Wunewasoma ndeke esyogazeti sy’Akaleberyo esy’omwaka ono? Thalebyanu nga wangana subirya okwa bibulyo bino:

Esyonyimbo 103:8 hakathuha erikakasya lyahi hakabugha hathi Yehova ni “w’olhwanzo olhuthyusa” ‘n’ow’erighanyira [olhukogho]’?

Thunasi ngoku, busana n’olhukogho, Yehova akathughanyira ebibi byethu. Kandi Esyonyimbo 103:8 hakathukakasaya ngoku busana n’olhwanzo anzire erithuwathikya. Thukakolha ndeke thukamugherererya.​—w21.01, olhup. 21.

Ni kyahi ekyaleka Yehova iniahiraho endegheka y’obukulhu?

Akolha eki busana n’olhwanzo. Endegheka eyi yikaleka erihiika liwe erithaleghulha iryakolongana omwa buholho n’omwa buyithondeke. Obuli mundu omw’eka oyukaghendera okwa ndegheka eyi akaminya nga nindi oyutholere erithwamu eky’erighunzerera kandi nga nindi oyukendi lhangira athi kikaghenderawako.​—w21.02, olhup. 3.

Busana naki Abakristayo batholere ibayitheya bakakolesya esyondegheka esy’etekinologia esy’erithumirana esyomeseji?

Omundu amathwamu erikolesya esyondegheka ng’esyo, atholere iniaminya abo akakolongana nabu. Ekyo kikalire erikolha bikahika okw’ingira omwa syogurupu sy’erithumirana esyomeseji esiri mw’abandu banene. (1 Tim. 5:13) Kandi hane akabi akali omw’ilhalhania ebinyambwirwa n’erikolesya esyongangirira esy’ekiteokrasi ng’enzira y’erikoleramu esyosente.​—w21.03, olhup. 31.

Ni nzumwa nga syahi esyaleka Nyamuhanga inialighira Yesu eriaghalhwa n’eriholha?

Enzumwa nguma yiri yithi Yesu erihanikwa okwa muthi, mukyaleka ikyathokekana Abayuda eribya bwiranda okw’ithakirwa. (Gal. 3:10, 13) Eyakabiri yiri yithi Yehova abya iniakathendeka Yesu busana n’olhukwamirwa lhwiwe ng’Omuhereri Mukulhu. N’eyakasathu yiri yithi Yesu eribya muthaleghulha erihika okwa lhuholho mukyakangania ngoku abandu bangana sighalha bathaleghulha nomubanga lengwako kutsibu. (Yobu 1:9-11)​—w21.04, olhup. 16-17.

Wanga kolhaki kyamabya ikikalire eribana abandu omw’ithulira?

Wangana lengesya eribahikako okwa ndambi eyo banga banikiramo eka. Kandi wangana lengesya erithulira omo yindi myanya. N’ekindi, wangana lengesya eyindi nzira y’erithulira, ng’erihandika esyobaruha.​—w21.05, olhup. 15-16.

Omukwenda Paulo amanyisayaki akabugha athi: “Omo mwatsi w’Emighambo nabiriholha”? (Gal. 2:19)

Emighambo ya Musa muyabisulha obuthahikana bw’abandu kandi muyasondolha Abaisraeli erihika oku Kristo. (Gal. 3:19, 24) Eki mukyaleka Paulo inialigha Kristo. Erikolha ekyo, Paulo ‘mwaholha busana n’emighambo’; yabya isiyikimuwitheko buthoki.​—w21.06, olhup. 31.

Yehova abirithuhiriraho athi eky’erileberyako eky’erikangania eriyiyinia?

Yehova abirighumira eky’erina liwe erikinibwa, erihakanisya ehamuli yiwe y’erithabalha, eriyisamambulha ly’abandi baana biwe, amabehi wa Sitani aw’olhughumerere, eriaghalhwa ly’abaghombe biwe, abanywani biwe eriholha, ababi erinubya abandu, n’abandu eritsandya ebihangikwa biwe.​—w21.07, olhup. 9-12.

Yozefu mwahiraho eky’erileberyako kyahi ekyuwene eky’erighumisirizya?

Mwayiyinia baghalha babu bakamukolha nabi. Ekyo mukyaleka iniahangirirwa n’erihirwa omwa ngomo e Misiri habw’emyaka.​—w21.08, olhup. 12.

Ni suka-sukania lyahi erikanibweko omu Hagai 2:6-9, 20-22?

Ebihanda bikaghana omwatsi w’Obwami, aliwe abandu bangyi babiryasa omwa kwenene. Erighunzerera ebihanda bikayasuka-sukanibawa bikathoghothibwa.​—w21.09, olhup. 15-19.

Busana naki sithutholere thukalhuhirira omwa mubiiri wethu w’erithulira?

Yehova akasamalira akaghalha kethu, kandi akatsema. Thwamathendi lhuha kutse erileghulha, ithukendi syabana engebe y’erikotha.​—w21.10, olhup. 25-26.

Ebiri omwa Abalawi sura 19 byanga thuwathikya bithi erighendera okw’ihabulha lino: “Mubye babuyirire omwa mighendere yenyu”? (1 Pet. 1:15)

Omulhondo oyo obundi by’ebiri omwa Abalawi 19:2. Esura 19 hakathuha eby’erileberyako bingyi ngoku thwanga ghendera okwa biri omu 1 Petero 1:15 omo ngebe yethu ya buli kiro.​—w21.12, olhup. 3-4.