Eski to finn lir bann nimero Latour Degard pou sa lane-la? Alor, gete si to kapav reponn sa bann kestion-la:

Ki lasirans Zak 5:11 done kan li dir ki Zeova Li “ranpli ar lafeksion ek Li ena mizerikord”?

Enn fason ki Zeova montre so mizerikord se kan Li pardonn nou pou bann erer ki nou fer. Zak 5:11 montre nou ki Zeova ena enn gran dezir pou ed nou. Nou imit Zeova kan nou ena mizerikord anver lezot.​—w21.01, p. 21.

Kifer Zeova finn etabli lotorite?

Zeova finn etabli lotorite parski Li kontan so fami. Gras-a sa dispozision-la, ena lape ek lord dan fami Zeova. Sak manb lafami ki swiv dispozision ki Zeova inn pran pou lafami kone kisannla ki bizin pran bann desizion final ek kisannla ki bizin aplik sa bann desizion-la.​—w21.02, p. 3.

Kifer bann Kretien bizin fer bien atansion kan zot servi bann aplikasion pou avoy ek resevwar bann mesaz?

Si nou servi sa bann aplikasion-la, nou bizin swazir bien nou bann kamarad. Nou bizin fer plis atansion ankor kan nou lor enn group mesaz kot ena boukou dimounn. (1 Tim. 5:13) Nou bizin osi fer atansion kan nou tann bann zistwar ki nou pa kone si zot vre, ek kan nou servi nou bann kontak ki Temwin Zeova pou bann kitsoz materyel ki pena okenn lien avek nou ladorasion pou Zeova.​—w21.03, p. 31.

Sit sertin rezon pou kifer Zeova inn permet ki Zezi soufer.

Premierman, Zezi ti bizin mor lor enn poto pou liber bann Zwif ar enn malediksion. (Gal. 3:10, 13) Deziemman, Zeova ti pe form so Garson pou fonksion Gran Pret. Ek trwaziemman, kan Zezi inn res fidel ziska lamor, li’nn montre ki bann imin kapav res fidel ar Zeova kan zot pas par bann gran leprev. (Zob 1:9-11)​—w21.04, p. 16-17.

Ki to kapav fer si to gagn difikilte pou zwenn bann dimounn dan to minister?

To kapav esey zwenn bann dimounn dan bann ler kan zot lakaz kot zot. To kapav osi pres dan diferan plas, ek esey diferan fason prese. Par exanp, to kapav ekrir bann let.​—w21.05, p. 15-16.

Kan lapot Pol ti dir: “Dapre seki konsern lalwa, mo deza enn mor,” ki li ti pe rod dir? (Gal. 2:19)

Lalwa Mozaik finn montre ki ete pese ek finn gid pep Izrael ver Kris. (Gal. 3:19, 24) Gras-a Lalwa, Pol ti aksepte Zezi Kris. Kan Pol ti dir: “Dapre seki konsern lalwa, mo deza enn mor”; li ti pe rod dir ki Lalwa Moiz ti nepli diriz so lavi.​—w21.06, p. 31.

Konsernan landirans, ki lexanp Zeova inn donn nou?

Zeova pe andir boukou kitsoz: inn sali so nom, boukou dimounn opoz zot ar Li ek ar so drwa pou dirize, sertin parmi so bann zanfan inn rebel kont Li, Satan pe kontign koz manti lor Li, so bann serviter ki Li bien kontan pe soufer, lamor so bann kamarad, bann move dimounn fer lezot dimounn ditor, bann dimounn pe vinn deplizanpli imoral, ek bann imin pe detrir later ki Li’nn kree.​—w21.07, p. 9-12.

Ki lexanp konsernan pasians Zozef inn donn nou?

So bann frer ti tret li dan enn fason inzis. Bann dimounn ti fer bann fos lakizasion kont li, ek li ti res dan prizon pandan plizir lane.​—w21.08, p. 12.

Ki sekous Aze 2:6-9, 20-22 ti predir?

Bann nasion inn rezet mesaz Rwayom Bondie, me boukou dimounn ki ena enn leker sinser inn koumans ador Zeova. Biento, bann nasion pou konn enn dernie sekous kan zot pou detrir.​—w21.09, p. 15-19.

Kifer fode pa nou dekouraze pou akonpli nou minister?

Zeova trouv bann zefor ki nou fer ek sa fer Li plezir. Si nou pa bes lebra ek dekouraze dan nou minister, nou pou gagn lavi eternel.​—w21.10, p. 25-26.

Kouma Levitik sapit 19 kapav ed nou pou aplik sa konsey-la: “Zot bizin vinn sin dan zot konportman”? (1 Pier 1:15)

Sa lexpresion-la sorti dan Levitik 19:2. Levitik sapit 19 montre plizir fason kouma nou kapav aplik 1 Pier 1:15 dan nou lavi toulezour.​—w21.12, p. 3-4.