¿Ope jaw tuʼjina qe uʼj Aju Xqʼuqil kʼitzqeku che etz? Jaku tzʼel tnikʼa tiʼj qa ma che tzaqʼwet xjel lu tuʼna:

¿Tiʼ qʼuqbʼil qkʼuʼj in tzaj tqʼoʼn Salmo 103:8 aj ttzaj tqʼamaʼn qa at nim tkʼujlabʼil Jehová ex qa in tzaj qʼaqʼin tkʼuʼj qiʼj?

Ojtzqiʼn quʼn qa jaku kubʼ tnajsaʼn Jehová qil tuʼnju at nim qʼaqʼbʼil tkʼuʼj. Ax ikx in tzaj tqʼamaʼn Salmo 103:8 qa taj tuʼn tonin qiʼj tukʼil kʼujlabʼil. Tbʼanel qa ma tzʼel qkanoʼn tiʼj (w21.01, t-xaq 21).

¿Tiquʼn o tzaj tqʼoʼn Jehová oklenj kye junjun?

O tzaj tqʼoʼn Jehová junjun qoklen tuʼnju kʼujlaʼn qoʼ tuʼn. Noq tuʼn jlu, in qo tzalaj ex at mujbʼabʼil qxol. Qa ojtzqiʼn tuʼn jun familia tiʼ kyoklen at toj ja, kʼelel kynikʼ tiʼj alkye in kubʼ nej kywitz aj tkubʼ kyximen jun tiʼ ex alkye kxel bʼinchante (w21.02, t-xaq 3).   

¿Tiquʼn nim toklen tuʼn tok qxqʼuqin qibʼ aj kyajbʼen aplicación te mensaje quʼn?

Qa ma kubʼ t-ximen jun okslal tuʼn kyajbʼen aplicación jlu tuʼn, nim toklen tuʼn tok t-xqʼuqin tibʼ kyiʼj xjal che yolil tukʼil. Mas kwest tuʼn tok qxqʼuqin qibʼ tiʼj jun xjal qa nim qbʼet tokx toj jun grupo (1 Tim. 5:13). Ax ikx, jaku che kubʼ qʼoʼn junjun tqanil nya ax tok kyoj grupo ex jaku tzʼajbʼen kyuʼn tuʼn kykambʼan pwaq kyiʼj erman (w21.03, t-xaq 31).

¿Alkye junjun tiquʼn xi tqʼoʼn Jehová ambʼil tuʼn tikʼ Jesús toj kʼixkʼoj?

Tnejel, tej tjaw qʼoʼn Jesús twitz tzeʼ, e klet qe aj Judiy tuʼn tiʼj kysentens (Gál. 3:10, 13). Tkabʼin, bʼaj tbʼinchaʼn Jehová tten Jesús tuʼn tok te Tnejel Pal. Ex toxin, tuʼnju kukx ajbʼen Jesús te Ttat, kubʼ tyekʼin qa jaku che ten xjal tzʼaqli twitz Jehová maske in che ikʼ toj nim nya bʼaʼn (Job 1:9-11) (w21.04, t-xaq 16, 17).

¿Tiʼ jaku bʼant quʼn qa kwest in che kanet xjal quʼn kyja aj qpakbʼan?

Jaku tzʼok tilil quʼn tuʼn qpakbʼan toj or jatumel jaku che kanet quʼn toj kyja. Ax ikx, jaku qo pakbʼan toj junxichaq lugar. Ex jaku bʼaj qchʼexpuʼn alkye tten in qo pakbʼan, jun techel, jaku chex qtzʼibʼin carta kye xjal (w21.05, t-xaq 15, 16).

¿Alqiʼj yolin Pablo tej tqʼama jlu?: «Tuʼnxju ley ma chin kyime tuʼn miʼn ntentle tjaqʼ ley» (Gál. 2:19).

El toj qʼanchaʼl qa aj il qe xjal tej ttzaj qʼoʼn Ley te Moisés ex onin kyiʼj aj Israel tuʼn tel kynikʼ tiʼj Cristo (Gál. 3:19, 24). Onin Ley tiʼj Pablo tuʼn tokslan tiʼj Jesús. Iktzun tten kyim «tuʼnxju ley» ex ya mintiʼ ten tipumal tibʼaj (w21.06, t-xaq 31).

¿Alkyeqe techel o kubʼ tqʼoʼn Jehová qwitz tuʼn tikʼx quʼn?

In nikʼx nim nya bʼaʼn tuʼn Jehová. Jun techel, in bʼaj tzʼilsaʼn tbʼi, in che qʼojin txqantl tiʼj toklen tuʼn tkawin, in nel kypan kyibʼ junjun tkʼwal tiʼj, in yolin Tajaw il kyiʼj nya ax tok yol, in che ikʼ tmajen toj yajbʼil, in che kyim qe tamiw, in nok bʼinchaʼn nya bʼaʼn kyiʼj txqantl, in che bʼinchan xjal nya bʼaʼn ex in bʼaj kyyajin Txʼotxʼ (w21.07, t-xaq 9-12).

¿Tiʼ xnaqʼtzbʼil jaku tzʼel qiʼn tiʼj José tuʼnju ten tpasens?

Ikʼx tuʼn José tej tok kybʼinchaʼn ttzik nya bʼaʼn tiʼj. Tuʼn jlu, xi qʼamaʼn nya ax tok yol tiʼj ex okx qʼoʼn nim abʼqʼi toj cárcel atz Egipto (w21.08, t-xaq 12).

¿Alkye tten tuʼn kytzaj luʼlun nasyon toj ambʼil jaʼlo ik tzeʼn kyaj qʼamaʼn toj Ageo 2:6 a 9 ex 20 a 22?

Ateʼ nim xjal mintiʼ in nok kyqʼoʼn kywiʼ tiʼj tbʼanel tqanil tiʼj Tkawbʼil Dios, pero ax ikx ateʼ nim xjal in che ok laqʼeʼ ttxlaj Jehová. Toj chʼintl ambʼil, che tzajel luʼlun xjal mankbʼil maj aj tul xitbʼil (w21.09, t-xaq 15-19).

¿Tiquʼn mintiʼ tuʼn qsikt tuʼn qpakbʼan?

In nok tqʼoʼn Jehová twitz tiʼj aj tok tilil quʼn ex in tzalaj tiʼj qaqʼun. Qa mintiʼ ma qo sikt ex qa mintiʼ ma qo kubʼ numj, tzul qʼoʼn qchwinqlal te jumajx (w21.10, t-xaq 25, 26).

¿Tzeʼn in nonin uʼj te Levítico qiʼj tuʼn t-xi qbʼiʼn consej lu: «Kypaʼmil kyibʼe tiʼj tkyaqil mya bʼaʼn, tuʼntzun kyoke xjan»? (1 Ped. 1:15).

Bʼalo atz in jatz versículo lu toj Levítico 19:2. In yolin capítulo 19 kyiʼj junjun techel tzeʼn jaku txi qbʼinchaʼn aju in tzaj tqʼamaʼn 1 Pedro 1:15 (w21.12, t-xaq 3 ex 4).