Kunanga kuti makanasa kuverenga musoro jo kujija jo Murindiri jo gore iri here? Kudari makajiverenga, vonanyi dangani mungakwanisa kudavira muvhunjo iji:

Nduyo 103:8 inopa cigondiso capi painonanga kuti Jehovha “wakazara ngo rudo”?

Tinoziva kuti Jehovha ecindundihwa ngo unyasha hwake, anoda kurengerera zvatinoposa. Nduyo 103:8 inotigondesa kuti iyena anozviita ngo kupfava kwese kuti atibesere. Ngo kudaro, zvaizovavo zvaushoni kuti timutevejere.—Murindiri wo 01/21, pheji 21.

Ngenyi Jehovha wakaita nasiriro yo kuti pave no vanotungamirira?

Jehovha wakaita nasiriro iyi ngokuti ano rudo. Nasiriro iyi inobesera kuti mbhuri yake yakagondeka, ive no runyararo no kunasa kurongeka. Umwe na umwe pa mbhuri anoshanda mukuzwirana no nasiriro iyi, anoziva kuti ndiyani ano mutoro wo kutema zvivaringo zvokupejisira no kutungamirira pa kuzvikwanirisa.—Murindiri wo 02/21, pheji 3.

Ngenyi Makristu anodikana kungwarira maningi pakushandisa maprikativho o kutumirana mesajhi?

Kudari mundhu akasana kushandisa aprikativho iji, iyena anodikana kukheta kamare vayana vaanoda kutumirana navo mesajhi. Asi izvi zvinganesa maningi kuzviita kudari ecishandisa magurupu akawanda o kutumirana mesajhi ano vandhu vazinji. (1 Timoti 5:13) Yaizova ngozi yakakura maningi kundhandhanisa masoko amucina cokwadi nawo kuti akaitika kana kuti haiwa. Yaizovazve ngozi kushandisa numero jo hama no cingangwa co kuita nyagoso.—Murindiri wo 03/21, pheji 31.

Mathangwe api amweni akaitisa kuti Mwari atendere kuti Jesu atambujwe no kuurawa?

Thangwe rokutanga rakaitisa kuti Jesu akhohomehwe pamutanda, rainga rokuda kusujunura Vajudha vainga vakatukwa. (Vagaratiya 3:10, 13) Thangwe ro cipiri rainga ro kuti Jehovha wainga eciroveja Jesu kuitira basa raizoita inga Mupiri Mukuru. Perapo thangwe ro citatu rainga ro kuti Jesu waizofa akagondeka kuitira kuvonesa kuti vandhu vangaramba vakagondeka pikija vecisotana no zvineso zvakasiyana-siyana. (Jobe 1:9-11)—Murindiri wo 04/21, mapheji 16-17.

Ngozvapi zvamungadikana kuita kudari vandhu vari kunesa kuvawana mu mamuzi mavo pamunoenda kocumaera?

Ejanyi kuvapsaka panguva yo kuti vangawanika mu mamuzi mavo. Cumaeranyi mundau jakasiyana-siyana. Ejanyizve kushandisa njira jakasiyana-siyana jo kucumaera, jakadari inga kutara karata.—Murindiri wo 05/21, mapheji 15-16.

Pauro waida kunangenyi paakati: “Ngo pamusoro po mutemo [ndakafa] kwauri”? (Vagaratiya 2:19, masoko o pasi.)

Mutemo wa Mosi wakatatija vandhu vacizivi kukwana no kutungamirira Vaiziraeri kuti vagume ka Kristu. (Vagaratiya 3:19, 24) Mutemo uwu wakaita kuti Pauro atendere kuva Mukristu. Ngo kuita kudaro, Pauro wainga ‘asujunuka kwauri,’ iyena wainga acizivizve kusungwa ndiwona.—Murindiri wo 06/21, pheji 31.

Jehovha ari kugajisa kudini muezaniso kwatiri ngo kukhombija kucungirira?

Jehovha ari kucungirira kutukwa ko zina rake, kuphikizwa ko ukuru-kuru hwake, kupandukihwa kwaakaithwa ngo vamweni vo vana vake, manyepo anonangwa nguva jese ndi Dhiyabhu, kutambujika ko vashandiri vake vanodiwa, kutama kuvazve no shamwari jake jakafaya, kutama kuzwana ko mbhuri no kuparajwa ko zvisikwa zvake.—Murindiri wo 07/21, mapheji 9-12.

Josefa wakagajisa kudini muezaniso wakanaka wo kusengerera?

Iyena wakacungirira kushaishwa kutajwa ngo hama jake. Zvondhozvo zvakamuita kuti apumbhwe manyepo akashata no kudihwa mukadheya ku Ejipita ko makore akawanda.—Murindiri wo 08/21, pheji 12.

Hagayo 2:6-9, 20-22 inotivhunjenyi ngo kuzungunyika ko kufananijira?

Majinja aaripi kunasa kuashira ushoni kucumaehwa ko masoko o Umambo, asi vandhu vazinji vari kukwevehwa kuti vaviye kucokwadi. Sambiri pano, kunozova no kuzungunyiswa ko kupejisira ko majinja, kunonga kuri kuparajwa kwawo kamare.—Murindiri wo 09/21, mapheji 15-19.

Ngenyi atidikani kuremba pakuita basa redu ro kucumaera?

Jehovha anovona kuvangisira kwatiri kuita, perapo wodakara ndizvona. Kudari tikatama kuremba pa basa redu ro kucumaera, tinozowana upenyu hucingaperi.—Murindiri wo 10/21, mapheji 25-26.

Kuitisa kudini VaLevi cipauko 19 inotibesera kushandisa mazano o kuti: “Ivanyi vakacena mu mufambiro wenyu wese”? (1 Pedhru 1:15)

Vhesi iyi yakanokora magama ari pana VaLevi 19:2. Cipauko 19 cinotipa muezaniso jakawanda jo manera atingashandisa bhuku ra 1 Pedhru 1:15 mu upenyu hwedu hwo njiku no njiku.—Murindiri wo 12/21, mapheji 3-4.