Apwanne muhaalakhanya moopwacha irevista sa Mulipeleli a eyaakha yeela? Vano moone waakhanle wi munahaala owerya waakhula makoho anacharela:

Apwanne Tiyako 5:11 onnooniherya wi Yehova “taniphwanya ni ooreera murima”?

Ninnasuwela wi ikharari sa Yehova, sinnamuceenyerya okhurumuwela soocheka sahu. Tiyako 5:11 onnaniroromeliha wi niphwanya na Yehova ninnamuceenyerya owo onikhaviherya. Ninneerano phaama vaavaa nnamutakiheryaahu Yehova.—w21.01, epaax. 21.

Ntakhara heeni Yehova ootikitherya marehereryo a ohoolela?

Owo eenreno yeela nthowa na osivela. Ohoolela onneeriha wi emusi ya Yehova ekhaleke mmureceleni ni yooreheryeya mmikhalelo mikina. Muchu ti muchu aveemusini onapaka ichu mwawiiwanana ni marehereryo yaala onnamusuwela taani onaphwanela opaka soolakelela sookuchula ni taani onaphwanela ohoolela wi soolakelela iho ikhwaaniheryiwe.—w21.02, epaax. 3.

Ntakhara heeni Akristu annaphwanela okhalano ekaasoope vaavaa anaapharihelaaya aaplikativo anavonya michaka?

Wakhala wi muchu oothanla waapharihela aaplikativo yaala, owo onaphwanela waathanla phaama asinthamwene. Nave onamukhala woovila waathanla phaama asinthamwene wakhala wi nikhuuru nlo ntokweene. (1 Tim. 5:13) Sookhalavo tho sawoopiha inavolowela omwaramwaxa miyaha sawootha ni waapharihela aaplikativo yaala ni yoolakelela ya ompaka nakoso.—w21.03, epaax. 31.

Mathowa taani yeerinhe wi Muluku eemererye wi Yesu ahooxeye ni okhwa?

Nthowa nimoha ti nawi moorweela wa Yesu okhomeliwa vamwirini yaaheeriha wi Ayuta etaphuliwe mu wuulumeliwa. (Gal. 3:10, 13). Nthowa nanaawiili ti nawi Yehova aamuvyakiha Yesu ntakhara murici awe wa muhoolo ntoko Namukucho Mutokotoko. Nave naneeraru ti nawi ororomeleya wa Yesu ophiyerya okhwa waahooniherya wi achu ananwerya otitelela okhala oororomeleya wa Yehova naamwi ehoolelaka saweeha itokweene. (Yobi 1:9-11)—w21.04, ipaax. 16-17.

Tiheeni munaphwanelaanyu weera wakhala wi onnakhala woovila waaphwanya achu mmuteko woolaleerya?

Mweererye owaavya achu mu elukuluku yeeyo awo aryaaya vaate. Munanwerya tho weererya olaleerya mu nipuro noohiyana. Nave munanwerya weererya mukhalelo mukina, ntoko waarepela ikaarata.—w21.05, ipaax. 15-16.

Tiheeni yaamweerinhe murummwa Paulo oloca wi: “Kiri ookhweene ni ichu sa malamulo”? (Gal. 2:19)

Nlamulo na Mose naahooniherya oohiphaameya wa achu nave naahaahoolela Aisarayeli wa Kristu. (Gal. 3:19, 24) Ela yaamweeriha Paulo omweemererya Kristu. Moorweela mwa weereno yeela, Paulo ‘aari ookhweene mu ichu sa nlamulo’; owo haamakiwe mu nlamulo.—w21.06, epaax. 31.

Ti mwawiihai Yehova otikithenryeiye yootakiherya wa hiyo vooloca sa wooniherya ovilela?

Yehova onnavilelano onyemuliwa wa nsina nawe, waakaahiwa wa otokweene awe, omwareya wa anamwane awe akina, sawootha sa Musaserya, ohooxeya wa alapeli awe oosiveliwa, waayeleela asinthamwene awe yaale akhwile, ohooxiwa wa achu orweela wa achu oonanara murima, ichu soonanara achu anapakaaya, ni onanarihiwa wa soopatuxiwa sawe.—w21.07, ipaax. 9-12.

Yootakiherya taani yaphaama Yosefe otikithenryeiye ya opisa murima?

Owo aavilela ni okhalihiwa moohookololowa ni asinnawe. Ohoolo waya owo aahootheryiwa ni owaleliwa mukariposo o Yikuputu mu iyaakha sincipale.—w21.08, epaax. 12.

Ocikinya taani woosiphela Ageu 2:6-9, 20-22 aalohenryeiye?

Maloko hanaakhulela phaama olaleeryiwa muchaka wa Omwene, nyenya achu ancipale annarwa mu eparipari. Moohilekela maloko anahaala ocikinyiwa wookuchula vaavaa anahaalaaya otoloxiwa moomalela.—w21.09, ipaax. 15-19.

Ntakhara heeni hannaphwanela ovelavela mmuteko ahu woolaleerya?

Yehova onnoona wiilipixerya wahu, nave owo onnasiveliwano. Wakhala wi hinivelavenle naari ohiya, nnahaala waakhela okumi woohimala.—w21.10, ipaax. 25-26.

Ti mwawiihai Onamukutxho ekapitulu 19 onanikhaviheryeiye opharihela ekano ela: “Mukhale awela mwa sothene muneranyu”? (1 Ped. 1:15)

Eversikulu yeela mwawooneya ekuxiwe mu Onamukutxho 19:2. Ekapitulu 19 ennavahererya sootakiherya sincipale vooloca sa mukhalelo nneeraahu nimpharihele 1 Pedro 1:15 mu okumi ahu wa nihiku ti nihiku.—w21.12, ipaax. 3-4.