Uwẹ be sẹ gbẹlokotọ tie ene ebe Ọkhẹughe nan ne dagbare bhi ọne ukpe nan? Fẹghe si uwẹ dẹ sabọ re ewanniẹn ọbhi ene inọnta nan:

Be ọkhẹke nin mhan ha mhọn bhi ọkhọle ranmhude ene ikpọta ne ribhi James 5:11 nọn yọle, “Jehova manman mhọn ẹkẹ-ẹjẹjẹ” bi “itohan”?

Mhan lẹnmhin ghe, ranmhude Jehova mhọn itohan, ọle muegbe nin ọle rẹ rẹhunmhan olukhọ nesẹmhan. James 5:11 rẹkpa mhan rẹ lẹn ghe Jehova manman mhọn ẹkẹ-ẹjẹjẹ. Bhiriọ, ọle guanọ nin ọle rẹkpa mhan. Ọkhẹke nin mhan re egbe ha khọkhọ ọle.​—w21.01, p. 21.

Bezẹle nin Jehova da mhanmhanlẹn nin ẹbho eso ha ribhi ihe?

Oyẹẹ nin Jehova mhọn zẹle nin ọle da mhanmhanlẹn nin ẹbho eso ha ribhi ihe. Ọnan zẹle nin azagba-uwa nọnsi Jehova da sabọ lu emhin kugbe bhi ọfure. Ọdeọde bhi azagba-uwa ne re obọ rẹkhan ọne emhanmhan nan lẹn ọnọn khẹke nọn zẹ emhin nan ha lu, yẹ mun ọkalo rẹ lu ene emhin.​—w21.02, p. 3.

Bezẹle nọn da khẹke nin Kristiẹn mhọn ẹwanlẹn sade ele noo foni rẹ gbẹn ebe je ẹbho?

Ahamiẹn ọria zẹ nin ọle rẹ ha noo ifoni rẹ ne ẹbho lu imọẹ bhi intanẹti, ọkhẹke nin ọle re ẹwanlẹn rẹ ha zẹ imọẹ nesọle. Ọnan wo manman nọghọ nan rẹ lu sade mhan deba usun nin ẹbho ne bunbun ye bhi intanẹt. (1 Tim. 5:13) Okhẹnan ọbhebhe yẹ ribhọ bọsi, ọta nan bha fẹghe si ẹmhọanta nọn, bi nan rẹ re ẹmhọn agbotu rẹ ha khu igho.​—w21.03, p. 31.

Emhin eso nela zẹle nin Osẹnobulua da ji Jesu da loya yẹ yu?

Emhin ọhẹnhẹn nọn zẹle hi, nan rẹ khan iJesu mun oran, a da fan ibhokhan iJew fia bhi ihẹn nin ele ha ye. (Gal. 3:10, 13) Emhin nọnzi eva hi, Jehova da re ọnan rẹ ha mun iJesu egbe ọbhi otọ khẹ ebi ọle ha lu bhi ẹghe odalo sade ọle kiẹn Ojohẹn. Emhin nọnzi ea hi, uwedẹ nin Jesu rẹ sun rẹkhan Jehova da rẹman ghe, eria dẹ sabọ sun rẹkhan Jehova aharẹmiẹn ele ribhi ọnọghọ nọn manman kaka. (Job 1:9-11)​—w21.04, pp. 16-17.

Be uwẹ ha sabọ lu ahamiẹn ghe uwẹ ikẹ miẹn ẹbho tẹmhọn Osẹnobulua man?

Dọnmhegbe rẹ ha tẹmhọn Osẹnobulua bhi ẹghe nin uwẹ ha rẹ ke ẹbho re. Dọnmhegbe yẹ dọ tẹmhọn Osẹnobulua bhi eji uwẹ ha da ke ẹbho re. Sẹyẹ, dọnmhegbe rẹ noo uwedẹ ọbhebhe rẹ ne ẹbho talọ, bọsi nan rẹ gbẹn ilẹta je ẹbho.​—w21.05, pp. 15-16.

