Be isebedo ka isomo gasede mag Ohinga mar Jarito ma higani? Ka en kamano, ne ane ka inyalo dwoko penjo ma luwogi:

Weche manie Jakobo 5:11 ma wacho ni “Jehova ogundho gi hera matut kendo okecho ji” miyo wabedo gadier gi wach mane?

Wang’eyo ni nikech Jehova ng’won kendo okecho ji, oikore weyonwa kethowa. Jakobo 5:11 miyo wabedo gadier ni Jehova oikore konyowa. Onego waluw ranyisine.​—w21.01, ite mar 21.

Ang’o momiyo Jehova noketo chenro mar wich?

En nikech oherowa. Chenrono miyo jo Jehova timo gik moko e yo mokuwe kendo mochanore maber. Joma riwo chenrono lwedo ong’eyoga maber ni en ng’ano monego ong’ad paro e wach moro, to ng’ano monego one ni wach mong’adno otimore nyaka tung’.​—w21.02, ite mar 3.

Ang’o momiyo Jokristo onego obed motang’ ahinya sama gitiyo gi apps miorogo mesej?

Ka ng’ato oyiero tiyo gi apps ma kamago, onego otang’ sama oyiero osiepe motudorego. Mano ok yotga sama wan e grup moting’o ji mang’eny. (1 Tim. 5:13) Bende, wanyalo po ka wadonjo e weche mijimbo kod weche ma ok ong’e korgi maber, kata tiyo marach gi grube mag oro mesejgo e timo ohala gi Jokristo wetewa.​—w21.03, ite mar 31.

Ang’o momiyo Nyasaye noyie mondo Yesu osandre malit mi otho?

Achiel kuom gik momiyo, en ni ka Nyasaye noyie mondo ogur Yesu e yath, koro ninyalo gony Jo-Yahudi kuom kuong’ moro ma ne gisedonjoe. (Gal. 3:10, 13) Mar ariyo, sand notiego Yesu ne migawone ma kinde ma biro mar bedo Jadolo Maduong’. Mar adek, sand ma Yesu nokaloe nyaka e tho nonyiso ni dhano nyalo chung’ motegno komakore gi Jehova kata sama okalo e tem mager. (Ayub 1:9-11)​—w21.04, ite mar 16-17.

Sama walendo, ang’o ma wanyalo timo mondo wachop ne joma ok yot yudo e utegi?

Wanyalo temo manyogi e seche ma yot yudogi e utegi. Bende, wanyalo temo lendo kuonde mopogore opogore. E wi mago, wanyalo temo lendo gi yore mopogore opogore kaka ndiko barupe.​—w21.05, ite mar 15-16.

Ang’o ma Paulo ne temo wacho ka nowacho ni: “Kokalo kuom chik, ne atho kuom chik”? (Gal. 2:19)

Chike Musa nonyiso ayanga ni dhano ma joricho ne ok nyal luwo chike e yo makare chuth, kendo Chik ne tayo Jo-Israel koterogi ir Kristo. (Gal. 3:19, 24) Chik nokonyo Paulo keto yie kuom Kristo. Kuom timo kamano, “notho kuom chik,” kendo Chik koro ne ok otueye kata matin.​—w21.06, ite mar 31.

Ere kaka Jehova oseketonwa ranyisi maber mar nano?

Jehova osenano kuom weche ma luwogi: Keth mosekethgo nyinge, yo ma osekwedgo ratiro mare mar locho e wi gik moko duto, yo ma nyithinde moko oseng’anyonego, miriambo ma Jachien siko ka wacho e wiye, neno ka jotichne mogeno chandore, lit mobedogo sama osiepene mogeno otho, neno kaka joma richo sando jomamoko, kod neno ka iketho gik ma nochueyo.​—w21.07, ite mar 9-12.

En ranyisi mane maber ma Josef noketonwa e wach horuok?

Nonano ka ne owetene timone gik ma ok kare. Timbe owetenego nomiyo gikone otere Misri kuma nodonjnee gi ketho ma ne ok otimo, mi otueye e jela kuom higni buora.​—w21.08, ite mar 12.

Hagai 2:6-9, 20-22 wuoyo e wi yiengni mage?

Kata obedo ni ogendni kwedoga ote mar Pinyruoth ma walando, ji mang’eny oserwako adiera. Bende, machiegnini, ibiro yieng ogendni gi yieng mogik sama ikethogi.​—w21.09, ite mar 15-19.

Ang’o momiyo ok onego waol gi lando wach maber?

Jehova neno kindawa kod yo ma wananogo, kendo tijwa mar lendo more. Ka wanano e tijwa mar lendo, wabiro yudo ngima mochwere.​—w21.10, ite mar 25-26.

Ere kaka Tim Jo-Lawi sula mar 19 konyowa tiyo gi puonjni: “Beduru jo maler e timbeu duto”? (1 Pet. 1:15)

Nenore ni weche manie 1 Petro 1:15 ogol e Tim Jo-Lawi 19:2. Sula mar 19 nigi ranyisi mopogore opogore ma nyiso kaka wanyalo tiyo gi puonj manie 1 Petro 1:15.​—w21.12, ite mar 3-4.