Koj puas tau muab cov Phau Tsom Faj rau xyoo no coj los ua tib zoo nyeem? Sim seb koj teb puas tau cov lus nug hauv qab no:

Hauv Yakaunpaus 5:11 qhia peb tias Yehauvas hlub thiab khuvleej peb li cas?

Yehauvas khuvleej peb yog nws zam txim rau peb thaum peb ua yuam kev. Raws li Yakaunpaus 5:11, thaum peb muaj kev nyuaj siab Yehauvas yuav pab peb. Thaum peb hlub thiab khuvleej lwm tus ces peb ua ib yam li Yehauvas ua.​—w21.01, sab 21.

Vim li cas Yehauvas thiaj tsa ib co los saib xyuas thiab coj nws tsev neeg?

Yehauvas tsa ib co ua cov coj nws tsev neeg vim nws hlub lawv thiab xav kom lawv muaj kev thaj yeeb. Yog tsis muaj ib tug coj lawv es nyias ua raws li nyias lub siab nyiam xwb ces lawv yuav tsis muaj kev thaj yeeb.​—w21.02, sab 3.

Vim li cas peb yuav tau xyuas xim thaum peb siv tej app hauv xov tooj?

Yog peb nrog ib pab neeg coob coob hauv lub app tham ces yuav nyuaj rau peb paub seb lawv yog neeg zoo li cas. (1 Timautes 5:13) Kuj tsis zoo rau peb mus mloog tej uas tsis txaus ntseeg thiab tsis muaj pov thawj qhia tias muaj tiag. Tsis tas li ntawd, cov Khixatia uas tsis qaug rau nyiaj rau kub yuav tsis muab cov kwvtij nkauj muam hauv lub koom txoos los ua lag ua luam.​—w21.03, sab 31.

Ua cas Yehauvas cia nws tus Tub raug kev tsim txom thiab cia nws tuag?

Yexus yuav tsum tuag saum tus ncej ntoo nws thiaj cawm tau cov Yudais ntawm qhov uas lawv raug foom tsis zoo. (Kalatias 3:10, 13) Tsis tas li ntawd, Yehauvas npaj tseg Yexus los ua peb tus Povthawj Hlob. Ntxiv ntawd, thiaj teb tau Xatas cov lus iab liam tias tibneeg yeej yuav tsis muab siab npuab Yehauvas thaum lawv raug kev sim siab. (Yauj 1:9-11)​—w21.04, sab 16-17.

Yehauvas Cov Timkhawv ib txhia ua li cas lawv thiaj tau nrog cov neeg uas lawv tsis ntsib tom tsev tham?

Yog hais tias lub sijhawm uas koj niaj zaus mus tsis muaj neeg nyob tsev, sim mus lwm lub sijhawm seb puas yuav ntsib lawv. Peb kuj mus tshaj tawm rau lwm qhov chaw. Lossis peb kuj sim lwm txoj hau kev xws li sau ntawv mus rau txhua tus uas tsis nyob tsev.​—w21.05, sab 15-16.

Vim li cas Paulus thiaj hais tias: “Thaum kuv tseem coj raws li [Mauxes] txoj kevcai, kuv zoo li tus neeg uas tuag lawm”? (Kalatias 2:19)

Mauxes Txoj Kevcai qhia tias tibneeg uas muaj kev txhaum yeej ua tsis tau raws li Vajtswv txoj kevcai tag tag. Thiab Yexus Khetos yuav tau muab nws txojsia theej lawv lub txhoj. (Kalatias 3:19, 24) Vim Paulus ntseeg Yexus tus nqi txhiv Vajtswv thiaj suav tias nws yog ib tug neeg ncaj ncees. Twb yog vim li no Paulus thiaj hais tias Vajtswv yog tus uas kav nws tsis yog Mauxes Txoj Kevcai.​—w21.06, sab 31.

Vim li cas peb thiaj hais tias Yehauvas yog tus siab ntev tshaj plaws?

Yehauvas tau ua siab ntev rau cov tibneeg uas tsis hwm nws lub npe, coob leej uas tawm tsam Vajtswv txojkev kav, cov uas ntxeev siab rau nws, nws ua siab ntev rau tej uas peb raug, cov uas tau tas simneej lawm, tibneeg quab yuam thiab caij tsuj lwm tus, tibneeg ua phem ua qias, thiab tseem ua rau lub ntiajteb liam sim tag lawm.​—w21.07, sab 9-12.

Vim li cas Yauxej pab tau peb rub lub siab ntev tos Yehauvas?

Nws cov tijlaug kiag, yog cov ua rau nws tu siab. Nws raug iab liam thiab raug kaw hauv tebchaws Iziv.​—w21.08, sab 12.

Hakais tshooj 2 nqe 6 thiab 20 txog 22 piav txog yam kev co twg?

Thaum tibneeg hnov txoj xov zoo peb qhia no, ib txhia yuav tig ntsej mloog tiamsis ib txhia yuav co hau nto tsis xav mloog. Qhov uas Yehauvas co zaum kawg nkaus yuav zoo tsis thooj li Hakais 2:7 lawm. Cov uas tsis kam txais yuav Vajtswv txojkev kav yuav raug puam tsuaj mus ib txhiab ib txhis.​—w21.09, sab 15-19.

Peb yuav tau nco ntsoov li cas thaum mus tshaj tawm peb thiaj muaj kev zoo siab?

Yehauvas txaus siab heev rau peb txojkev tshaj tawm. Yog tias peb ua siab ntuj ntev qhia Vajtswv Txojlus tiag ces ib hnub peb yuav tau txojsia nyob mus ib txhis.​—w21.10, sab 25-26.

Levis Kevcai tshooj 19 yuav pab kom peb ua “lub neej kom dawbhuv” li cas? (1 Petus 1:15)

Cov lus hauv 1 Petus 1:15 thiab Levis Kevcai 19:2 zoo sib xws. Tshooj 19 qhia peb ntau yam kom peb thiaj ua tau lub neej dawb huv li hais hauv 1 Petus 1:15.​—w21.12, sab 3-4.