Kọ whọ romatotọ se Uwou-Eroro nọ a siobọno enukpe nana? Dai rri sọ whọ sae kẹ iyo enọ nọ e rrọ obotọ na:

Obe Jemis 5:11 o ta nọ Jihova “ọ rrọ yoyou gaga” je “wo ohrọ-oriọ,” eme ẹme nana o fiobọhọ kẹ omai riẹ?

Ẹme yena o fiobọhọ kẹ omai riẹ nọ Jihova o wo ohrọ gaga, fikiere ọ rẹ rọvrẹ omai nọ ma te ruthọ. O tẹ jẹ lẹliẹ omai riẹ nọ Jihova o re fiobọhọ kẹ omai keme o you omai gaga. Yọ u fo nọ ma rẹ rọ aro kele iei.​—w21.01, ẹwẹ. 21.

Fikieme Jihova o ro ru re ahwo jọ a wuzou amọfa?

Jihova o you omai jabọ nọ o ro ru ere. Oware nana nọ o ru na o be whae ze nọ eware e be rọ riẹ nya evaọ uviuwou riẹ, udhedhẹ o tẹ jẹ rrọ udevie mai nọ ma rrọ ahwo uviuwou riẹ. Ohwo kpobi evaọ uviuwou nọ o bi lele ọruẹrẹfihotọ Jihova nana ọ rẹ riẹ ohwo nọ ọ rẹ ta nọ enẹ gbe enẹ ma re ru evaọ uwou na, gbe ohwo nọ ọ rẹ ruẹ nọ eware nọ a ta na a ru rai.​—w21.02, ẹwẹ. 3.

Fikieme u ro fo re Oleleikristi ọ yọroma kpahe eware nọ a re ro vi uwou se amọfa evaọ itanẹte?

Oniọvo jọ ọ tẹ gwọlọ nọ ọ rẹ hae rọ eware itieye na vi uwou se ahwo evaọ itanẹte, ọ rẹ daoma roro kpahe oghẹrẹ ahwo nọ ọ rẹ jọ etẹe mu usu kugbe. Rekọ o rrọ bẹbẹ re o ru ere nọ ahwo buobu a tẹ rrọ utu nọ a rẹ jọ vi uwou se ohwohwo. (1 Tim. 5:13) Eria itieye na e tẹ jẹ rrọ yoyoma keme a rẹ jarai gbiku atanọ atanọ hayo tubẹ rọ inievo na kọ okọ.​—w21.03, ẹwẹ. 31.

Eware jọ vẹ e wha riẹ ze nọ Ọghẹnẹ ọ rọ kuvẹ re Jesu ọ reoja je whu?

Orọ ọsosuọ, Jesu nọ a kare fihọ ure kpe na u ru nọ ehao jọ nọ a bọwo ahwo Ju u ro no ai uzou. (Gal. 3:10, 13) Orọ avọ ivẹ, Jihova ọ rọ ere wuhrẹ Jesu re ọ sae jọ emamọ Ozerẹ Okpehru evaọ obaro. Orọ avọ esa, Jesu ọ rọ ere dhesẹ nọ ohwo-akpọ ọ sae ginẹ gọ Ọghẹnẹ te urere nọ edawọ ilogbo e tẹ maki tei. (Job 1:9-11)​—w21.04, ẹwẹ. 16-17.

Eme whọ rẹ sai ru nọ a gbẹ be hae kake jọ ẹkwotọ usi uwoma ota rai di ahwo họ uwou hu?

Whọ sai kpohọ usi uwoma evaọ oke nọ whọ riẹ nọ ahwo a te mae rọ jọ uwou. Whọ sae jẹ nyae ta usi uwoma evaọ oria ofa nọ whọ riẹ nọ ahwo a rẹ jọ. Whọ sae jẹ rọ oghẹrẹ ọfa ta usi uwoma. Wọhọ oriruo, whọ sai kere ileta.​—w21.05, ẹwẹ. 15-16.

Eme họ otọ ẹme Pọl ukọ na, nọ ọ ta nọ: “Mẹ rọ ẹkwoma ekoko uzi whu no evaọ abọ uzi”? (Gal. 2:19)

Uzi Mosis na u ru ahwo riẹ vevẹ nọ ohwo-akpọ nọ a yẹ avọ uzioraha ọ sai koko Uzi na gbagba ha, u te je su ahwo Izrẹl bru Kristi na. (Gal. 3:19, 24) Uzi na o tẹ rọ ere fiobọhọ kẹ Pọl fi ẹrọwọ họ Jesu. Ere Pọl o ro ‘whu evaọ abọ uzi,’ koyehọ Uzi na u gbe tei hayo wo ẹgba evaọ oma riẹ hẹ.​—w21.06, ẹwẹ. 31.

Eware vẹ Jihova o bi thihakọ rai nọ u dhesẹ nọ u fo re ma rọ aro kele iei thihakọ?

Jihova o bi thihakọ eware nana. Odẹ riẹ nọ a be raha, a be wọso ẹe gbe esuo riẹ, emọ riẹ jọ a wọso ẹe, erue nọ Setan o bi gu, uye nọ o be bẹ idibo riẹ, egbẹnyusu riẹ nọ i whu siọ iẹe ba no, ahwo omuomu nọ a bi kienyẹ ahwo, gbe emama riẹ nọ ahwo-akpọ a be raha.​—w21.07, ẹwẹ. 9-12.

Eme Josẹf o thihakọ riẹ, nọ o ro fi emamọ oriruo hotọ kẹ omai?

Inievo Josẹf a kienyẹe, jẹ zẹe. Uwhremu na, a te gu ọrue fihọ iẹe uzou je fi ei họ uwou-odi ikpe buobu evaọ obọ Ijipti. Rekọ o thihakọ hẹrẹ Jihova ghelọ ebẹbẹ na.​—w21.08, ẹwẹ. 12.

Oghẹrẹ enuhu vẹ a ruẹaro kpahe evaọ obe Hagai 2:6-9, 20-22?

Eva e be dha ahwo erẹwho na fiki usi uwoma Uvie na nọ ma be ta, rekọ ahwo buobu a bi kurẹriẹ. Kẹle na, Ọghẹnẹ o ti nuhu erẹwho na kpobi evaọ orọ urere, koyehọ ẹraha nọ a te raha ahwo nọ a riẹ Ọghẹnẹ hẹ.​—w21.09, ẹwẹ. 15-19.

Fikieme usi uwoma ota na o gbẹ rọ bẹ omai no ho?

Jihova o bi muẹrohọ epanọ ma be daoma te, yọ eva mai e be were iẹe. Usi uwoma ota na o gbẹ bẹ omai no ho, ma ti wo uzuazọ ebẹdẹ bẹdẹ.​—w21.10, ẹwẹ. 25-26.

Ẹvẹ eme nọ e rrọ Iruo-Izerẹ izou 19 e sai ro fiobọhọ kẹ omai lele ohrẹ nana: “Whai omarai wha jọ ọrẹri evaọ uruemu rai kpobi”? (1 Pita 1:15)

Ẹsejọhọ obe Iruo-Izerẹ 19:2 Pita ọ ta ẹme yena no ze. Eware buobu e riẹ nọ ma jọ Iruo-Izerẹ izou 19 wuhrẹ. Ma te bi ru ai, kiyọ ohrẹ nọ o rrọ 1 Pita 1:15 ma bi lele na.​—w21.12, ẹwẹ. 3-4.