Yãmb karma Gũusg Gasg nins b sẽn yiis yaoolmã sõma bɩ? Bɩ y ges y sã n tõe n leoka sogs-kãensã:

Zak 5:11 sẽn yet t’a Zeova “tara nonglem wʋsgo,” la t’a yaa ‘nimbãan-zoɛtã’ sõngda tõnd tɩ d bãng bõe?

Bũmb a Zeova sẽn maand tɩ wilgdẽ t’a zoeta d nimbãaneg yaa a sẽn kõt d beegrã sugrã. Zak 5:11 sõngda tõnd tɩ d bãng tɩ d sã n wa be yel-pakr pʋgẽ, a Zeova nimbãan-zoeerã kɩtdame t’a rat n sõng-do. Tõnd segd n dɩka a Zeova togs-n-taare.—w21.01, s.n. 21.

Bõe yĩng t’a Zeova lugl zu-sobendo?

A Zeova lugla zu-sobendo, a sẽn nong a zakã rãmbã yĩnga. Zu-sobendã kɩtdame tɩ laafɩ la bãan be a zakã rãmb sʋka, tɩ zũnd-zãnd me kae ye. Zakã ned ning fãa sẽn sakd zu-sobendã a Zeova sẽn luglã mii sẽn yaa ned ning n segd n lugl noy la a lʋɩ taoor n ges tɩ b tũ no-kãense.—w21.02, s.n. a 3.

Bõe yĩng tɩ d segd n maan gũusgu, aplikasiyõ nins d sẽn tar n toond mesaaz-rãmbã tall n tʋmã wɛɛngẽ?

Sã n yaa aplikasiyõ-kãensã buudã la d tʋmd ne, tõe n yɩɩ toog tɩ d bãng n yãk zo-sõma. Sẽn yɩɩd fãa, sã n mikame tɩ yaa neb kʋʋng n maan sull n toond taab mesaaz-rãmba, na n yɩɩ toog tɩ d tõog n maan gũusgu. (1 Tɩm. 5:13) Tõe n wa kɩtame me tɩ d yelg kibay d sẽn pa tõe n bãng sã n sɩd yaa sɩda, bɩ n tũnug ne rẽ n koosd teed wall n maand teed piblisite-rãmba.—w21.03, s.n. 31.

Bõe yĩng t’a Zeova bas t’a Zeezi nams la a ki?

Pipi, b sẽn ka a Zeezi ra-luk zugã yaa sẽn na yɩl tɩ zʋɩf-rãmbã paam b mens ne kãab-wẽnga. (Gal. 3:10, 13) Yiibu, yaa t’a Zeova ra rat n sõnga a Zeezi t’a wa tõog n lebg maan-kʋʋdb kãsem tõnd yĩnga. Tãabo, yaa t’a Zeezi sẽn kell n sak Wẽnnaam n tãag kũumã, wilgdame tɩ ninsaal tõe n kell n saka Wẽnnaam baa nams-toaag pʋgẽ. (Zoob 1:​9-​11)—w21.04, s.n. 16-17.

Nebã yãab sã n yaa toog koɛɛgã mooneg sasa, bõe la y tõe n maane?

Y tõe n moonda wakat ning y sẽn tõe n mik nebã b zagsẽ wã. Y tõe n toeemda y moonegã zĩiga. Y leb n tõe n tũnuga ne manesem a to, wala makre, n gʋlsd lɛta.—w21.05, s.n. 15-16.

Tʋm-tʋmd a Poll sẽn yeel tɩ “tõogã maasem yĩnga, mam kii tõogã yĩnga,” a ra rat n yeelame tɩ bõe? (Gal. 2:19)

A Moyiiz tõogã kɩtame tɩ lebg vẽeneg tɩ ninsaalbã sɩd pa zems zãnga, la a tall Israyɛll nebã n taas Kiristã nengẽ. (Gal. 3:19, 24) Rẽ n sõng a Poll t’a sak a Zeezi la a ra tẽed-a. Dẽnd d tõe n yeelame t’a “kii tõogã yĩnga.” Tõogã ra pa le tar pãng a zug ye.—w21.06, s.n. 31.

Yel-bʋs pʋsẽ la a Zeova tõogd toogo, tɩ yaa mak-sõng n kõ-do?

A Zeova ket n tõogda toogo, baa ne b sẽn sãam a yʋʋrã, b sẽn kɩɩs a naamã sẽn ka to wã, malɛgs kẽer sẽn lebg tõatbã, a Sʋɩtãan sẽn yelgd ziri ninsã , a nin-nongdsã sẽn namsdã, a zo-rãmb sẽn maan kaalmã, nin-wẽnsã sẽn namsd nebã, la ninsaalbã sẽn sãamd tẽngã a sẽn naanã.—w21.07, s.n. a 9-12.

Mak-sõng-bʋg la a Zozɛf kõ sũ-marã wɛɛngẽ?

A Zozɛf ba-biisã nams-a-la wʋsgo, la a tõoga toogo. Yɩɩ sabab tɩ b wa rõd-a, la b kẽes-a bãens roog Ezɩpt hal t’a maan yʋʋm wʋsg bãensã roogẽ.—w21.08, s.n. 12.

Aaze 2:6-9, 20-22 pĩnd n goma tẽn-digimdg-bʋg buud yelle?

Buud toɛy-toɛyã neb pa sakd n kelgd Rĩungã koɛɛg ye. Baa ne rẽ, neb wʋsg n wat n naagd a Zeova nin-buiidã n tũud-a. Ka la bilfu, a Zeova na n digimda buud toɛy-toɛyã, rat n yeel t’a na n sãam-b lame.—w21.09, s.n. 15-19

Bõe yĩng tɩ d segd n kell n moon koɛɛgã n da koms raood n base?

A Zeova geta tõnd sẽn wɩsgd d mens n tʋmdẽ wã, hal t’a sũur noomẽ. D sã n kell n moon koɛɛgã n pa koms raood n base, d na n wa paama vɩɩm sẽn kõn sa.—w21.10, s.n. 25-26.

Wãn to la Maan-kʋʋr sak 19 wã sõngd-d tɩ d tũ saglg ning sẽn yet tɩ: “Y segd n lebga sõamyã y yel-manesem fãa pʋgẽ” wã? (1 Pɩy. 1:15)

Vɛrse-kãng goamã tika Maan-kʋʋr 19:2 zugu. Maan-kʋʋr sak 19 wã wilgda bũmb toor-toor d sẽn tõe n maan tɩ wilg tɩ d tũuda 1 Pɩyɛɛr 1:15 saglgã d vɩɩmã pʋgẽ.—w21.12, s.n. a 3-4.