Eqqaamavigit?
Napasuliaq Alapernaarsuiffik-mi allaaserisat 2021-mi saqqummersinneqartut atuaqqissaarpigit? Apeqqutit tulliuttut akisinnaavigit?
Jaaku 5:11-mi Jehovap ‘nallittuingaarnera saammaassingaarneralu’ allaatigineqarnerannit suna ersersinneqarpa?
Nalunngilarput Jehovap nallittuingaartuugami isumakkeerfigerusuttaraatigut. Aamma Jaaku 5:11-mi ersersinneqarpoq asannilluni ikiorusuttaraatigut. Ilaartariaqarparput. – w21.01, qupp. 21.
Sooq Jehova oqartussaassusiliiva?
Asanninneq kajumississutigalugu taamaaliorpoq. Ilaquttani aalajaatsut eqqisseqatigiillutillu aaqqissuussaalluartumik kiffartorsinnaaqqullugit oqartussaassusiliivoq. Ilaqutariit Jehovap aaqqissuussineranik malinnittut nalunngilaat ilaqutariinni kina aalajangiisuusassanersoq kinalu aalajangikkanik piviusunngortitsisassanersoq. – w21.02, qupp. 3.
Sooq kristumiut allaqatigiittarfinnik elektroniskiusunik atuinerminni mianersortariaqarpat?
Kristumiup allaqatigiittarfinnik atuisartup kikkut attavigisarnerlugit eqqumaffigisariaqarpaa. Gruppinut amerlasuukkuutaarfiusunut akuugaanni taamaaliornissaq ajornarnerussaaq. (1 Tim 5:13) Aamma tusakkanik uppernarsaatissaqanngitsunik ingerlatitseqqiinermut uppeqatinillu niuernikkut iluanaarniarfiginninnermut tunngatillugu mianersortariaqarpugut. – w21.03, qupp. 31.
Sooq Jiisusip naalliutsitaanissaa toqutaanissaalu Jehovap akueraa?
Siullertut, Jiisusi nappakkamut nivinngarneqartariaqarpoq juutit perloqqusaaneranniit aniguisikkumallugit. (Gal 3:10, 13) Aappaattut, Jehovap Jiisusi palasiunertut ilinniartikkumallugu naalliunnissaa akueraa. Pingajuattut, Jiisusip toqumut aalajaakkami uppernarsarpaa inuit sakkortuumik misilinneqaraluarlutik aalajaattuarsinnaasut. (Job 1:9-11) – w21.04, qupp. 16-17.
Inuit naapikkuminaakkaangata susinnaavit?
Inuit angerlarsimanissaat ilimagigaangakku oqaluussisarit. Aamma sumiiffinni assigiinngitsuni oqaluussisinnaavutit. Periuutsillu allat misilissinnaavatit, soorlu allakkatigut oqaluussineq. – w21.05, qupp. 15-16.
Apustilip Paulusip ‘inatsisitigut inatsisinut toqunerarami’ suna pivaa? (Gal 2:19)
Mosesip inatsisai iluaqutigalugit paasinarsisimavoq inuit naammalluinnanngitsuusut, Israelikkullu paasisinnaalerpaat kina Kristusiunersoq. (Gal 3:19, 24) Taakku pissutigalugit Paulusip Kristusi upperilerpaa. Taamaaliorami ‘inatsisinut toquvoq’, tassa inatsisit taakku Paulusimut atuukkunnaarput. – w21.06, qupp. 31.
Jehova Guuti pinertusaarnermut tunngatillugu qanoq maligassaalluarnerpaava?
Atimi nikanarsarneqarnerani, kisimi oqartussaanermi akerlilersorneqarnerani, qitornami ilaasa pikitsitsineranni, Saatanimit salluliuutigineqartuarnermini, kiffami asangaakkami naalliunneranni, ikinngutiminit toqusimasunit avissaaqqanermini, inuit inunnit ajortunit naqisimaneqarneranni aamma pinngortitarsuup aseroriartuinnarnerani Jehova pinertusaarsimavoq. – w21.07, qupp. 9-12.
Utaqqisinnaassuseqarnermut tunngatillugu Josefi qanoq maligassaalluarpa?
Qatanngutiminit naapertuilluanngitsumik pineqarpoq. Tamatuma kingunerisaanik Egyptenimi eqqunngitsumik unnerluussaallunilu ukiorpassuarni parnaarussaaqqavoq. – w21.08, qupp. 12.
Haggaji 2:6-9, 20-22 sajutsitsineq assersuutaasoq suna siulittuutigineqarpa?
Kunngeqarfimmik tusarliussarput inuiannit nuannarineqanngilaq, inuppassuilli Jehovamut kiffartulerput. Qanittukkut inaarutaasumik sajutsitsinermi inuiaat suujunnaarsinneqassapput. – w21.09, qupp. 15-19.
Sooq oqaluussinermi uniinnassanngilagut?
Jehovap ilungersornigut maluginiartarpai nuannaarutigalugillu. Qasunngikkutta, tassa uniinnanngikkutta, naassaanngitsumik inuusinnaalissaagut. – w21.10, qupp. 25-26.
Petrusi ima siunnersuivoq: “Inuunissigut tamatigut illernartuussaasi.” (1 Petr 1:15) Tamatuminnga maleruaanitsinni suna iluaqutigisinnaavarput?
Versimi tamatumani allassimasut Mosesimik allakkat pingajui 19:2-mit issuaanerugunarput. Petrusip allagai siulliit 1:15 ulluinnarni qanoq maleruarneqarsinnaaneranik Mosesimik allakkat pingajuini kapitali 19-imi siunnersuuterpassuaqarpoq. – w21.12, qupp. 3-4.