Mbela owa lesha ngaa nawa Ooshungolangelo dhomumvo nguka? Tala ngele oto vulu okuyamukula omapulo taga landula:

Eshilipaleko lini Jakob 5:11 te tu pe sho a ti kutya Jehova “omunesilohenda nomunalukeno”?

Molwaashoka Jehova omunahenda, oha kala aluhe i ilongekidha e tu dhimine po. Jakob 5:11 ote tu shilipaleke kutya Jehova oha kala a halelela oku tu kwathela. Otu na okukala hatu mu holele. — w21.01, ep. 21.

Omolwashike Jehova a tula po elongekidho lyuukwamutse?

Shoka okwe shi ningi, i inyengithwa kohole. Elongekidho ndyoka olye shi ningitha tashi wapa, opo muukwanegumbo we mu kale mu na ombili nelandulathano. Kehe oshilyo shomuukwanegumbo shoka hashi kala metsokumwe nelongekidho ndyoka ohashi kala shi shi kutya olye e na oshinakugwanithwa shokuninga omatokolo noku ga tula miilonga. — w21.02, ep. 3.

Omolwashike Aakriste ye na okukala ya kotoka uuna taya longitha oopolohalama dhokutuma nokuyakula omatumwalaka niikwaelektronika?

Ngele omuntu okwa hogolola a longithe oopolohalama ndhoka, okwa pumbwa okukala a kotoka uuna ta hogolola mboka ha kwatathana nayo. Shoka ohashi kala oshidhigu okuninga, unene tuu uuna mu li mongundu yi na aantu oyendji. (1 Tim. 5:13) Osha nika wo oshiponga okutaandeleka uuyelele mboka inaawu kolekwa kutya owu li paushili nosho wo okulongitha oondjukithi dhehangano miinima yopangeshefa. — w21.03, ep. 31.

Omolwomatompelo gamwe geni Kalunga a pitika Jesus a monithwe iihuna noku dhipagwe?

Etompelo limwe olyo kutya sho Jesus a alelwa komuti gwomahepeko, oshe shi ningi tashi wapa opo Aajuda ya manguluke mo methingo. (Gal. 3:10, 13) Etompelo etiyali olyo kutya Jehova okwa li ta dheulile Jesus oshinakugwanithwa she shokukala Omuyambi Omukuluntu. Etompelo etitatu olyo kutya sho Jesus a kala omudhiginini, kungawo okwa ulike kutya omuntu ota vulu okukala omudhiginini kuJehova nonando ota makelwa sha kwata miiti. (Job 1:9-11) — w21.04, ep. 16-17.

Oshike to vulu okuninga ngele aantu moshitopolwa sheni ihaya monika nuupu?

Kambadhala okuya kuyo pethimbo ndyoka olundji haya kala megumbo. Oto vulu wo okukambadhala okukala ho uvithile momahala ga yoolokathana. Oto vulu wo okulongitha omikalo dhilwe dhokuuvitha, ngaashi okunyola oontumwafo. — w21.05, ep. 15-16

Omuyapostoli Paulus okwa li a hala okutya shike, sho a ti: “Mokupopya ompango ngame onda sa, nda dhipagwa kompango”? (Gal. 2:19)

Ompango yaMoses oya li ya ulike kutya aantu inaya gwanenena, noya kwathele wo Israeli shi mone kutya otayi hulile muKristus. (Gal. 3:19, 24) Shoka osha kwathele Paulus a taambe ko Kristus. Sho a ningi ngawo, Paulus okwa ‘dhipagwa kompango,’ ano kutya ka li we ta pangelwa kuyo. — w21.06, ep. 31.

Jehova okwe tu tulila po ngiini oshiholelwa sheidhidhimiko?

Jehova okwa kala ti idhidhimikile okunyatekwa kwedhina lye, ompata kombinga yuunamapangelo we, uunashipotha woyana yamwe, omalundilo gaSatana, okumona iihuna kwaalongeli ye, eso lyookuume ke, okupatanekwa kuukwanegumbo we wokombanda yevi, nosho wo okuyonagulwa kweshito lye. — w21.07, ep. 9-12.

Josef okwa tula po oshiholelwa shini sheidhidhimiko?

Okwa li i idhidhimikile okuungaungiwa naye kaashi li pauyuuki kaamwayinamati. Shoka osha ka ningitha a lundilwe noku tulwe mondholongo muEgipiti uule womimvo. — w21.08, ep. 12.

Okukakamithwa kwopathaneko kuni kwa hunganekwa muHaggai 2:6-9, 20-22?

Iigwana ihayi taamba ko etumwalaka lyUukwaniilwa, ihe aantu oyendji ohaya nanenwa moshili. Masiku iigwana otayi ka kakamithwa lwahugunina sho tayi ka hanagulwa po. — w21.09, ep. 15-19.

Omolwashike kaatu na okweetha po uukalele wetu?

Jehova oha kala e wete oonkambadhala dhetu, noha kala e dhi panda. Ngele otwa kala inaatu sholola, otatu ka mona omwenyo gwaaluhe. — w21.10, ep. 25-26.

Levitikus ontopolwa 19 ota vulu ngiini oku tu kwathela tu tule miilonga omayele ngaka taga ti: “Kaleni aayapuki mwaayihe mbyoka tamu yi ningi”? (1 Pet. 1:15)

Ovelise ndjoka otashi vulika ya totha Levitikus 19:2. Ontopolwa 19 oyi na iiholelwa oyindji kombinga yankene tatu vulu okutula miilonga 1 Petrus 1:15 mokukalamwenyo kwetu kwakehe esiku. — w21.12, ep. 3-4