Udy mubalok bibij-bij bya Cibumb cya Muteetekel bishaal eeby bilengel menmen eeny? Nook, teetaak ning udy mwa kwaalaabul majooj maloolond aam:

I biny bidy Jak 5:11 wiitwambil bwa mudy Yehow mwiikal ni “lukat lukasakan menmen” ni “lus”?

Tudy bamanyik neey: Yehow udy ni lus, uvuuvulaminok bilem biitut. Mukand a Jak 5:11 wiitujaajaadikil neey: Yehow i mwiitukat ni ukaakaam kwiitwambulwiish. Tuloolong bilengel hatumwiidiidikij.​—w21.01-SH, diib. 21.

Bwabiny Yehow i mwaakish baat bakwaabw bufumw?

I mulong nook, bwaal udy ni lukat. Kulongolol ook kwambambulwiish bwa cisak cya Yehow cishikat talal, ni myand yilongek bilengel. Muut woos wa mu cisak uloolong myand yumvumvwangan ni bulongolody oobw, i mumanyik muut udyobw boomekel bujit bwa kwangat mahangadik ma bulekel ni i yiy wiibaloolombol ni wiibakuukumbajil bikaakaamobw.​—w21.02-SH, diib. 3.

Bwabiny i bilengel bwa biin Krist biikal ni budimw hadyobw bafund myand mu program yilong bwa kufundilangan mesaaj mu byaamw?

Hady muut usungul program kahand yidyey mwa kukal naay mudimw mu myand ya byaamw, bikaam amanyik baat badyey mwa kusungul bu balund ba kwiisambey naabw. Bidy ni buseeb buvul diib ditukaakaam kutweel mu tusumbw twa kufundilangan mesaaj mu byaamw. (1 Tim. 5:13) Kudy cikwaabw buhund hatumwaamwangalaj myand yitudy katuy ni bijaadik ni kukal mudimw ni myand ya bulongolody bwa Mawej hakutweejomw myand ya mushing bwa bihacil biibuh.​—w21.03-SH, diib. 31.

Bwabiny Mawej waakady mwiitab bwa Yeez akeng ni afw?

Bwaal bwa kuuhal, byaakady bikaam bahoohel Yeez ha mutond, bwa kukuuley biin Yuud ku mulaw waakadyobw biibeel. (Kal. 3:10, 13) Bwaal bwiibiidy waakady mukat bwa Yeez hashaal Mutam a Balambul ba milambw. Ni bwiisaat waakady mulek bwa Yeez akeng bikasakan bwa kuleejey mudyey ni lulamat ning mu mateet ma mushind kaay. (Yoobw 1:9-11)​—w21.04-SH, diib. 16-17.

I biny biwudy mwa kulong ning biby bikukasakeen bwa kuhet baat mu mudimw a bukajaady?

Tudy mwa kudiil baat musah meeb matutaatal neey: tudy mwa kwiibasangan ku cibel. Tudy mwa kudiil cikwaabw baat musah ha kushiitulul cyaab citudy mwa kwiibahetel. Ni udy mwa kukal mudimw ni mishind yikwaabw, bu mudy kufundilangan mikand.​—w21.05-SH, diib. 15-16.

I biny byaakady mupostol Pool ukaam kuleeb ambiley neey: “Bwaal, bwa ha bitaatal may ma Mawej maheeley Moyiz nady mufw”? (Kal. 2:19)

Mikenj yaakady yileej hatook neey: baat kabiin bawaakan ni i balong ba mpekaat ni yaakady yilombol biin Izaleel teng ni kudy Krist. (Kal. 3:19, 24) Pool waakady uleeb naak bwaal waakady mwiitab Krist. Mu mushind oow, Pool waakady “mufw bwa may ma Mawej maheeley Moyiz;” mikenj kayaakadyoh bend ni bukookesh kudyey.w21.06-SH, diib. 31.

I mushind kaay udy Yehow mwiitushiil cileejel cya kutaatameen?

Yehow i mutaatameen bwa mudyobw batobolol diijin dindiy, bwa mudyobw balwiish bufumw bwindiy, ni bu mudy baan bindiy bakwaabw bamutombokel, bwa makos ma Dyabol, bwa makab maheehet biin mudimw bindiy, bwa balund bindiy baakady bafw, bwa mudy baat babiih bakengesh bakwaabw ni kunyanguk kwa cisak cya baat, ni mudy baat boony bulab budy Mawej muhang.​—w21.07, diib. 9-12.

I cileejel kaay cilengel cidy Yozeefw mwiitushiil cya kutukij?

Yozeefw waakady mutaatameen myand yibiih yaakady ba yaayend bamulongel. Baakady bamudingidilomw myand ya makos ni kumumbobw mu lukan mu Ejipit bwa mivw yivul.​—w21.08, diib. 12.

I kuvumakany kaay kwa mu cimfwany kudyobw baleeb mu mukand a Hakayih 2:6-9, 20-22?

Baat ba bis bikwaabw baleelek musah a Bukaleng utudiidiil baat, ki myand ya biin-biin i yikok baat bavul mu bulongolody bwa Yehow. Mu kalung kakeeh oomw biiyiiy kuvumakany bwa musang a bulekel bis bya baat hadyobw biiy kwiibibutul.​—w21.09, diib. 15-19.

Bwabiny katwiin mwa kuhingomw haanyim mu mudimw iitut a bukajaady?

Yehow utaatal kwiikashishomw kwiitut, ni udy ni musangal. Tut katuy bahing haanyim bwa mudimw a Mawej utukaakal, twiiyiiy kuhet buumy bwa mwendeleel.​—w21.10, diib. 25-26.

I mushind kaay udy mukand a Biin Leevy shapitil 19 wiitwambulwiish bwa kukooyel mubel wa neey: “Iikalaay baat bajilang mu kushikat kwiinun koos”? (1 Py. 1:15)

Verseh oow udy bu udyobw bateel mu mukand a Biin Leevy 19:2. Shapitil a 19 udy ni bileejel bivul bya mushind utudy mwa kukooyel mubel udy mu 1 Pyeel 1:15 mu shikacil iitut a mafuk moos.​—w21.12, diib. 3-4.