ເຈົ້າຈື່ໄດ້ບໍ?
ເຈົ້າໄດ້ອ່ານຫໍສັງເກດການ ຂອງປີນີ້ຢ່າງລະອຽດບໍ? ໃຫ້ເຈົ້າລອງຕອບຄຳຖາມຕໍ່ໄປນີ້:
ຢາໂກໂບ 5:11 ເຮັດໃຫ້ເຮົາໝັ້ນໃຈແນວໃດວ່າພະເຢໂຫວາເປັນພະເຈົ້າທີ່ “ເມດຕາ” ແລະ “ມີຄວາມເຫັນອົກເຫັນໃຈແທ້ໆ”?
ເຮົາຮູ້ວ່າພະເຢໂຫວາມີຄວາມເມດຕາເພາະເພິ່ນໃຫ້ອະໄພເຮົາເມື່ອເຮົາເຮັດຜິດ. ຢາໂກໂບ 5:11 ຍັງເຮັດໃຫ້ເຮົາໝັ້ນໃຈວ່າ ພະເຢໂຫວາພ້ອມທີ່ຈະຊ່ວຍເຫຼືອເຮົາຍ້ອນເພິ່ນ ເຫັນອົກເຫັນໃຈເຮົາ. ເຮົາສາມາດຮຽນແບບພະເຢໂຫວາໄດ້.—ຫ21.01 ໜ້າ 21.
ເປັນຫຍັງພະເຢໂຫວາຈຶ່ງໃຫ້ມີຫົວໜ້າຄອບຄົວ?
ພະເຢໂຫວາເຮັດແບບນັ້ນຍ້ອນຄວາມຮັກ. ການຈັດກຽມນີ້ເຮັດໃຫ້ຄອບຄົວມີຄວາມສຸກ ສາມັກຄີກັນແລະເປັນລະບຽບຮຽບຮ້ອຍເພາະແຕ່ລະຄົນຈະຮູ້ວ່າໃຜຈະເປັນຜູ້ຕັດສິນໃຈຄັ້ງສຸດທ້າຍ ແລະໃຜຈະພາເຮັດຕາມການຕັດສິນໃຈນັ້ນ.—ຫ21.02 ໜ້າ 3.
ເປັນຫຍັງຄລິດສະຕຽນຄວນລະວັງເມື່ອໃຊ້ແອັບຮັບສົ່ງຂໍ້ຄວາມ?
ຖ້າຜູ້ໜຶ່ງໃຊ້ແອັບຮັບສົ່ງຂໍ້ຄວາມ ລາວຕ້ອງເລືອກວ່າຈະລົມນຳໝູ່ແບບໃດ. ແຕ່ມັນຍາກທີ່ຈະເຮັດແບບນັ້ນຖ້າລົມກັນເປັນກຸ່ມໃຫຍ່. (1 ຕມ. 5:13) ອັນຕະລາຍຢ່າງໜຶ່ງກໍຄືມີການແພ່ຂໍ້ມູນທີ່ບໍ່ທັນຢັ້ງຢືນວ່າເປັນຄວາມຈິງ ແລະອີກຢ່າງໜຶ່ງກໍຄື ມີການໃຊ້ພີ່ນ້ອງເພື່ອຫາຜົນປະໂຫຍດໃນການຄ້າ.—ຫ21.03 ໜ້າ 31.
ເປັນຫຍັງພະເຈົ້າຈຶ່ງຍອມໃຫ້ພະເຢຊູເຈິກັບຄວາມທຸກແລະຕາຍ?
ເຫດຜົນທຳອິດຄື ພະເຢຊູຖືກຄຶງໄວ້ເທິງເສົາກໍເພື່ອຊ່ວຍຊາວຢິວໃຫ້ເປັນອິດສະຫຼະຈາກຄຳສາບແຊ່ງທີ່ພິເສດ. (ຄລຕ. 3:10, 13) ເຫດຜົນທີສອງ ພະເຢໂຫວາຢາກຝຶກສອນພະເຢຊູໃຫ້ເຮັດໜ້າທີ່ເປັນມະຫາປະໂລຫິດ. ເຫດຜົນທີສາມ ການທີ່ພະເຢຊູສັດຊື່ຈົນຕາຍພິສູດວ່າມະນຸດສາມາດຮັກສາຄວາມສັດຊື່ໄດ້ເຖິງຈະເຈິຄວາມຍາກລຳບາກ. (ໂຢບ 1:9-11)—ຫ21.04 ໜ້າ 16-17.
ເຈົ້າຈະເຮັດແນວໃດຖ້າຮູ້ສຶກວ່າຍາກທີ່ຈະເຈິຄົນຕອນໄປປະກາດ?
ເຈົ້າສາມາດໄປຫາຜູ້ຄົນໃນເວລາທີ່ເຂົາເຈົ້າມັກຢູ່ເຮືອນ ພະຍາຍາມປ່ຽນບ່ອນປະກາດ ແລະໃຊ້ວິທີປະກາດແບບໃໝ່ ເຊັ່ນ ຂຽນຈົດໝາຍ.—ຫ21.05 ໜ້າ 15-16.
