¿Mäkwe ñäkäbarera täräkwata Ni Mikaka Mokre mrä mrä yebätä? Ye erere ngwane, mä raba kukwe ngwantarita ne mike gare ño ye mike gare jai.

Jehová moto kwin nikrä aune tä ni mike tuen bobre jai ye Santiago 5:11 tä niere, ¿ye tä kukwe kwin meden mike gare Jehovabätä nie?

Jehová tä ni mike tuen bobre jai, yebätä tä juto biare ngite juankäre ta nibiti nita ja mike ngite ye ngwane ye gare nie. Jehová tä juto biare ni dimikakäre ja tare bökän yebiti ye Santiago 5:11 tä mike gare metre nie. Jehová tä ja ngwen ño ye erere nikwe nuaindre ye kwin krubäte (w21.01, página 21).

¿Ñobätä Jehovakwe ji dokwäte ükaninte ji ngwankäre?

Ja tare yebiti nuainbare kwe. Ye köböire Jehová mräkätre raba nüne kwin aune jäme jabe. Kukwe ükaninte ji ngwankäre ye nitre ja mräkäre tä mike ütiäte jai ngwane, nirekwe kukwe niedre mrä kukwe diankäre nuaindre jai yebätä o nirekwe ja töi mikadre kukwe den nuaindre jai ye gare kwin ietre (w21.02, página 3).

¿Ñobätä nitre kristiano ja ngübadrebiti aplicación kukwe juankäre yebätä?

Nirekwe ja töi mikadre aplicación nebiti kukwe juen ngwane, nire nire ben ja ketai kwe ye diandre kwin kwe jai. Ye ñan tä nemen nuäre nuainkäre grupo kri kukwe juankäre yebiti (1 Tim. 5:13). Ne madakäre, kukwe meden ñaka namani bare metre ye mika raba gare yete aune ja mräkätre yebiti kukwe nuain raba ngwian ganainkäre jai, ye raba nemen bare yebätä ja ngibiadrebiti (w21.03, página 31).

¿Kukwe meden medenbätä Ngöbökwe Jesús tuanimetre murie ketadre aune ja tare nike?

Kena, kukwe käme ñäkäbare nitre judío kräke yebätä Jesukwe mikani kwäre Jesús metani kribätä ngwane (Gál. 3:10, 13, TNM). Ketebukäre, Jehovakwe Jesús mikani juto biare sribi sacerdote bäri kri ye nuainkäre. Aune ketamäkäre, ni kä nebätä ja tuadre kukwe tare krubäte ben ngwane, raba ja ngwen metre Jehovai bämikani Jesukwe (Job 1:9-11) (w21.04, página 16 aune 17).

¿Nitre ñaka kwen gwi nie ngwane ni raba dre nuainne?

Ora meden te nitre tä gwi ye ngwane, ni raba niken kukwe driere. Kä mada jene jene känti ni raba niken kukwe driere arato. Aune ni raba kukwe ükete jene jene jai kukwe driekäre, ñodre nire ñaka kwen gwi nie ye kräke tärä tike (w21.05, página 15 aune 16).

“Kukwe biani ye köböire ti krütani kukwe biani ye kräke” niebare apóstol Pablokwe ngwane, ¿dre gäräbare kwe? (Gál. 2:19).

Ni kä tibienbätä töi ngite ye namani gare kukwe biani Moisés ie yebiti aune kukwe biani yebiti Israel jie ngwani Kristo kukwäre (Gál. 3:19, 24). Ye käkwe Pablo töi mikani Jesús kai ngäbiti. Ye köböire “krütani kukwe biani ye kräke”. Kukwe biani ye ñan namani mikadre täte ie (w21.06, página 31).

¿Kä ngwan nüke jai yebätä Jehovata kukwe meden bämike ni käne?

Jehovata kä ngwen nüke jai niara kä mikata ngwarbe jai yebätä, ja mikata gobran kwe rüere, monsotre ruäre kwe käkwe ja mikani rüere, Diablu tä ni ngökö käre, nitre niara mikaka täte tare kwe tä ja tare nike, ja ketamukotre kwe tä krüte, nitre käme tä nitre mada ngwen ja tare nike aune kä tibien sribebare kwe juanta ngwarbe (w21.07, página 9 nemen 12).

¿Josekwe kukwe ngibiabare bätärekä ye tä dre driere nie?

José, etebatre käkwe kukwe ñaka kwin nuainbarebätä yebätä kä ngwani nüke kwe jai. Kukwe ye köböite, kukwe ngwarbe niebare rüere aune kitani ngite kä kwati krubäte te Egipto (w21.08, página 12).

¿Kä ngrükaite medenbätä kukwe mikani gare Ageo 2:6-9, 20-22 yebätä?

Kukwe mikata gare Gobran Ngöbökwebätä yebätä juta jökrä ñaka töbike kwin, akwa nitre kwati ie kukwe metre tuen kwin. Juta jökrä ye ngrükate kebera mrä gaite ye ngwane (w21.09, página 15 nemen 19).

¿Ñobätä ni ñaka rabadre ja di ngwen nekä kukwe driebätä?

Nita ja di ngwen ye Jehovata mike ñärärä aune ye tuen kwin ie. Ni ñan rabadre dräre aune nikwe ñaka ja di ngwain nekä ngwane, ja nire käre rabai nikwe (w21.10, página 25 aune 26).

“Munkwe ja ngüba deme jondron jökräbätä” nieta, ¿ye Levítico 19 tä ni dimike ño mike täte? (1 Ped. 1:15, NGT).

Levítico 19:2 yekänti bersikulo ne dianinkä raba ruen nie. 1 Pedro 1:15 mikadre ño täte nikwe köbö kwatire kwatire yebätä kapitulo 19 tä kukwe keta kabre mika gare nie (w21.12, página 3 aune 4).