A lɛ Ɔdā Ō Gbaajɛ ku ihayi nyā jé lɔɔlɔhi ɛ? Ó lɛ a, má ɔ ɔdaŋ ku a géē lɔfu cila ohi ku aɔka nyā gla:

Ujɛ́mīsi 5:11 ta alɔ ɔtu kwu ɔtu lɛyikwu ɔdi eko nɛ ó ka ku Ujehofa “gbonɛnɛ klla kē ī méyinyinyi ɔ̄cɛ” a?

Alɔ jé ka ohigbu eyinyinyi nɛ Ujehofa lɛ lɛ alɔ a, ó le tutu ō je íne ō biya ku alɔ ya alɔ ɛhi. Ujɛ́mīsi 5:11 klla cɛ lɛ alɔ jé kpɔcii ka ohigbu ihɔtu a, ó yɔ i dɔka ō ta alɔ abɔ. Alɔ cika ō gbla ɔ ya.​—w21.01, p. 21.

Ɔdiya ɛɛ nɛ Ujehofa fu ācɛ ōhī nōo géē wɛ ācɛ ō lɛ íkwu a?

Ó ya ɛnyā ohigbu ihɔtu. Ōmiya a ya kóō tɔɔtɛ lɛ apɔlɛ ku Ujehofa kóō yuklɔ ipu ɛbɔ mla ɔwɛ okpaakpa. Ɔnyɔɔnyɛ ku ācɛ ipu apɔlɛ ku nu nōo gē yuklɔ mla ōmiya nyā jé ɔcɛ nōo cika ō ya ōmiya amoomɛ, mla ɔcɛ nōo cika ō gbɔbu ya ka ōmiya a kóō le ya jila a.​—w21.02, p. 3.

Ɔdiya nɛ Ācɛ O Yɛce Ukraist cika ō leyi kwɛɛcɛ lɔɔlɔhi eko duuma néē yɔ i kɔka mla ɔdā ō le gwo uwaya amāŋ ukɔmputa ku uwa?

Ɔdaŋ ku ɔcɛ miya ka ó géē yɔ i bi uwa le yuklɔ, ó cika ō leyi kwɛɛcɛ lɛyikwu ɛdɔ ācɛ nōó gē fu kéē wɛ aoklobiya amāŋ ancɛnya ku nu a. Ɛnyā i kē gáā tɔɔtɛ ō ya ŋ, ɔdaŋ ka ācɛ nɛ alɔ lɛ ipu ɛga ō kɔka ku alɔ a le lɛwa nɛhi. (1 Utím. 5:13) Unwalu ɔhá nōo klla ya abɔɔ a wɛ ō kɔka nɛ a jɛyi nu lɔhi amāŋ nɛ ó wɛ ɔkwɛyi ŋ ma lɛ ācɛ ɔhá, amāŋ ō bi ɔ le ya ije ŋma ɛgiyi ayinɛ alɔ.​—w21.03, p. 31.

Ɔdi wɛ aɔdā ōhī nōo ya nɛ Ɔwɔico cɛ lɛ Ujisɔsi kóō má owe klla kwū a?

Ɔdā éyi nōo ya a wɛ kahinii, oŋma lɛ o lɛ Ujisɔsi playi ɛyi ɔcí a, ó ya ɔ tɔɔtɛ kóō lɛ ācɛ Ujiyu hɛta ŋma okonu ō ta éyi. (Ugal. 3:10, 13) Ɔdā ɔmpa a wɛ kahinii, Ujehofa yɔ i nwu ɔ klla yɔ i lɛ Ujisɔsi tutu ku eko nɛ ó géē je piya Otrɛyi ku Acogwɛɛya ku alɔ a. Ɔmɛta a kē wɛ ka abɔ Ujisɔsi hayi kpaakpa jaa gbeeko nɛ ó kwū a, ó mafu ka alɛɛcɛ lɔfu hayi kpaakpa gla, naana néē kóō géē yɔ i má ojama bɔbi bɔbi a. (Ujób. 1:9-11)​—w21.04, pp. 16-17.

Ɔdi nɛ a lɔfu ya ɔdaŋ ku ācɛ i tɔɔtɛ ō má ipu uklɔ ku ɔna ō ta a ŋ ma?

