Be a yí sọwhiwhe do hia zinjẹgbonu Atọ̀họ̀-Nuhihọ́ lọ Tọn agọe tọn lẹ ya? Eyọn, pọ́n eyin a sọgan na gblọndo kanbiọ he bọdego ehelẹ tọn:

Jide tẹwẹ Jakọbu 5:11 namẹ whenue e dọ dọ Jehovah “tindo owanyi sisosiso” bosọ “yin lẹblanunọ”?

Mí yọnẹn dọ Jehovah wleawufo nado jo nuṣiwa mítọn lẹ na mí, na e yin lẹblanunọ wutu. Jakọbu 5:11 hẹn mí deji dọ owanyi sisosiso etọn sọ nọ whàn ẹn nado gọalọna mí sọn ojlo mẹ wá. Mí na wà dagbe nado hodo apajlẹ etọn.—w21.01, w. 21.

Naegbọn Jehovah ze tito tatọ́-yinyin tọn dai?

Owanyi wẹ whàn ẹn nado wàmọ. Tito ehe nọ zọ́n bọ whẹndo nugbonọ etọn nọ to jijọho mẹ, bọ nulẹ nọ yì to aliho kannukannu tọn mẹ. Hagbẹ whẹndo tọn dopodopo he nọ wazọ́n to kọndopọ mẹ hẹ tito ehe nọ yọ́n mẹhe na basi nudide godo tọn lẹ, gọna mẹhe dona hẹn ẹn diun dọ yè zìn gbọn nudide enẹlẹ ji.—w21.02, w. 3.

Naegbọn Klistiani lẹ dona nọ nọ̀ aṣeji gando aplikasiọn wekanhlanmẹ tọn lẹ yiyizan go?

Eyin mẹde basi dide nado yí aplikasiọn mọnkọ lẹ zan, e dona pọ́n ogbẹ́ do dó. Ehe sọ nọ vẹawu dogọ eyin yè to tito wekanhlanmẹ tọn he nọ bẹ pipli gbẹtọvi tọn susu hẹn lẹ yizan. (1 Tim. 5:13) Owù devo lẹ wẹ linlin he ma do dodonu lẹ hinhẹn gbayipe gọna adlẹsi yisenọ hatọ lẹ tọn yiyizan na yanwle ajọwiwa tọn lẹ.—w21.03, w. 31.

Etẹwẹ yin delẹ to whẹwhinwhẹ́n he wutu Jiwheyẹwhe dike bọ Jesu jiya bo kú lẹ mẹ?

Whẹwhinwhẹ́n dopo wẹ yindọ okú Jesu tọn to yatin ji hẹn ẹn yọnbasi na Ju lẹ nado yin tuntundote sọn dẹ̀hodo de glọ. (Gal. 3:10, 13) Whẹwhinwhẹ́n awetọ wẹ yindọ Jehovah to azọ́nplọn Jesu nado wá lẹzun Yẹwhenọ Daho. Podọ whẹwhinwhẹ́n atọ̀ntọ wẹ yindọ, nugbonọ-yinyin Jesu tọn kakajẹ okú dohia dọ gbẹtọvi lẹ gán yin nugbonọ mahopọnna whlepọn he kàn dẹpẹ biọ lẹ. (Jobu 1:9-11)—w21.04, w. 16, 17.

Etẹwẹ a gán wà eyin e nọ vẹawu nado mọ mẹlẹ to lizọnyizọn lọ mẹ?

A gán tẹnpọn nado yì yé dè to ojlẹ he mẹ e yọnbasi taun dọ yé ni to whégbè te. A sọgan sọ tẹ́n yẹwhehodidọ to nọtẹn voovo lẹ pọ́n. Podọ a gán sọ tẹ́n aliho kunnudide tọn voovo lẹ pọ́n, taidi wekinkan hlan mẹ.—w21.05, w. 15, 16.

Etẹ na dọ wẹ apọsteli Paulu te whenue e dọ dọ: “Gbọn osẹ́n gblamẹ, yẹn kú na osẹ́n wutu”? (Gal. 2:19)

Osẹ́n Mose tọn hẹn ẹn họnwun dọ gbẹtọvi lẹ yin mapenọ bosọ deanana Islaeli yì Klisti dè. (Gal. 3:19, 24) Ehe zọ́n bọ Paulu kẹalọyi Klisti. Gbọnmọ dali, Paulu “kú na osẹ́n wutu”; osẹ́n lọ masọ do huhlọn deji ba.—w21.06, w. 31.

Nawẹ Jehovah ze apajlẹ akọndidonanu tọn dai na mí gbọn?

Jehovah ko doakọnna vlẹko he yin hinhẹnwa oyín etọn ji, nupojipetọ-yinyin etọn yin nukundiọsọ, atẹṣiṣi ovi etọn delẹ tọn, lalo Lẹgba tọn lẹ, yajiji devizọnwatọ etọn lẹ tọn, kinklan sọn họntọn etọn he ko kú lẹ go, kọgbidinamẹ mẹylankan lẹ tọn po husudo nudida etọn lẹ tọn po.—w21.07, w. 9-12.

Apajlẹ dagbe homẹfa tọn tẹwẹ Josẹfu zedai?

E doakọnna nuyiwahẹmẹ mawadodo tọn nọvisunnu etọn lẹ tọn. Ehe zọ́n bọ yè sawhẹ agọ̀ dokọna ẹn bo sú i do gànmẹ to Egipti na owhe susu.—w21.08, w. 12.

Whinwhàn yẹhiadonu tọn tẹwẹ Hagai 2:6-9, 20-22 dọ dọdai etọn?

Akọta lẹ nọ yinuwa to aliho agọ̀ mẹ gando yẹwhehodidọ Ahọluduta lọ tọn go, amọ́ mẹsusu ko yin dindọn wá nugbo lọ mẹ. To madẹnmẹ akọta lẹ na yin whinwhàn whla godo tọn bo na yin vivasudo.—w21.09, w. 15-19.

Naegbọn mí ma dona nọ gbọjọ to lizọnyizọn mítọn hinhẹndi mẹ?

Jehovah nọ mọ vivẹnudido mítọn lẹ, podọ e nọ hẹn homẹ etọn hùn. Eyin agbọ́ ma pé mí kavi eyin mí ma gbọjọ, mí na mọ ogbẹ̀ madopodo.—w21.10, w. 25, 26.

Nawẹ Levitiku weta 19tọ gọalọna mí nado yí ayinamẹ ehe do yizan mẹ gbọn: “Mì lẹzun wiwe to walọyizan mìtọn lẹpo mẹ”? (1 Pita 1:15)

E yọnbasi dọ wefọ ehe yin hoyidọ de sọn Levitiku 19:2 mẹ. Weta 19tọ lọ na apajlẹ susu gando lehe mí gán yí 1 Pita 1:15 do yizan mẹ to gbẹzan egbesọegbesọ tọn mítọn mẹ do go.—w21.12, w. 3, 4.