Lelo watangile senene manimelo a uno mwaka a Kiteba kya Mulami? Nabya, tala bidi shi ubwanya kulondolola bino bipangujo:

Kisonekwa kya Yakoba 5:11 kitukulupija bika pokinena’mba, Yehova i “muyule kisanso kya ku mutyima kadi i wa lusa”?

Tuyukile amba Yehova usakanga kwitulekela bilubo byetu pa lusa lwandi. Kisonekwa kya Yakoba 5:11 kitukulupija’mba, byaetusenswe kisanso kya ku mutyima witukwashanga. I biyampe tumwiule.​—w21.01, p. 21.

Mwanda waka Yehova wātūdile’ko mpangiko ya bu mutwe?

Wēitūdile’ko mwanda witusenswe. Ino mpangiko ikwashanga kisaka kyandi kya bantu ba kikōkeji kikale mu ndoe kadi mu ndudi. Muntu ense wa mu kisaka ukwatakanya ino mpangiko, uyukile i ani ufwaninwe kukwata kya mfulo ne ufwaninwe kwibatangidila.​—w21.02, p. 3.

Mwanda waka bene Kidishitu bafwaninwe kutadija kitatyi kyobengidija mampangiko a kwitumina misapu pa Entelenete?

Shi muntu wasake kwingidija ano mampangiko, ufwaninwe kutonga ba kwitumina nabo misapu. Kino kibwanya kwikala kikomo shi udi mu kisumpi kikatampe kya bantu baetumina nabo misapu. (1 Tm. 5:13) Kadi mudi kyaka kya kusambakanya myanda yokebayukidijepo senene, ne kya kumwena lupeto pa mutwe wa banabetu.​—w21.03, p. 31.

Lelo Leza wālekele Yesu asusuke ne kufwa pa bubinga’ka?

Bubinga bubajinji i bwa amba, bākobekele Yesu ku mutyi wa masusu mwanda wa kunyongolola Bayuda ku mafingo. (Ngt. 3:10, 13) Bwa bubidi i bwa amba, Yehova wāfundije Yesu mwa kukengidila bu Kitobo Mukatampe. Bwa busatu i bwa amba, kukōkela kwākōkele Yesu kufika ne ku lufu kwālombwele amba bantu babwanya kwikala na kikōkeji nansha ke mu matompo makomo. (Yoba 1:9-11)​—w21.04, p. 16-17.

Le ubwanya kulonga namani shi kutanapo bantu ku mobo posapula?

Tompa kukebatala mu kitatyi kyobabwanya kutanwa ku mobo. Ubwanya ne kutompa kusapula mu bifuko bishileshile. Kadi ubwanya ne kutompa misapwilo mishileshile, kimfwa kulemba mikanda.​—w21.05, p. 15-16.

Le mutumibwa Polo paānenene amba: “Kupityila ku bijila ami nafwile ku bijila” wādi ukimba kunena bika? (Ngt. 2:19)

Bijila bya Mosesa byādi bisokwela patōka kubulwa kubwaninina kwa bantu ne kuludikila bene Isalela kudi Kidishitu. (Ngt. 3:19, 24) Bino bijila byākweshe Polo etabije Kidishitu. Polo pa kwitabija Kidishitu, ‘wafwile ku bijila’; ko kunena’mba kākidipo mukutwe na bijila.​—w21.06, p. 31.

Le Yehova i mwitushile kimfwa kya kūminina muswelo’ka?

Yehova ūmininanga kufutululwa kwa dijina dyandi, kulwibwa kwa bubikadi bwandi, butomboki bwa bandi bana bamo, kubepelwa nyeke bubela na Satana, kususulwa kwa bengidi bandi, lufu lwa balunda nandi, masusu asusuka muzo wa muntu, ne konakanibwa kwa bupangi bwandi.​—w21.07, p. 9-12.

Le Yosefa i mushiye kimfwa’ka kiyampe pa mwanda utala kitūkijetyima?

Wāūminine bintu bibi byāmulongele banababo pampikwa mwanda. Bino bintu byāmufikije ku kubepelwa bubela ne kukutwa myaka mivule mu Edipito.​—w21.08, p. 12.

Le Hakai 2:6-9, 20-22 i mulae kutenkanibwa’ka kwa kyelekejo?

Mizo ipelanga musapu wa Bulopwe, ino bantu bavule i batwele mu bubine. Panopano ponka mizo isa kutenkanibwa kitatyi kyoisa konakanibwa.​—w21.09, p. 15-19.

Mwanda waka ketufwaninwepo kuleka’byo kusapula?

Yehova umwene bukomo botulonga, kadi bumusangajanga. Shi ketukokelepo nansha kuleka’byo, tukamonanga būmi bwa nyeke.​—w21.10, p. 25-26.

Le kisonekwa kya Bene Levi shapita wa 19 kitukwasha namani twingidije madingi anena’mba: “Ikalai bajila mu mwikadilo wenu onso”? (1 Pe. 1:15)

Bimweka bu uno vese upituluka mu Bene Levi 19:2. Mu shapita wa 19 imutelwe myanda mivule motubwanya kwingidija 1 Petelo 1:15 mu būmi bwetu bwa difuku ne difuku.—w21.12, p. 3-4.