A koaanli kʼoasí jme xi kjonangi i̱bi xi ya yʼangini je Xo̱n xi Bájinkonná xi tsʼe nó 2021.

Jmé xi bakóyaná Santiago 5:11 nga kʼoatso nga “nʼio tjao bená” je Jeobá kʼoa nga “tjínle kjoamatokon”.

Nga bakóná kjoamatokon je Jeobá síchatʼa je jéená. Jme xi tso Santiago 5:11 kʼoati kui bakóyaná nga tíjnanda je Jeobá nga basenkaoná. Koaan chjénngiaa je choa̱le (w21.01, página 21).

Ánni kʼoasʼin tsakʼéndajinni Jeobá nga tjínkʼa xi xá bánele.

Kuinga tsjoakená. Nga kʼoasʼin tsakʼéndajin, jtín sʼin nixá kʼoa nixá chʼin chʼinñá ngatsʼiaa xi ya tiyojiaan familiale Jeobá. Je xi fitjenngi ya yaniʼya josʼin tjínndajinle Niná, be ʼyáni xi tjínnele kʼoakuitso jme xi koa̱n kʼoa ʼyáni xi koandiaa títjon nga sitjoson (w21.02, página 3).

Xi chjotale Cristo maa, ánni chósonnilee josʼin si̱chjén jña nikasénñá mensaje.

Tsakui si̱chjén aplicación jña nikasénñá mensaje, nda chósonnilee ʼya xi si̱miyoaa. Ngisaa ñʼai maná tsa ya kuiyojiaan je grupo jña nkjín mani xi tjíojin (1 Tim. 5:13). Xi tsín kosonnile, kui kaníbason én xi tsínni kʼoatjín kʼoa tokui xá kjinile je ndsʼee nga tao̱n mele sikinje (w21.03, página 31).

Ánni kitsjoaʼndeni Jeobá nga kjoañʼai kinikjaʼá je ʼNdíle kʼoa nga kinikʼien.

Xi títjon, kʼianga yá kʼientʼa Jesús jé chjota judío kisikatíondái tʼatsʼe jée xi kisʼene (Gál. 3:10, 13). Xi majaoni, kuinga Naʼmitítjon koa̱n ya ngʼajmi. Kʼoa xi majanni, kuinga kʼoasʼin tsakakóni nga koa̱n kixi koaitʼale Niná jngo chjota ninga nʼio tse kjoañʼai ni̱kjaʼá (Job 1:9-11) (w21.04, página 16, 17).

Jmé xi koa̱n sʼiaan tsa tsín satéjiaan ya ndʼiale chjota.

Koaan kʼoachon kuitjokʼinyasoán jochon bele tokoán nga batio ya ndʼiale. Koaan xinxin ʼnde kʼuínyasoán. Kʼoati koa̱n si̱kʼantjaiyaa josʼin kʼuínyasoán, jolani nga carta chjiá (w21.05, página 15, 16).

Jmé xi kinchja̱ni pastro Pablo kʼianga “jetijnakʼen xi tʼatsʼe kjoatéxoma” kitso (Gál. 2:19).

Je Kjoatéxomale Moisés tsakʼéjnatsen nga chjotajée maa, kʼoa tsakinyakao naxinandá Israel nga kiskanitʼale Cristo (Gál. 3:19, 24). Koankjainnile Pablo xi tʼatsʼe Jesús, kʼoa kuinga kʼoakitsoni nga kʼien “xi tʼatsʼe kjoatéxoma” nga̱ tsín tikui kitjenngini (w21.06, página 31).

Jósʼin bʼéjnaná choa̱ je Jeobá nga tíkale.

Tíkale Jeobá nga chʼaosʼin tíchʼasje jaʼaínle, nkjín mani xi batiochjoale nga toje xi tiʼndele batéxoma, tjínkʼa xi yátsʼi̱n tsakinyále, énndiso xi tso Na̱i, kjoañʼai xi faʼá choʼndale, nga biya je miyole, nga tsʼen chjota totaon be xi kjaʼaí, kʼoa nga tjíosíkitsón chjota je Sonʼnde (w21.07, página 9-12).

Jmé xi bakóyaná nga tsejta koan je José.

Je José kiskale nga totaon tsabe xtindsʼe̱. Xi totʼatsʼe jebi, énndiso kisʼene kʼoa nkjín nó nga ndoyá kinikʼéjnaʼya ya Egipto (w21.08, página 11, 12).

Tojo tso Ageo 2:6-9, 20-22, jósʼin kjimatinyale naxinandá ndʼaibi.

Je chjota alikui sasénle nga Énle Niná ʼmiyale, tonga kʼoati nkjín xi nrʼoé nga sakóyale je Énle Niná. Kjoeson ngatsʼi naxinandá kʼianga koa̱ntinyale xi tofetʼani (w21.09, página 15-19).

Ánni tsín kjoájñánilee nga kʼuínyasoán.

Je Jeobá kuenta sʼín jokji bʼenelee yaoná nga ʼmiyasoán kʼoa tsjoa sʼe kon. Tsa tsín kjoájñálee kʼoa tsa tsín si̱kinroajeen tokoán, so̱koná kjoabijnachon xi tsínkʼia fetʼa (w21.10, página 25, 26).

Jósʼin basenkaoná Levítico 19 nga nitjosoán én jebi: “Tsje katamao josʼin mangínkao yaono” (1 Ped. 1:15).

Tsakui nichxin ya kitjoénile texto jebi jme xi tso Levítico 19:2. Ya capítulo 19 nkjín choa̱ faʼaitʼa josʼin si̱tjosoán nga nyaon nyaon jme xi tso 1 Pedro 1:15 (w21.12, página 3, 4).