Komana mwatañili nakanañachima yibaaba yachinu chaaka yaKaposhi Kakutalila? Esekenu kwakula awa malwihu:

Yakoba 5:11 yatukwashaña kukuhweleladi chiyahosha nawu “Yehova wukweti wushona chikupu niluwi”?

Tuneluki netu chineli Yehova wukweti luwi, wafwilaña kutwanakena yiluwa yetu. Yakoba 5:11 yashimuna cheñi nawu chineli watukeña wafwilaña kutukwasha. Dichi twatela kumwimbujola.—w21.01, ifu. 21.

Muloñadi Yehova chashililiku wumutu?

Welili mwenimu muloña wakutukeña. Iyi ntanjikilu yakwikala mutu yakwashaña chisaka chaYehova kuzata chiwahi mukuwunda nimukutela. Muntu wejima wamuchisaka wovwahilaña iyi ntanjikilu weluka muntu watela kushaku nshimbi niwatela kulombolaña.—w21.02, ifu. 3.

Muloñadi akwaKristu chatela kwikalilawu asoñama neyi anakuzatisha njila jakuhanjekelamu?

Neyi muntu nakutondahu kuzatisha iji njila jakuhanjekelamu, watela kwikala wasoñama hakutonda antu akuhanjeka nawu. Dichi chinateli kwikala chakala neyi muntu nakuhanjeka mwizanvu mudi antu amavulu. (1 Tim. 5:13) Kudi cheñi wubanji wukwawu wekala mukutandisha nsañu yejima yinabuli wunsahu walala nikuzatisha nsañu yamukuloñesha kulonda aselujoleña.—w21.03, ifu. 31.

Chumanyi chaletesheli Nzambi yamwiteji Yesu kukabakana nikufwa?

Chuma chimu chidi chakwila nawu, chamujahililiwu Yesu hamutondu, wayisubwileña aYudeya kwishiñu. (Ñal. 3:10, 13) Chamuchiyedi chidi chakwila nawu Yehova wamudizishileña Yesu hamudimu windi wakumbidi neyi nekali dehi Kapristu Muneni. Nawa chamuchisatu Yesu chekaliliyi washinshika chamwekesheli nawu antu anateli kwikala ashinshika hela chakwila anayeseki. (Yoba 1:9-11)—w21.04, mafu. 16-17.

Munateli kwila ñahi neyi chakwila chinakuyikalila kuwana antu mumudimu wakushimwina?

Munateli kuhanjeka nawantu neyi muyaña nakushimwina hampinji yekalañawu hamatala. Esekenuña kuya nakushimwina kumaluña amakwawu. Nawa esekenuña njila yikwawu, chidi neyi kusoneka mukanda.—w21.05, mafu. 15-16.

Kapostolu Pawulu watalishili mudihi chahosheliyi nindi: “Nafwili muloña wakwovwahila nshimbi”? (Ñal. 2:19)

Nshimbi jaMosi jaletesheli nshidi yimwekani nawa jayilombweli aIsarela kudi Kristu. (Ñal. 3:19, 24) Chumichi chamuletesheli Pawulu kumwiteja Kristu. Pawulu ‘wafwili muloña wakwovwahila nshimbi’; dichi Nshimbi hiyekalili nañovu hadi yenaku.—w21.06, ifu. 31.

Yehova wamwekesha ñahi chitwatela kuumika?

Yehova wuchidi kuumika hamuloña wakasawuntu kaletañawu hejina dindi, antu amavulu amwovwahilaña wanyi Nzambi nichiyuulu chindi, kudikaña kwadikañiliwu anyanindi amakwawu, kutwamba kwaDiyabolu, chakabakanañawu ambuñindi akeñayi, kwambuka nawamabwambu jindi afwa dehi, antu atama chinakukabishawu antu niyilwilu yawantu chiyinakutaminaku.—w21.07, mafu. 9-12.

Yosefu wamwekesheli ñahi chilwilu chakudiwunjika?

Womikili hampinji yamuyandishiliwu kudi amanakwindi. Nawa chafuminimu amutwambilili nikumukasa muEjipitu hadi yaaka yayivulu.—w21.08, ifu. 12.

Hagayi 2:6-9, 20-22 yashimwineñahu dehi kukankisha kwamuchidinyi?

Hela chakwila nyuza yakaanaña nsañu yayiwahi yaWanta, antu amavulu anenzi muchalala. Katataka nyuza ayikankishi kakumishaku hampinji yakayijilumunawu chikupu.—w21.09, mafu. 15-19.

Muloñadi chitwatela kubula kuzeyela hakushimwina?

Yehova wamonaña chitwazataña nañovu nawa wazañalalaña. Neyi tubula kuzeya hela kuleka, tukatambwila wumi wahaya nyaaka.—w21.10, mafu. 25-26.

ALevi kapetulu 19 yinateli kutukwasha ñahi kuzatisha kufumba kwahosha nawu: “Ikalenu ajila muyilwilu yenu yejima”? (1 Pet. 1:15)

Awa mazu afuma haALevi 19:2. Kapetulu 19 kashimuna yakutalilahu yayivulu yatukwashaña kwiluka chitunateli kuzatisha mazu ekala ha 1 Petulu 1:15 muchihandilu chetu.—w21.12, mafu. 3-4.