Nanchi mwatanga magazini a katataka a Kyamba kya Usopa nyi? Monai inge mwakonsha kukumbula ano mepuzho:

Kinembelo kya Yakoba 5:11, kitukwasha kuyuka ñanyi kishinka byo kyaamba’mba Yehoba “ye wa kifyele” ne “lusa”?

Twayuka kuba’mba Yehoba, na mambo a lusa lwanji, witulekelako mambo etu. Yakoba 5:11 witukwasha ne kuyuka’mba na mambo a kifyele kyanji, Lesa witukwasha. Twafwainwa kwikala na bino byubilo byanji.—w21.01, ji. 21.

Mambo ka Yehoba o abikilako lunengezho lwa bumutwe?

Waubile bino mambo a butemwe bwanji. Luno lunengezho lukwasha kisemi kyanji kwikala mu mutende ne kuba bintu kwa kubula bimvulañanya. Yense mu kisemi ulondela luno lunengezho uyuka uji na luusa lwa kufuukula bintu ne kumona kuba’mba bintu byo afuukulapo byalondelwa.—w21.02, ji. 3.

Mambo ka bena Kilishitu o bafwainwa kujimukila pa kwingijisha misabilo ya pa Intaneti ya kwisambilamo?

Inge mwina Kilishitu wafuukulapo kwingijisha ino misabilo, wafwainwa kusala bulongo bantu ba kwisamba nabo. Kuba bino kwakatazha inge uji mu mabumba muji bantu bavula. (1 Timo. 5:13) Kuji ne kizumba kya kusampanya masawakya abula bishinka ne kwingijisha ano mashinda kutentemesheshamo busulu.—w21.03, ji. 31.

Ñanyi bishinka bimo byalengejile Lesa kuswisha Yesu kumanama ne kufwa?

Kitanshi ke kya kuba’mba Yesu byo bamukobekele pa kichi, wakasulwile Bayudea ku jifingo. (Nga. 3:10, 13) Kya bubiji ke kya kuba’mba Yehoba wafunjishenga Yesu byo akekala Ñanga wetu Mwine Mukatampe. Ne kya busatu ke kya kuba’mba Yesu byo atwajijile kwikala wa kishinka kufika ne ku lufu, wamwesheshe kuba’mba bantu bakonsha kwikala ba kishinka nangwatu inge bapita mu meseko akatampe. (Yoba 1:9-11)—w21.04, ma. 16-17.

Mwakonsha kuba byepi inge bantu mu nyaunda yenu kechi batanwa pa mazubo ne?

Mwakonsha kweseka kuya na kusapwila pa bimye byo batanwa pa mazubo. Kabiji mwakonsha kuya na kusapwila pa mpunzha ikwabo. Mwakonsha ne kweseka kwingijisha jishinda jikwabo, nabiji kutuma makalata.—w21.05, ma. 15-16.

Mutumwa Paulo watazhizhe mwepi byo aambile’mba: “Mu mizhilo mo mo nafwijile”? (Nga. 2:19)

Mizhilo ya Mosesa yakwashishe bantu kuyuka’mba bambulwa kulumbuluka kabiji yatangijile bena Isalela kwi Kilishitu. (Nga. 3:19, 24) Kino kyakwashishe Paulo kwitabila mwi Kilishitu. Na mambo a kino, Paulo ‘wafwijile mu mizhilo’ mambo yalekele kwingila pe aye.—w21.06, ji. 31.

Twafunjilako ka ku kuchinchika kwa Yehoba?

Yehoba wachinchika mwenga ye baleta pa jizhina janji, kukana bukalama bwanji, bunsatuki bwa baana banji bamo, bubela bwa kwa Satana, kumanama kwa bakalume banji, lufu lwa balunda nanji, bantu bamanyika bakwabo, ne konaunwa kwa bilengwa byanji.—w21.07, ma. 9-12.

Tufunjilako ka ku butekanye bwa kwa Yosefwa?

Wachinchikile nshiji yamubile bakolojanji. Kabiji ku Ijipita ko bamutwajile, bamubepejile ne kumukasa.—w21.08, ji. 12.

Hagai 2:6-9, 20-22 waambijile jimo pa ñanyi kusunkenya kwa kifwanyikizho?

Bisaka bya bantu bikana kumvwa mambo awama a Bufumu, bino bantu bavula babena kwiya mu bukine. Katatakatu bisaka bya bantu bakebisunkenye kimye kyo bakebyonauna.—w21.09, ma. 15-19.

Mambo ka o twafwainwa kubujila kuleka kwingila mwingilo wetu?

Yehoba umona byo twibikako, kabiji kimusangajika muchima. Inge twabula kukooka nangwa’mba kuleka, tukatambula bumi bwa myaka ne myaka.—w21.10, ma. 25-26.

Buku wa Bena Levi kitango 19 witukwasha byepi kukookela mukambizho wa kuba’mba: “Ikalai bazhila mu byubilo byenu byonse”? (1 Pe. 1:15)

Kyamweka byambo biji mu kino kyepelo byafuma pa Bena Levi 19:2. Kitango 19 kyaamba pa mbaji yapusana-pusana mo twakonsha kwingijisha 1 Petelo 1:15 mu bwikalo bwetu.—w21.12, ma. 3-4.