Tûn kum chhuak Vênnainsâng-te chu ngun takin i chhiar tawh em? A hnuaia zawhnate hi i chhân theih leh theih loh hriat i tum dâwn nia:

Jakoba 5:11-naa Jehova chu ‘khawngaihnain a khat,’ tih thu hian eng tiamkamna nge min pêk?

Jehova chuan a zahngaihna avângin kan sualte chu ngaihdam a duh tih kan hria a. Jakoba 5:11-na chuan hmangaihna nei takin min ṭanpui tih min hrilh a. Ani chu kan entawn tûr a ni.—w21.01, p. 21.

Engvângin nge Jehova’n lû nihna ruahmanna chu a din?

Ani chuan lû nihna chu hmangaihna avângin a din a. Chu ruahmanna chuan a chhûngkaw rinawmte chu inrem taka awm tûr leh fel taka thil ti tûrin a ṭanpui a. Chu ruahmanna zuitu chhûngkuaa mite chuan thu tlûkna siam tûra mawhphurhna neite leh chumi bawhzuitu tûrte chu an hria a ni.—w21.02, p. 3.

Engvângin nge Kristiante chu electronic hmanruate aṭanga thu inthawnna app-te an hman hunah an fîmkhur ang?

Miin chûng app-te hman a thlang a nih chuan, chumi hmanga a ṭhian kawm tûrte chu fîmkhur taka a thlan a ngai a. Chutianga tih chu mi tam tak telna group-a a tel hunah a harsa lehzual a ni. (1 Tim. 5:13) Chu bâkah, chanchin hriat chian lohte theh darh emaw, thlarau lam thila kan inbiak pawhnate chu sumdâwnna nêna inkûngkaiha hman palhna emaw ang chi dinhmun hlauhawmte pawh a awm a ni.—w21.03, p. 31.

Pathianin Isua hrehawm tuara a thih a phal chhan ṭhenkhat chu engte nge ni?

Pakhatna, nghaisakna bana Isua khenbehna chuan Juda mite chu ânchhe lak ata a chhuah zalêntîr thei a ni. (Gal. 3:10, 13) Pahnihna, Jehova’n Isua chu Puthiam Lal Ber a nih anga a chanvo la chelh tûr atân a buatsaih a ni. Pathumna, thih thlenga Isua rinawmna chuan mihringte chu fiahna nasa tak kârah pawh an rinawm thei tih a finfiah a ni. (Job. 1:9-11)—w21.04, p. 16-17.

Rawngbâwlnaah mite chu hmuh an harsa a nih chuan eng nge i tih theih?

Mite chu ina an awm tam zâwk hun âwmahte chuan i va tlawh thei a. Hmun dangahte pawh thu i hril chhin thei a. Chu bâkah, lehkha thawn ang chi, tih dân dangte pawh i hmang chhin thei a ni.—w21.05, p. 15-16.

Tirhkoh Paula’n: “Dân avângin dân lam kawngah ka thi tawh si a,” a tih hian, eng a tihna nge”? (Gal. 2:19)

Mosia Dân chuan mihringte kan ṭhat famkim lohzia a târ lan bâkah, Israelte chu Krista lamah a hruai a ni. (Gal. 3:19, 24) Chuvângin, Paula chuan Krista a pawm a. Chutiang kawng chuan, Paula chu ‘dân lam kawngah a thi a’; Dânin a chungah thu a nei tawh lo.—w21.06, p. 31.

Engtin nge Jehova chuan chhelna lantîrna kawngah kan tân entawn tûr a siam?

Jehova chuan a hming sawichhiatna te, a lalchungnunna dodâlna te, a fate zînga ṭhenkhat helna te, Setana’n dâwta a puhna te, a chhiahhlawhte hrehawm tawrhna te, a ṭhian thi tawhte nêna inṭhenna te, mihring chhûngkaw tlâk chhiatna te, leh a thil siamte tihchhiatnate chu chhel takin a tuar a ni.—w21.07, p. 9-12.

Josefa’n dawhtheihna kawngah eng entawn tûr ṭha nge a siam?

Ani chuan dik lo taka a unaute’n an cheibâwlna chu a tuar a. Chu chuan a chungah dik lo taka puhna leh Aigupta rama kum tak tak chhûng tân ina khungna a thlen a ni.—w21.08, p. 12.

Hagaia 2:6-9, 20-22-na chuan entîr nei eng tihnghînna nge a hrilh lâwk?

Hnamte chuan Lalram thu hrilhna chu ṭha lo takin chhâng lêt mah se, mi tam tak chu thutaka hîpin an awm a. Nakin lawkah, hnamte chu a tâwpna atâna tihnghîn an ni ang a, tihboral an ni ang.—w21.09, p. 15-19.

Engvângin nge rawngbâwlnaa kan tel hunah kan beidawn loh vang?

Jehova chuan kan thawhrimnate a hmuh avângin a lâwm hle a. Kan beidawng lo a nih chuan, chatuan nunna kan hmu ang.—w21.10, p. 25-26.

Engtin nge Leviticus bung 19-na chuan: “In chêtzia zawng zawngah lo thianghlim zâwk rawh u,” tih fuihna zâwm tûra min ṭanpui theih? (1 Pet. 1:15)

Chu Bible châng chu Leviticus 19:2-naa thu lâk chhâwn a nih a rinawm a. Bung 19-na chuan kan nî tin nuna 1 Petera 1:15-naa thute kan nunpui theih dân tûr entîrna tam tak min pe a ni.—w21.12, p. 3-4.