Binasayo kadin a naimbag dagiti ruar Ti Pagwanawanan ita a tawen? Kitaenyo no masungbatanyo dagitoy a saludsod:

Ania ti ipasigurado ti Santiago 5:11 idi imbagana a ni Jehova ket “nadungngo unay” ken “naasi”?

Ammotayo a gapu iti asi ni Jehova, sisasagana isuna a mangpakawan kadagiti kamalitayo. Ipasigurado ti Santiago 5:11 a sidudungngo a kayatna a tulongannatayo. Nagsayaat no tuladentayo isuna.​—w21.01, p. 21.

Apay nga inyurnos ni Jehova ti kinaulo?

Gapu iti ayat. Gapu iti kinaulo, natalna ken naurnos ti matalek a pamiliana. Tunggal miembro ti pamilia a mangsursurot iti dayta nga urnos, ammona no asino ti mangaramid kadagiti pinal a desision ken no asino ti mangipatungpal kadagita.​—w21.02, p. 3.

Apay a masapul nga agannad dagiti Kristiano iti panagusar kadagiti electronic messaging application?

No usaren ti maysa a tao dagiti kasta nga application, masapul a pilienna a naimbag dagiti pakikomunikaranna. Narigrigat dayta iti dadakkel a messaging group. (1 Tim. 5:13) Adda met dagiti peggad a kas iti pannakaiwaras dagiti saan a kompirmado a report ken ti pananggundaway kadagiti kakabsat tapno makakuarta.​—w21.03, p. 31.

Ania ti dadduma a rason nga impalubos ti Dios nga agsagaba ken matay ni Jesus?

Ti maysa a rason ket mawayawayaan dagiti Judio iti lunod gapu iti pannakaibitin ni Jesus iti kayo a pagtutuokan. (Gal. 3:10, 13) Maikadua, sansanayen idi ni Jehova ni Jesus para iti akemna kas Nangato a Padi. Ken ti maikatlo, ti kinamatalek ni Jesus agingga ken patay ti mangpaneknek a kabaelan dagiti tattao ti agmatalek uray makapasarda kadagiti nagkaro a pannubok. (Job 1:9-11)​—w21.04, p. 16-17.

Ania ti mabalinmo nga aramiden no narigat a mabirokan dagiti tattao iti ministerio?

Padasem ti mangasaba iti oras a mas posible nga addadan iti balayda. Padasem met ti mangasaba iti sabali a lokasion. Ken padasem ti sabali a pamay-an, kas iti panagsurat.​—w21.05, p. 15-16.

Ania ti kayat a sawen ni apostol Pablo idi imbagana: “Babaen ti linteg, natayak para iti linteg”? (Gal. 2:19)

Pinagminar ti Mosaiko a Linteg ti kinaimperpekto ti tao ken inturongna ti Israel iti Kristo. (Gal. 3:19, 24) Gapu iti dayta, inawat ni Pablo ni Kristo. Kas resultana, ni Pablo ket ‘natay para iti linteg’; isu ket awanen iti sidong ti Linteg.​—w21.06, p. 31.

Kasano nga inyulidan kadatayo ni Jehova ti panagibtur?

Ib-ibturan ni Jehova ti pannakalais ti naganna, ti pannakabusor ti kinasoberanona, ti panagrebelde ti dadduma nga annakna, dagiti di agbalbaliw a kinaulbod ti Diablo, ti panagsagaba dagiti adipenna, ti pannakaisinana kadagiti gagayyemna a natayen, ti pannakairurumen dagiti tattao, ken ti pannakadadael dagiti parsuana.​—w21.07, p. 9-12.

Kasano a nagsayaat nga ulidan ni Jose iti kinaanus?

Inibturanna ti di nainkalintegan a panangtrato dagiti manongna. Nagresulta dayta iti siuulbod a pannakapabasol ken pannakaibaludna idiay Egipto iti adu a tawen.​—w21.08, p. 12.

Ania a simboliko a pananggunggon ti impakpakauna ti Haggeo 2:6-9, 20-22?

Saan a kayat dagiti nasion a maikasaba ti Pagarian, ngem adu a tattao ti maal-allukoy iti kinapudno. Din agbayag, mapasaranto dagiti nasion ti maudi a pananggunggon inton madadaelda.​—w21.09, p. 15-19.

Apay a ditay sumuksuko a mangitungpal iti ministeriotayo?

Kitkitaen ni Jehova dagiti panagreggettayo, ken maragsakan kadagita. No ditay mabannog wenno sumuko, magun-odantayo ti biag nga agnanayon.​—w21.10, p. 25-26.

Kasano a makatulong ti Levitico kapitulo 19 tapno mayaplikartayo daytoy a balakad: “Agbalinkayo a nasantuan iti amin a kababalinyo”? (1 Ped. 1:15)

Dayta a teksto ket mabalin a nakotar manipud iti Levitico 19:2. Mabasatayo iti kapitulo 19 ti adu a pagarigan no kasano a mayaplikartayo ti 1 Pedro 1:15 iti inaldaw a panagbiagtayo.​—w21.12, p. 3-4.