Inai lagani ena Gima Kohorona idauidau oi duahia namonamo vadaeni, a? Mani ita itaia bema inai henanadai oi haerelaidia diba:

Iamesi 5:11 ia gwau, Iehova be “lalokau bona hebogahisi bada” Diravana, edena dala ai unai ese ita ia hagoadaia?

Ita diba Iehova be mai ena hebogahisi dainai, ia ura eda kara dika ia gwauatao. Bona Iamesi 5:11 ese ia hahedinaraia, mai hebogahisi ida ia ura ita ia durua danu. Ena haheitalai hereadaena do ita tohotohoa.​—w21.01, rau 21.

Dahaka dainai Iehova ese kwara dagina ena taravatu ia atoa?

Lalokau dainai unai ia karaia. Kwara dagina ena taravatu dainai Dirava ena ruma bese lalonai gaukara be maino bona dala maorona ai idia karaia. Ruma bese ta ta be kwara dagina ena taravatu idia badinaia dainai, idia diba daika ese disisen ginigabena ia karaia bona badinaia dalana do ia gunalaia.​—w21.02, rau 3.

Dahaka dainai Keristani taudia ese Intanet amo teks meseij aplikeisen gaukaralaia dalana do idia naria namonamo?

Bema ta ia ura unai aplikeisen ia gaukaralaia, namona be iena turadia ia abia hidi namonamo. Grup badana lalonai unai ia karaia be auka. (1 Tim. 5:13) Danu, unai grup lalonai sivarai koikoidia idia herevalaia diba, bona edia tadikaka taihu ena hetura karana idia gaukaralaia kerere diba bisinesi karadia totona.​—w21.03, rau 31.

Dahaka dainai Iesu be hisihisi ia davaria bona ia mase be Dirava ese ia koua lasi?

Badina ginigunana be, Iesu be hisihisi auna ai ia mase karana ese Iuda taudia be panisi amo ia ruhaia. (Gal. 3:10, 13) Badina iharuana be, Iehova ese Iesu dekenai treinini ia henia Hahelaga Tauna ena maduna ia huaia totona. Bona ihatoina be, Iesu ese Dirava ia badinaia ela bona ia mase ese ia hamomokania, tanobada taudia be hahetoho badadia idia davaria neganai, Iehova idia badinaia noho diba. (Iobu 1:9-11)​—w21.04, rau 16-17.

Bema haroro gaukara ai taunimanima oi davaria lasi, dahaka oi karaia diba?

Taunimanima be edia ruma ai idia noho negadiai oi haroro diba. Gabu idauna ma ta ai haroro gaukara oi karaia diba. Bona dala ma ta oi tohoa diba, hegeregere revareva oi torea.​—w21.05, rau 15-16.

Paulo ena hereva, “taravatu amo lau be taravatu dekenai lau mase,” ena anina be dahaka? (Gal. 2:19)

Mose ena Taravatu ese ia hahedinaraia Israela taudia be mai edia kara dika bona Keriso dekenai ia hakaudia lao. (Gal. 3:19, 24) Unai ese Paulo ia durua Keriso ia abia dae totona. Unai ia karaia neganai, Paulo be ‘taravatu dekenai ia mase,’ anina be Taravatu ese ia guia lasi.​—w21.06, rau 31.

Haheauka karana dekenai edena dala ai Iehova be haheitalai namona?

Iehova be ena ladana idia hadikaia, iena lohia siahuna idia dadaraia, iena natudia haida idia gwau-edeede, Diabolo ena koikoi karadia, iena hesiai taudia be hisihisi idia davaria noho, iena tura namodia momo idia mase, kara dika taudia ese ma haida idia hahisia, taunimanima edia kara be ia dika momokani, bona havaraia gaudia idia hadikaia karadia dekenai ia haheauka noho.​—w21.07, rau 9-12.

Haheauka karana dekenai edena dala ai Iosepa be haheitalai namona?

Ena be iena kakadia ese idia hahisia bada, to unai ia haheaukalaia. Aigupito dekenai ia lao bona unuseniai idia samania koikoi bona lagani momo lalonai dibura ruma ai ia noho.​—w21.08, rau 12.

Hagai 2:6-9, 20-22 ese laulau dalanai edena bamona tano mareremarere ia herevalaia?

Basileia sivaraina ita harorolaia dainai tanobada besedia idia badu, to taunimanima momo be unai sivarai idia abia dae. Kahirakahira, Dirava ese unai bese iboudiai dekenai hamarerea gaukara ginigabena do ia karaia, unai be idia ia hadikaia ore negana.​—w21.09, rau 15-19.

Dahaka dainai iseda haroro gaukara dekenai do ita hesiku lasi?

Iehova be iseda hekwarahi ia itaia bona ia moalelaia. Bema ita hesiku lasi, mauri hanaihanai do ita abia.​—w21.10, rau 25-26.

Edena dala ai Levitiko karoa 19 ese ita ia durua inai sisiba, “Emui kara ibounai lalonai do umui helaga” ita badinaia totona? (1 Pet. 1:15)

Unai siri be reana Levitiko 19:2 amo idia abia. Karoa 19 ese ita ia durua dala idauidau amo 1 Petero 1:15 ena hereva be iseda dina ta ta maurina ai ita badinaia totona.​—w21.12, rau 3-4.