Nge tangaka na dikebi nionso banimero ya Yinzo’a zulu ya Nkengi ya mvula yayi? Na yau, tala kana nge lenda pesa bamvutu na biuvu yayi melanda:

Yinki kivuvu mukanda ya Yakobo 5:11 kepesaka na kutubaka ti Yehova kele ‘na nzola mingi ya ntima’ mpe ‘yandi kewilaka bantu kiadi’?

Beto mezaba ti na ntima kiadi na yandi, Yehova kevuandaka pene ya kunlemvukila banzimbala na beto. Yakobo 5:11 mepesa beto kivuvu ti Yehova kekukipesaka diaka samu na kusadisa beto. Beto kesalaka mbote kana beto kena kulanda kifuani na yandi.—w21.01-LI, p. 21.

Samu na yinki Yehova tulaka nkubukulu ya kimfumu?

Yandi salaka yau samu na nzola. Nkubukulu yango kesalaka ti dibuta na yandi ya kukuikama tambula na kiyenge, mpe na mulongo. Konso muntu na kati ya dibuta yina kena kusala na nguizani na nkubukulu yango, yandi kezabaka nani kele na yinsua ya kubaka banzengolo ya nsuka mpe kusosa mutindu ya kusadila banzengolo yango.—w21.02-LI, p. 3.

Samu na yinki Baklisto fueti kenga ntangu bakena kusadila basite ya Internet ya kusolola na bankundi, na kifuani yina bakesadilaka samu na kutindana bamesaje?

Kana muntu mosi mesepela kusadila baaplikasion yango ya Internet, yandi fueti zaba kupona bantu yina kevuanda bankundi na yandi. Kusala yau lenda vuanda mpasi kana masolo yango mesangisa mua bimvuka ya bantu. (1Tm. 5:13) Yakele diaka kivonza kumuangisa bansangu yina kele kedika ve mpe kusadila mambu metadila nkubukulu na beto samu na mambu ya mumbongo.—w21.03-LI, p. 31.

Yinki kele bamfunu yina salaka ti Nzambi bika nzila ti Yesu niokuama mpe yandi kufua?

Mfunu ya ntete kele ti na kutulaka Yesu na yinti, yapesaka Bayuda diluaku ya kukatuka na kinanga ya nsingulu. (Bag. 3:10, 13) Mfunu ya zole kele ti Yehova vuandaka pesa Yesu formasion samu na kiyekua ya kuvuanda Nganga-nzambi ya Nene. Mpe mfunu ya tatu kele ti kukuikama ya Yesu tii na lufua monisaka ti bantu lenda bikana ya kukuikama ata kana bakena kukutana na kumekama ya ngolo. (Yobi 1:9-11)—w21.04-LI, p. 16-17.

Yinki nge lenda sala kana yakele mpasi samu na kukuta bantu na kisalu ya kusamuna?

Nge lenda meka kusosa bau na bantangu yina bakevuandaka mingi na bayinzo na bau. Nge lenda meka diaka kusamuna na bisika yina mesuasana. Mpe nge lenda meka kusadila mayele ya kusuasana, na kifuani kusonika baletre.—w21.05-LI, p. 15-16.

Yinki ntumua Paulo zolaka monisa ntangu yandi tubaka: ‘Na nzila ya nsiku munu kufuaka na yina metadila nsiku’? (Bag. 2:19)

Nsiku ya Mose monisaka puelele kukondua kukoka ya bantu mpe yanataka Yisaele na Klisto. (Bag. 3:19, 24) Yau nde tindaka Paulo yandi ndima Klisto. Na kusalaka mutindu yina, Paulo ‘kufuaka na yina metadila nsiku’; yandi vuandaka diaka ve na kinanga ya nsiku.—w21.06, p. 31.

Yinki mutindu Yehova pesaka beto kifuani ya kikadulu ya kukanga ntima?

Yehova kangaka ntima na kubebisama ya lokumu ya nkumbu na yandi, kutelemina luyalu na yandi, butomboki ya ndambu ya bana na yandi, luvunu ya Satana yina kena kutatamana, kuniokuama ya bisadi na yandi, kukabuana na bankundi na yandi yina mekufuaka, mutindu bantu ya yimbi kesalaka bantu yankaka mpasi, mpe bantu kena kubebisa ntoto.—w21.07, p. 9-12.

Yinki kifuani ya mbote Yozefi bikaka na diambu metadila kuvibidila?

Yozefi vuandaka kanga ntima samu na mambu ya kukondua lunungu yina bampangi na yandi salaka yandi. Yau salaka ti bavunina yandi mambu mpe yandi kota buloko na Ezipito yina yandi salaka bamvula mingi.—w21.08, p. 12.

Yinki kuningisa ya kifuani Agai 2:6-9, 20-22 metubila?

Bantu yankaka kesepelaka ve na kisalu na beto ya kusamuna Kimfumu, kasi bantu mingi bendamaka na kedika. Ntama mingi ve kuningisa ya nsuka kesalama ntangu makanda nionso kebebisama.—w21.09, p. 15-19.

Samu na yinki beto fueti bika ve kusamuna?

Yehova kemonaka bangolo na beto yina beto kesalaka, mpe yandi kesepelaka. Kana beto lemba ve mpe beto bika ve, beto kebaka luzingu ya mvula na mvula.—w21.10, p. 25-26.

Yinki mutindu mukanda ya Levi kikapu 19 kena kusadisa beto beto sadila dilongi: Beno kuma nlongo na bikadulu na beno nionso? (1 Pi. 1:15)

Verse yango kele na bampova yina beto kekuta na Levi 19:2. Kikapu 19 kena kupesa bifuani mingi ya mutindu beto lenda sadila 1 Piere 1:15 na luzingu na beto ya konso kilumbu.—w21.12, p. 3-4.