¿Kuajli yotikinpouj revistas tlen san kemach yokiskej itech Amatl Tekakistilijketl? Xkita tla uelis tikinnankilis yejuin tlajtoltilistin:

¿Tlenon techasikamachiltia Salmo 103:8, 11 ijkuak kijtoua ika Jehová kipiya “ueyi tetlajsojtlalistli”?

Tikmatij ika Jehová techititia ika techiknelia pampa techtlapopoluiya. Salmo 103:8, 11 kuajli techititia ika Jehová sa kinektika techpaleuis. Melak kuajli tla tikchiuaj ijkon ken Jehová (w21.01, página 21).

¿Tleka Jehová kineki manemikan akin matlayekanakan?

Yejua yokintlali akin tlayekanaj pampa kineki kuajli manemikan familias. Ipampa yejuin, nochimej ikoneuan kuajli nemij niman san sekan tekitij. Akin kitlakamatij yejuin tlanauatijli kimatij akinon noneki kijtos tlenon nochiuas niman akinon noneki kiyekanas se tekitl (w21.02, página 3).

¿Tleka akin tikchiuaj ken Cristo noneki totlajpiyaskej ijkuak tikinkuiskej aplicaciones kampa notitlanij mensajes?

Tla yakaj kintekitiltia aplicaciones kampa notitlanij mensajes, noneki kuajli kintlapejpenis akin iuan nouikas niman más noneki notlajpiyas tla nemi ipan se ueyi grupo (1 Tim. 5:13). Noijki, tla tikinkuij yejuin aplicaciones kanaj uelis techijliskej se noticia tlen nion xtikmatij tla yemelak ijkon onochiuj. Niman, ika yejon aplicaciones, sekimej kanaj hasta kinekiskej san intech oksekimej tokniuan kitlantoskej tomin (w21.03, página 31).

¿Tleka Jehová okitekauili makitlajyouiltikan niman makimiktikan Jesús?

Kachtopa, Jesús nonekiya kipiloskej ipan se kojtli melaktik pampa nonekiya kinmakixtis judíos itech itlaj tlen xkuajli (Gál. 3:10, 13). Ika ome, toTajtsin okitekauili makitlajyouiltikan iKoneuj pampa kinekiya ika manomajmachtijtiuj kenon kichiuaskia itekiyo ken Ueyi Teopixki. Ika yeyi, tlen okichiuj Jesús okiteititi ika se tlaltikpakchane uelis yolmelajkanemis itech Jehová maski melak kitlatlataskej (Job 1:9-11) (w21.04, páginas 16, 17).

¿Tlenon uelis tikchiuaskej tla xtikinnextiaj inchan akin tiknekij tikinnojnotsaskej?

Uelis más miyekej tikinnojnotsaskej tla tejuamej tiauej ipan hora ijkuak nemij inchan. Noijki, uelis tikpatlatiaskej kampa titenojnotsaj. Niman uelis tikpatlaskej ken titenojnotsaj, kanaj uelis tikimijkuiloskej cartas (w21.05, páginas 15, 16).

¿Tlenon okijtosnek apóstol Pablo ijkuak okijto: “Ipampa tlanauatijli nejua yonimik”? (Gál. 2:19).

Tlanauatijli tlen okimakakej Moisés okiteititi ika tinochimej titlajtlakolejkej niman okinpaleui israelitas makitakan ika Jesús yejua akin Cristo (Gál. 3:19, 24). Tlen kijtouaya tlanauatijli okipaleui Pablo matlaneltoka itech Jesús. Ijkon, Pablo omik ipampa tlen kijtoua tlanauatijli; yejua xok noyekanaya ika tlanauatiltin tlen okimakakej Moisés (w21.06, página 31).

¿Kenon techititia Jehová ika noneki titlaxikoskej? 

Tlen Jehová yokitlapejpeni kixikos: ijkuak kita kenon xkitlakaitaj itoka, kenon kijtouaj ika xkinamiki matlayekana, kenon sekimej ikoneuan kixnamikij, kenon Diablo uajtlakajkayaujtiuj, kenon tlajyouiyaj itekipanojkauan, kenon mikij iamigos, kenon tetlajyouiltiaj akin xkuajkualtin niman ijkuak kita kenon kijtlakojtokej tlaltikpaktli (w21.07, páginas 9-12).

¿Tlenon tiuelij ijkuak tikitaj kenon José otlaxiko?

José xsan okixiko nochi tlen ikniuan okichiuilijkaj. Sakin okijtouilijkej ika yokichiujka tlen xkuajli niman ouejkauj okitsajkej ne Egipto (w21.08, página 12).

¿Tlenon okijto Ageo 2:6-9, 20-22 ika nochiuaskia?

Ijkuak tejuamej tikinnojnotsaj oksekimej, miyekej xtechkakisnekij, san ika, oksekimej kema kuelitaj tlen tikteijliaj. Sa achijtsin poliui ijkuak Jehová sa ika tlami tlatsejtselos, kijtosneki ika kinpopolos nochimej akin xkinekij makinyekana (w21.09, páginas 15-19).

¿Tleka xnoneki tijkajkauaskej ika titenojnotsaj?

Jehová más kipatiojkaita ken tokojtiliaj niman ken titlaxikouaj. Tla xtosiaujkauaj, Jehová kijtoua ika techmakas nemilistli tlen xkeman tlamis (w21.10, páginas 25, 26).

¿Kenon Levítico 19 techpaleuiya matiktlakamatikan yejuin tlanauatijli: “Xchipajtiakan de nochi tlen nenkichiuaskej”? (1 Ped. 1:15).

Ijkuak apóstol Pedro okijkuilo yejuin tlaxelojli, kanaj kiteneujtoya Levítico 19:2. Capítulo 19 kuajli techititia kenon uelis tiktlakamatiskej 1 Pedro 1:15 (w21.12, páginas 3, 4).