Nge me tanga mbote-mbote ba-numero ya Yinzo ya Kengidi ya mvula yayi? Beto tala si nge ke lenda kupesa bamvutu na byuvu yayi:

Ntangu Zaki 5:11 ke zonzá ti Yehova ke na ‘luzolo ya ntima’ mpe na “kyadi” ya bantu, ya ke sosá kunata beto na kundima yinki?

Samu Yehova ke na kyadi ya bantu, yandi ke lemvokilá masumu ya beto. Zaki 5:11 ke lakisá mpe ti yandi ke mpe na nsatu ya mingi ya kusadisa beto. Beto me lunga kulanda kifwani ya yandi.—w21.01, p. 21.

Samu na yinki Yehova tulá otorite?

Yandi salá yawu samu yandi ke zolá beto. Ya ke salá ti kizunu vanda, mpe muvusu vanda ve na kati ya famiye ya yandi. Ntangu muntu nyonso na kati ya famiye ke landá otorite yina Yehova tulá, ya ke vandá ve mpasi na kuzaba nani me lunga kubaka badesizion ya nsuka mpe nani me lunga kusala ti badesizion yango salama.—w21.02, p. 3.

Samu na yinki bakristo zolá sala keba na faso ya bawu ya kusadila ba-aplikasion yina ke sadisá na kufilisa bamesaje na internet ?

Ba yina ke sadilá ba-aplikasion yina, zolá sola ba yina ke solola na bawu. Ya ke kumá mpasi na kusala yawu ntangu ba ke vandá na bagrupe yina ke na bantu mingi. (1 Tim. 5: 13) Ba zolá sala mpe keba na kumwangisa ve bansangu yina ba zaba ve kote ya me katuka. Ba zolá sadila ve kikamarade ya bawu na bampangi ya kimvuka samu na kutekisa babima.—w21.03, p. 31.

Wapi yina ke mwa barezon yina salá ti Yehova biká mwana ya yandi tala mpasi mpe kufwa?

Ya ntete, samu Yesu kufwá na zulu ya poto, yandi katulá bajwife na malediksion yina vandá na bawu. (Gal. 3:10, 13) Ya zole, Yehova vandá pesa Yesu formasion samu yandi kuma prêtre ya nene ya mbote. Ya tatu, Yesu lakisá ti muntu lenda vanda kaka ya kukangama na Yehova ata na kati ya bampasi ya nene. (Yobi 1:9-11)—w21.04, pp. 16-17.

Yinki nge lenda sala ntangu ya ke kumá mpasi na kuzwa bantu na bayinzo ya bawu?

Nge lenda sosa kukutana na bantu na ba-heure yina nge lenda kuzwa bawu na yinzo. Nge lenda sosa mpe kupreche na bisika ya nkaka. Mpe nge lenda meka bafaso ya nkaka ya kusolola na bantu. Na kifwani, nge lenda sonika ba-lettre.—w21.05, pp. 15-16.

Yinki apotre Paul zolá zonza ntangu yandi zonzá: ‘Na nzila ya misiku mu me fwa na yina me tadila misiku’? (Gal. 2:19)

Misiku ya Moyize vandá lakisa ti bana ya Izraele vandá bantu ya masumu. Mpe ya natá bawu tii na Yesu. (Gal. 3:19, 24) Ni Misiku sadisá Paul na kundima ti Yesu vandá Kristo. Samu yandi ndimá Yesu, Paul ‘kufwá na yina me tadila misiku.’ Misiku vandá dyaka ve na otorite na zulu ya yandi.—w21.06, p. 31.

Na wapi mambu Yehova ke kangá ntima?

Yehova ke kangá ntima ntangu bantu ke fingá nkumbu ya yandi, ke mangá otorite ya yandi mpe ke sosá kusala ti volonte ya yandi salama ve, mpe na ntangu bana ya yandi ya nkaka balukilak’ yandi. Yandi ke kangá mpe ntima na bamambu ya luvunu yina Satan ke zonzá, na bampasi yina ke talá bisadi ya yandi, ntangu lufwa ke kabulá yandi na bakamarade ya yandi, mpe ntangu bantu ya yimbi ke nyokolá bantu ya nkaka mpe ke bebisá ntoto, kima yina yandi yidiká.—w21.07, pp. 9-12.

Wapi ekzample ya mbote Joseph bikilá beto na yina me tadila kuvanda na ntima ya yinda?

Bampangi ya yandi yina butamá papa mosi na yandi tekak’ yandi na bungamba na Égypte. Kuna, ba vuniná yandi bamambu, mpe yandi lutisá bamvula mingi na boloko. Ata faso yina, yandi kumá ve ndudi.—w21.08, p. 12.

Wapi kuningana Agayi 2:6-9, 20-22 ke zonzilá?

Bantu mingi ke bakilá nsangu ya Kimfumu ya Nzambi na faso ya yimbi, kasi bantu ya nkaka ke ndimak’ yawu. Na mwa ntangu fioti, makanda nyonso ke ningana ntangu Yehova ke kufwa bawu.—w21.09, pp. 15-19.

Samu na yinki beto zolá lemba ve na kisalu ya beto ya predikasion?

Yehova ke talá bangolo yina beto ke salá, mpe yandi ke sepelá na yawu. Si beto lemba ve, beto ke kuzwa luzingu ya ntangu nyonso.—w21.10, pp. 25-26.

Wa’ faso Balevi chapitre 19 ke sadisá beto na kulanda malongi yayi: ‘Beno kuma bantu ya santu na ndyatulu ya beno nyonso’? (1 Pi. 1:15)

Ntangu ya nkaka, bamambu yina Piere zonzá katuká na Balevi 19:2. Balevi chapitre 19 ke pesá bifwani mingi na faso ya kusadila 1 Piere 1:15 na luzingu ya beto.—w21.12, pp. 3-4.