fò-yo té kloué Jézi asi on poto pou libéré sé Juif-la pas Bondyé té modi-yo (Gal. 3:10, 13). 2) Jéova lésé Gason a-y soufè pou fòwmé-y pas sé-y i chwazi pou vin Gran Prèt. 3) Konm Jézi rété fidèl a san pou san sa montré kè on moun pé rété fidèl menmsi i ka jwenn gwo éprèv (Jòb 1:9-11) (w21.04, p. 16-17).

Ka pou ou fè si ou ni dimal a touvé sé moun-la akaz a yo ?

Ou pé ay préché lè ou pi fasil a touvé sé moun-la akaz a yo. Ou pé éséyé préché osi ondòt koté oben ou pé éséyé préché ondòt jan. Pa ègzanp ou pé voyé on lèt ba on moun (w21.05, p. 15-16).

Lè lapòt Pòl di an Galat 2:19 : « An mò parapòt a lwa-la » ka i té vé di pa la ?

Lwa a Moyiz té ka montré kè toutmoun té enpawfè é i té ka montré sé Izraélit-la osi kè yo té ké bizwen on sakrifis ki pawfè, kivédi yo té bizwen Jézikris (Gal. 3:19, 24). Sé konsa Pòl aksèpté Jézikris. Kifè, i « mò parapòt a lwa-la » kivédi lwa-la pa té ka dirijé-y ankò (w21.06, p. 31).

Jéova ka andiré : ka ègzanp a-y ka aprann-nou ?

Jéova ka andiré plizyè sitiyasyon ki difisil toubònman : yo sali non a-y ; onlo moun kont dominasyon a-y ; ni sèwten adan timoun a-y ki ba-y do ; Dyab-la pa ka arété simé manti asi-y é asi sèwvitè a-y ; i enmé sèwvitè a-y é i ka vwè lè yo ka soufè ; konm zanmi a-y mò, i pé pa pasé tibwen tan èvè yo ankò ; sé méchan-la ka fè-moun vwè bon mizè ; pi sa k’ay é pi sé moun-la ka fè mové biten ; lézimen ka détwi sa i kréyé (w21.07, p. 9-12).

Jozèf té ni onlo pasyans. Ki ègzanp i ka ban-nou ?

Sé frè a-y la fè-y bon méchansté alòskè i pa té mérité sa. Aprésa yo di kè i fè on biten alòskè i pa té pé pi inosan ki sa é yo mété-y lajòl pannan bon enpé lanné (w21.08, p. 12).

Jéova ka soukwé sé nasyon-la. Ka Ajé 2:6-9, 20-22 ka aprann-nou asi sa ?

Lamajorité a moun ki asi latè pa ka aksèpté mésaj a Wayòm-la men ni onlo osi ki ka vin a lavérité. Talè Jéova ké soukwé sé nasyon-la é i ké détwi-yo (w21.09, p. 15-19).

Fò-nou pòté bon mannèv an prédikasyon. Poukwa fò pa nou jen arété fè sa ?

Jéova ka vwè tout éfò nou ka fè é i kontan-nou. Si nou pa’a lésé fatig pran lanmen asi nou é si nou pa’a lagé, nou ké viv pou touttan (w21.10, p. 25-26).

1 Pyè 1:15 ka di : « Fò-zòt osi vin sen adan tousa zò ka fè. » Kijan Lévitik 19 ka édé-nou mèt konsèy-lasa an pratik ?

Pétèt kè Pyè ka palé dè Lévitik 19:2. Adan Lévitik chapit 19, yo ka montré-nou kijan nou pé mèt 1 Pyè 1:15 an pratik. É chapit-lasa ka montré-nou kè nou pé fè sa plizyè fason diféran (w21.12, p. 3-4).