A lɔfu nyɔ i jila uwa ɔlɛ eko nɛ a jé ka é géē lɔfu ya ɔlɛ gla. A kē lɔfu jila ɛga ɔhá ma. A klla lɔfu nwu ō tɔɔna ɔwɛ ɔhá, bɛɛka uleta ō ta.​—w21.05, pp. 15-16.

Ɔdi wɛ ɛyi ɛlā ku Upɔlu eko nɛ ó kahinii: “Ɛ́gɛ́nɛ̄ ɔ̄cɛ ī kɛlā ā gekwú, íne ā í nā um tɔ́ɔwɛ glá gɛ ŋ́” ma? (Ugal. 2:19)

Íne ku Umosisi a mafu ɔdā nɛ ó wɛ á jila iyē ŋ ku alɛɛcɛ a lɔɔlɔhi, ó klla na ācɛ Isrɛlu ta ɔwɛ nōo géē bi uwa gā ɛgiyi Ukraist. (Ugal. 3:19, 24) Ɛnyā ya ku Upɔlu kóō miya Ukraist a. Oŋma lɛ ɔdā nɛ Upɔlu ya nyā a, ó “gekwú” íne a i na ɔ tɔɔwɛ gla gɛ ŋ.​—w21.06, p. 31.

Ɛgɛnyá nɛ Ujehofa lɛ ocabɔ taajɛ lɛ alɔ lɛyikwu ō mafu ɔtoole a?

Ujehofa humayi lɔtu iye obɔbi néē yɔ i le ce iye ku nu, ikpɛyi olɔfu néē gē ya ta ɔcɛ́ ō ce ku nu, ɛgɛ nɛ ayipɛ ɔlɛ nu gē ya ikpɛyi olɔfu ta ɔ, ɛkɛmgbɛ nɛ Ebilii gē ka eko doodu, owe nɛ ācɛ ɔlɛ nu gē má, ācɛ nōo gē kwū gwu aɔya ku uwa ta, ɛgɛ néē gē da alɛɛcɛ ɛyi taajɛ, mɛmla ɛgɛ nɛ ācɛ gē biya aɔdā nɛ ó ya a taajɛ a.​—w21.07, pp. 9-12.

Ocabɔ nyá nɛ Ujosɛfu le taajɛ lɛyikwu ō lɔtu a?

Ó lɔtu uce ō ya obɔbi nɛ ayinɛ nu ya ta ɔ a. Ɛnyā ya kéē le ije ce ba ɔ, é klla lɛ ɔ ta ipu agba ihayi alɛwa ipu Ijipiti.​—w21.08, p. 12.

Ɛdɔ ō jíla iyē ɔhá nyá nɛ ɔkpá ku Uhágāyi 2:6-9, 20-22 yɔ i kɛla lɛyikwu ɔ a?

Aéwo a i miyɛ olɛhɔ ku Ajɔɔcɛ néē tɔɔna lɛ uwa a lɔɔlɔhi ŋ, amáŋ ācɛ alɛwa humayi wa ipu ɔkwɛyi a ɛ. Ó gáā gboji gɛ ŋ, aéwo a géē jíla iyē amoomɛ eko néē kwu uwa u cataajɛ.​—w21.09, pp. 15-19.

Ɔdiya nɛ ɛ̄jɛ̄ i cika ō jɛ alɔ ō yɔ i tɔɔna ŋ ma?

Ujehofa gē má ɛgɛ nɛ alɔ gē ceyitikwu lɛ a, ó kē i cɛ lɛ ɔ gweeye. Ɔdaŋ ku alɔ i cɛ ku ɛ̄jɛ̄ kóō jɛ alɔ ŋ, alɔ géē lɛ oyeeyi opiyoo.​—w21.10, pp. 25-26.

Ɛgɛnyá nɛ ɔkpá ku Ulīfayi ɛyi 19 gáā ta alɔ abɔ ku alɔ yuklɔ mla ukɔ́ nōo kahinii: ‘Aá lɛ iyī aá yá tīihɔ ipu uce ku aa duudu’ a? (1 Upít. 1:15)

Ó lɛbɛɛka ɛga ku Ubáyíbu ɔɔma wɛ ɛlā nēé je ŋma ɔkpá ku Ulīfayi 19:2 a. Ɛyi 19 mafu ocabɔ alɛwa lɛyikwu ɛgɛ nɛ alɔ lɔfu yuklɔ mla ɛlā nōo yɔ ipu ɔkpá ku 1 Upíta 1:15 ipu oyeeyi ku alɔ a.​—w21.12, pp. 3-4.