ອັກຄະສາວົກໂປໂລໝາຍຄວາມວ່າແນວໃດເມື່ອລາວເວົ້າວ່າ: “ກົດໝາຍຂອງໂມເຊນັ້ນແຫຼະທີ່ຊ່ວຍຂ້ອຍໃຫ້ພົ້ນ [ຕາຍ] ຈາກອຳນາດກົດໝາຍນັ້ນ”? (ຄລຕ. 2:19, ໄຂເງື່ອນ)
ກົດໝາຍຂອງໂມເຊເຮັດໃຫ້ເຫັນຄວາມຜິດຂອງຄົນເຮົາໄດ້ຢ່າງຊັດເຈນແລະນຳພາຊາວອິດສະຣາເອນໄປຫາພະຄລິດ. (ຄລຕ. 3:19, 24) ນີ້ເຮັດໃຫ້ໂປໂລເປັນທີ່ຍອມຮັບຂອງພະຄລິດ. ໂດຍວິທີນີ້ ໂປໂລໄດ້ “ພົ້ນ [ຕາຍ] ຈາກອຳນາດກົດໝາຍນັ້ນ.” ກົດໝາຍຂອງໂມເຊບໍ່ມີອຳນາດຄວບຄຸມລາວອີກຕໍ່ໄປ.—ຫ21.06 ໜ້າ 31.
ພະເຢໂຫວາໄດ້ວາງແບບຢ່າງໃຫ້ເຮົາແນວໃດໃນເລື່ອງຄວາມອົດທົນ?
ພະເຢໂຫວາໄດ້ອົດທົນກັບຫຼາຍຢ່າງເຊັ່ນ: ນາມຊື່ຂອງເພິ່ນຖືກຕຳໜິ, ການປົກຄອງຂອງພະເຢໂຫວາຖືກຕໍ່ຕ້ານ, ລູກຂອງເພິ່ນບາງຄົນກະບົດ, ຄຳຕົວະຂອງຊາຕານ, ຜູ້ຮັບໃຊ້ຂອງເພິ່ນມີຄວາມທຸກ, ໝູ່ທີ່ເພິ່ນຮັກຕາຍຈາກໄປ, ຄົນດີຖືກຂົ່ມເຫງ, ສິນລະທຳຂອງມະນຸດເສື່ອມລົງ, ສິ່ງທີ່ເພິ່ນສ້າງຖືກທຳລາຍ.—ຫ21.07 ໜ້າ 9-12.
ເຮົາໄດ້ບົດຮຽນຫຍັງຈາກຕົວຢ່າງຂອງໂຢເຊັບໃນເລື່ອງຄວາມອົດທົນ?
ລາວໄດ້ອົດທົນກັບຄວາມບໍ່ຍຸຕິທຳຈາກພວກອ້າຍຂອງລາວ. ເຊິ່ງເຮັດໃຫ້ລາວຖືກກ່າວຫາຢ່າງຜິດໆແລະຕ້ອງເຂົ້າຄຸກໃນເອຢິບເປັນເວລາຫຼາຍປີ.—ຫ21.08 ໜ້າ 12.
ອາກເກ 2:6-9, 20-22 ບອກລ່ວງໜ້າກ່ຽວກັບການສັ່ນແນວໃດ?
ຊາດຕ່າງໆຈະບໍ່ມັກເລື່ອງທີ່ເຮົາປະກາດ ແຕ່ຫຼາຍຄົນຈະສົນໃຈຄວາມຈິງ. ບໍ່ດົນຊາດຕ່າງໆຈະຖືກສັ່ນເຊິ່ງກໍຄືຖືກທຳລາຍ.—ຫ21.09 ໜ້າ 15-19.
ເປັນຫຍັງເຮົາບໍ່ຄວນເຊົາໄປປະກາດ?
ພະເຢໂຫວາເຫັນຄວາມພະຍາຍາມຂອງເຮົາແລະພໍໃຈວຽກຮັບໃຊ້ທີ່ເຮົາເຮັດ. ຖ້າເຮົາບໍ່ເຊົາຫຼືບໍ່ທໍ້ຖອຍໃນວຽກປະກາດ ເຮົາຈະໄດ້ຮັບຊີວິດຕະຫຼອດໄປ.—ຫ21.10 ໜ້າ 25-26.
ປຶ້ມພວກເລວີບົດ 19 ຊ່ວຍເຮົາແນວໃດໃຫ້ເຮັດຕາມຄຳແນະນຳທີ່ບອກວ່າ: “ໃຫ້ເປັນຄົນບໍລິສຸດໃນການກະທຳທຸກຢ່າງ”? (1 ປຕ. 1:15)
ຂໍ້ຄຳພີນີ້ອາດຈະຍົກມາຈາກພວກເລວີ 19:2. ໃນພວກເລວີບົດ 19 ມີຫຼາຍຕົວຢ່າງທີ່ຊ່ວຍໃຫ້ເຮົາເຮັດຕາມຄຳແນະນຳໃນ 1 ເປໂຕ 1:15 ໄດ້.—ຫ21.12 ໜ້າ 3-4.
