Muwanasomire amagazeti wosi w’Akaleberyo aw’omwaka ono? Byamabya bitya, lebaya nga wanganasubirya oko mabulyo ano:

Erisako rya Yakobo 5:11 likasubaya mutima liti omughulu likabugha liti Yehova “ni w’eriganyirakutsibu” kandi “akaganyira abandu”?

Tunasi ngoko omwighanyira liwe, Yehova akatubughira amalolo wetu. Yakobo 5:11 yikatukanganaya ngoko erighanyira kutsibu lya Yehova likamukuna erituwatikya. Litolere itwamwigha.​—w21.01, aka. 21.

Busanaki Yehova mwaha abandu balebe b’ehamuli oko bandi?

Mwakola atya busana n’olwanzo. Endegheka eyo yikaleka ekihanda ky’abandu biwe bataleghula ikyakola omo buholo n’eriyitondeka. Obuli mundu w’omo kihanda oyukakwama endegheka eyo akaminya nga nindi yuwite ehamuli y’eribugha eky’omwiso n’erikwamirira emyatsi.​—w21.02, aka. 3.

Busanaki Abakristo batolere ibayiteya omughulu bakatumirana esyomesage omo nzira y’ekielektronike?

Omundu amasombola eribya akatumirana esyomesage omo nzira y’ekielektronike, litolere inyasombola abira bo ndeke. Ekyo kyanganakala twamabya omo bikuto ebirimo abandu bangyi. (1 Tim. 5:13) Hane n’ehatari y’erilalaghania emyatsi eyite y’ekwenene n’omundu erisonda erilolya embere emyasi yiwe y’ekomerese erilabira abaghala n’abali betu.​—w21.03, aka. 31.

Yehova mwaleka Yesu aghalawe n’erihola busana n’emyatsi milebe yahi?

Ow’erimbere, Yesu erihanikwa oko muti, ekyo mukyaleka ikyatokekana oko Bayahudi erilusibwa omo butakirwa obukalire. (Gal. 3:10, 13) Ow’akabiri, Yehova abya akabegherya Yesu oko mubírí wiwe w’omo biro ebikasa, nibughambu eribya Muhereri Mukulu. N’ow’akasatu, Yesu erisighala mutaleghula erihika oko luholo, mwakangania ngoko abandu banganatoka erisighala bataleghula nibya n’omughulu bakalaba omwilengwako erikalire kutsibu. (Yobu 1:9-11)​—w21.04, aka. 16-17.

Wangakolaki lyamabya irikalire eribana abandu omo mubírí w’eritulira?

Wanganatasyalendererabo oko ndambi esyo bangabanika eka wabo. Wanganatasyayatulira ehandi. Kandi wanganakolesya esyonzira mbiriri-mbiriri, ng’erihandika ebaruha.​—w21.05, aka. 15-16.

Omukwenda Paulo asonda eribugha atiki omughulu abugha ati: “Omo mwatsi w’emigambo nabirihola”? (Gal. 2:19)

Emighambo ya Musa muyakangya ndeke-ndeke ngoko abandu abatahika-hikene, abakakola amalolo sibangatoka eriberererya ebiri omo mighambo, kandi moyasondola Abaisraeli oko Kristo. (Gal. 3:19, 24) Emighambo muyawatikya Paulo eriligha Kristo. Omwikola atya, Paulo ‘mwahola omo mwatsi w’emighambo’; abya isyakisondolawa n’emighambo.​—w21.06, aka. 31.

Oko mwatsi w’eriyiyinia, Yehova abiritusighira eky’erileberyako kyahi?

Yehova akayiyinaya bakatsuma erina riwe, abandu bangyi bakaghana erikirirya kw’ali n’ehamuli y’eribya mutabali w’ekihugho kyosi, abana biwe balebe bakaghana erimwowa, Diabolo akamubughako amabehi butumbya, abaghombe biwe banzwa bakaghalwa, busana n’abira biwe ababirihola, akalangira abandu babi bakaghalya abandi, akalangira abandu bakayikoberya omo bibi n’abandu bakatsandya ekihugho ekyahangyika.​—w21.07, aka. 9-12.

Yosefu mwatusighira eky’erileberyako kyahi ekyuwene okwikangya omutima w’erilindirira?

Mwayiyinia abaghala babo bakamukolera omo ritatunganene. Ekyo mukyamukolya okwiyatsongerwa eby’amabehi eMisiri n’erighuswa omo ngomo.​—w21.08, aka. 12.

Ni suka-sukanibwa lindi lyahi erikanibweko omo Hagai 2:6-9, 20-22?

Ebihanda bikaghana engulu mbuya y’oBwami, aliwe abandu bangyi banemwasa omo kwenene. Lino-lino ebihanda bikendisukanibwa omughulu bikenditoghotibwa.​—w21.09, aka. 15-19.

Busanaki isitwaluha eriberererya omubírí wetu w’eritulira?

Yehova akalangira n’eritsemera eriyikasa lyetu. Twamatendireghula, itukasyabana engebe y’erikota.​—w21.10, aka. 25-26.

Abalawi esura 19 yangatuwatikya yiti erikolesya erihano rino: “Mubye babuyirire omo migendere yenyu”? (1 Pet. 1:15)

Alinga erisako eryo rikakanaya oko binywa ebiri omo Abalawi 19:2. Esura ye 19 yikateka eby’erileberyako bingyi ebyangatuwatikya erikolesya 1 Petero 1:15 omo ngebe yetu.​—w21.12, aka. 3-4.