Wa resa nawa yirongwa yomoRuhungu romvhura ezi ndi? Tara nsene kuvhura o limburure mapuro aga gana kukwama ko.

Ehuguvaro musinke atu gwana mononkango edi da kara mwaJakopo 5:11, ezi azi tanta asi: “Jehova ga kara nonkenda zonene?”

Ose twa yi diva asi Jehova kutugusira po mapuko getu, morwa nkenda zendi. Jakopo 5:11 kutuhuguvaresa asi Jehova kwa hara kutuvatera. Ose kurugana paapa twa hulira yipo tu mu honene.—w21.01, epe. 21.

Morwasinke ga tulisira po Jehova ewapaiko lyoupangeli?

Age kwa yi rugene oyo morwa ga tu hara. Ewapaiko eli kuvatera epata lyendi yipo li ruganene mombili ntani monkedi zokuwapera. Nkenye epata eli ali paruka kuliza newapaiko eli lya diva asi yilye ogu ga kara nositumbukira sokutura po matokoro ntani nogu na pitisira mokusikisa mo matokoro ogo.—w21.02, epe. 3.

Morwasinke Vakriste nava takamesera monkedi omu ava ruganesa yiruganeso yokutuma nombudi?

Nsene muntu a tokora kuruganesa yiruganeso yokutuma nombudi, ga hepa kutakamesa asi vantu musinke ava ana kuzogera nawo. Oyo udigu kuyirugana nsene kuna kara monombunga dononene do ku litumina nombudi. (1 Tim. 5:13) Ayo siponga kulihameka monombudi dina dili kukara noumbangi ntani kuruganesa vapuli vakwawo yipo va gwanene mo yimaliwa.—w21.03, epe. 31.

Nokonda musinke dimwe deyi Karunga ga pulisilire Jesus a hepe nokufa?

Konda zokuhova kuna kara asi, Jesus va hepere kumudipaga yipo a zowore Vajuda kefingiliro. (Gar. 3:10, 13) Konda zauvali, age kwa dewire Jesus a liwapaikire situmbukira esi sa mu ndindilire komeho, sokukara Mupristeli gomunene. Ntani zautatu, Jehova kwa pulisilire Jesus a hepe unene dogoro konomfa, mokulikida asi vantu kuvhura kulimburukwa Jehova nampili momaheteko gomanene. (Joba 1:9-11)—w21.04, epe. 16-17.

Yisinke no rugana nsene kuna kukudigopera kugwana vantu pomambo?

Hetekera ko kugwana vantu poyiruwo eyi ava kara pembo. Hetekera ko kuzuvhisira komavango gokulisiga-siga. Ntani hena, kuvhura kuruganesa nkedi zapeke ngwendi pokutjanga nombilive.—w21.05, epe. 15-16.

Yisinke ga tembe mupositoli Paurusa apa ga uyungire asi: “Kombinga zoVeta ame na fa koVeta zene?” (Gar. 2:19)

Veta zaMosesa kwa horowere kudira kusikilira mo kovantu ntani azo kwa pitisilire Vaisraeli dogoro kwaKristusa. (Gar. 3:19, 24) Eyi kwa ninkisire Paurusa a ture epuro mwaKristusa. Eyi yiyo ga tembe Paurusa apa ga uyungire asi: “Ame na fa koVeta zene.” Age kwa limburukwire po Karunga, nye kapisi Veta.—w21.06, epe. 31.

Ngapi omu Jehova ga tu tulira po sihonena sokulididimikira?

Jehova kwa lididimikira eswau eli va retera edina lyendi, vantu ava ava rwanesa upangeli wendi, marwaneso gokutunda kovana vendi vamwe, yipempa yaSatana, ruhepo oru ava ligwanekere naro vakareli vendi, nomfa dovakaume vendi, vantu wovadona ava ava hepekere mo vakwawo ntani vantu ava ava zonagura evhu eli ga sita.—w21.07, epe. 9-12.

Sihonena musinke ga tura po Josefa sokundindira mwaJehova yipo a rugane ko yuma?

Nampili ngomu Josefa va mu tekwire vakuru vendi momudona, age kwa lididimikilire. Eyi kwa twaredesere Josefa va ka mu rundire ntani nokukamutura modorongo moEgipite nomvhura dononzi.—w21.08, epe. 12.

Ekankamo musinke hena limwe va faturura mwaHagayi 2:6-9, 20-22?

Nampili ngomu nomuhoko adi dili kutambura mbudi ezi a tu va zuvhisire, sinzi sovantu kwa va kokera kousili. Nomuhoko ntaantani tupu ngava di kankamese apa ngava di zonagura po.—w21.09, epe. 15-19.

Morwasinke natu twikilira kuzuvhisa nampili momaudigu?

Jehova kumona elituromo lyetu, ntani kumuhafesa. Nsene tu twikira ngorooro kuzuvhisa, ose ngatu ka gwana mwenyo gwanarunye.—w21.10, epe. 25-26.

Ngapi etjangwa lyaLevitikus egaununo 19 nali tu vatera tu sikise mo mpangera ezi asi: “Kareni muna pongoka moukaro weni naunye?” (1 Pet. 1:15)

Velise ozo nampo kwa zi gusa mwaLevitikus 19:2. Megaununo 19 kwa kara mo yihonena yoyinzi kuhamena omu natu sikisa mo etjangwa lya-1 Peturusa 1:15, meparu lyetu.—w21.12, epe. 3-4.