Be bhọ Paul nin odibo ha mhọn bhi ọkhọle ẹghe nin ọle rẹ yọle: “Rẹ na bhi obọ uhi mẹn da yu nin uhi”? (Gal. 2:19)

Uhi nin Osẹnobulua na bhi obọ iMoses gbe da re idobọ ọsi eria man nọnsẹn. Sẹyẹ, ọ da yẹ rẹkpa ibhokhan Izrẹl bu iKristi. (Gal. 3:19, 24) Ranmhude ọnan, Paul da miẹn iJesu ọbhi egbe. Bhiriọ, Paul da “yu nin uhi”; ọne uhi bha yẹ miẹn ije soso nọn da rẹso ọle.​—w21.06, p. 31.

Be iJehova rẹ re ijiẹmhin ọbhi otọ yẹ rẹji ziẹngbe, nin mhan ha yẹ sabọ re egbe khọkhọ?

Jehova ziẹngbe orẹsin nan rẹ sin elin nọnsọle, uwedẹ nin ẹbho rẹ ha ne ugbẹloghe nọnsọle suan, imọn nesọle ne sọtẹ da ọle, ohoghe nin Esu sẹyẹ bha ọle le, iloya nin eguọmhandia nesọle le, imọẹ ọle ne yu, uwedẹ nin ẹbho ne imhẹn rẹ ha denyẹnyẹn ẹbho, bi uwedẹ nin ẹbho rẹ ha riia ọne otọ nan an, nin Jehova manlẹn.​—w21.07, pp. 9-12.

Ijiẹmhin esili nela Joseph re ọbhi otọ rẹji nan rẹ ha mhọn iziẹngbe?

Joseph wo loya bhi obọ ibhio ọle. Ranmhude ọnan, a da mun ohoghe gbe ọle yẹ mun ọlẹn khue bhi ighan bhi otọ Egypt rẹ na bhi ikpe ne bunbun.​—w21.08, p. 12.

Unan ulueghemhin nela Haggai 2:6-9, 20-22 tẹmhọnlẹn?

Ẹkẹ khọ ene agbaẹbho ranmhude ẹmhọn Agbejele nin mhan wewe. Sokpan, ẹbho ne bunbun vae dọ ha ga iJehova. Bhi ẹghe nọn bha yẹ ree gbe nian, a dẹ lueghe ene agbaẹbho kike bhi ẹghe nan ha rẹ fuẹn ele a.​—w21.09, pp. 15-19.

Bezẹle nọn bha da khẹke nin mhan ji egbe lọ mhan beji mhan rẹ lu iwẹnna itẹmhọn Osẹnobulua?

Jehova daghe ebi mhan rẹ dọnmhegbe yẹ. Sẹyẹ, ẹmhọn mhan ti ọle bhọ. Ahamiẹn mhan bha ji egbe lọ mhan, mhan ki miẹn iẹnlẹn ighegheghe.​—w21.10, pp. 25-26.

Be Leviticus uhọnmhọnlẹn nọnzi 19 ha rẹ rẹkpa mhan rẹ re obọ rẹkhan ọne adia nọn yọle: “Bha dọnmhegbe rẹ kpe khia bhi ilọnmhọn nesẹbha rebhe”? (1 Pet. 1:15)

Asabọmiẹn ebe ribhi Leviticus 19:2, ọle ọne ulọnlẹn nin tẹmhọnlẹn. Ijiẹmhin ne bunbun ribhi uhọnmhọnlẹn nọnzi 19, ne rẹman ebi mhan ha rẹ sabọ ha re obọ rẹkhan ibhude nọn ribhi 1 Peter 1:15 yẹ bhi iẹnlẹn nọnsẹmhan ukpẹdẹ-ukpẹdẹ.​—w21.12, pp. 3-4.